Рут 4
4
Боазниң Рутни некайиға елиши
1Бу арида Боаз шәһәр дәрвазисиға берип, у йәрдә олтарди. Узун өтмәй өзи ейтқан Әлимәләкниң әң йеқин туққиниму у йәрдин өтүп қалди. Боаз униңға:
— Бурадәр, бу йәргә келип олтарғин! — дәп чақирди, у келип олтарди.
2Боаз йәнә шәһәрниң ақсақаллиридин он нәпирини тәклип қилип, уларниму бу йәрдә олтарғузди. Көпчилик олтирип болғандин кейин, 3у һелиқи туққиниға:
— Бурадиримиз Әлимәләкниң аяли Наоми Моабтин қайтип келип, өзлиригә тәвә зиминини сатмақчи болуватиду. 4Шуңа сени бу иштин хәвәрләндүрмәкчимән. Әгәр сән бу йәрни елишни халисаң, мошу йәрдә олтарған ақсақаллар вә җамаәт алдида алғин. Әгәр елишни халимисаң, очуқ ейтқин. Буни мән билишим керәк, чүнки алди билән сениң елиш һоқуқуң бар. Андин кейин новәт маңа келиду, — деди.
Һелиқи туққини:
— Алимән, — деди.
5Боаз униңға:
— Хоп! Әгәр сән у зиминни Наомидин алсаң, мәрһум оғлиниң моаблиқ тул хотуни Рутниму әмриңгә елишиң һәм мәрһумниң намини сақлап қелиш үчүн әвлат қалдуруп, әвладиға бу йәрни мирас қалдурушуң шәрт, — деди.
6У киши:
— Ундақта бу йәрни елиш һоқуқумдин ваз кечимән, чүнки балилиримға қалидиған мирас бөлүнүп кетидикән. Сән алғин! Мән алалмаймән, — дәп җавап бәрди.
7Әйни вақитларда исраиллиқларниң мал-мүлүк, сода-сетиқ ишлирида мундақ бир адәт бар еди. У болсиму сатқучи өз аяқ кийимини йешип, алғучиға берәтти. Улар сода-сетиқниң пүткәнлигини мошу усул билән ипадиләтти.
8Шуңа у киши Боазға:
— Сән алғин! — дәп аяқ кийимини селип, Боазға бәрди.
9Боаз у йәрдики ақсақаллар һәм җамаәткә:
— Әй җамаәт, гепимгә қулақ селиңлар! Бүгүн һәммиңлар гува болуңлар, мән Наомидин Әлимәләкниң мирасини, йәни Килйон билән Маһлонға тәвә болған йәр-зиминларни өзәмниң илкимгә алимән. 10Шуниң билән биргә мәрһумниң мирасиға варис қалдуруш үчүн һәм униң наминиң бурадәрлирим арисида, шундақла өз жутида унтулуп кәтмәслиги үчүн, мәрһум Маһлонниң аяли моаблиқ Рутниму әмримгә алимән. Бүгүн силәр бу ишларға гува болғайсиләр, — деди.
11Дәрвазиниң йенидики ақсақаллар вә җамаәт:
— Шундақ, биз гувадуримиз. Пәрвәрдигар Яқупниң аяллири Раһилә билән Леяһқа нурғун пәрзәнт бәргинидәк, аялиң Рутқиму көп пәрзәнт ата қилғай. Әфратада бай болғайсән, Бәйтләһәмдә иззәт-аброй тапқайсән. 12Пәрвәрдигар бу яш аялдин саңа нурғун әвлат ата қилғай, уруқ-әвладиңни Тамарниң Йәһудаға туғуп бәргән оғли Пәрәсниң уруқ-әвладиға охшаш нурғун қилғай, — дәп дуа қилишти.
Боаз билән Рут падиша Давутниң беваситә әҗдадидур
13Шундақ қилип, Боаз Рутни әмригә елип, улар бир тәһийигә баш қойди. Пәрвәрдигарниң қудрити билән Рут һамилдар болуп, бир оғул туғди. 14Шәһәрдики аяллар Наомиға:
— Пәрвәрдигарға һәмдусаналар болсун! У бүгүн сизгә таянч болидиған бир нәврә ата қилди. Униң нами Исраилда иззәт-аброй тапсун. 15Сиз үчүн йәттә оғулдинму әвзәл келиниңиз сизгә яхши қариди, һазир у сизгә бир нәврә туғуп бәрди. Бу нәвриңиз сизниң қолиңизға қол, путиңизға пут болуп, қериған вақтиңизда таянчиңиз болиду, — дейишти.
16Наоми бу балини қолиға елип, бағриға чиң басти вә униң һалидин хәвәр алди.
17Хошна аяллар бәс-бәстә:
— Наоми бир оғул нәврилик болди! — дейишип, балиға Обeд дәп ат қойди.
Обeд Йишайниң атиси, Йишай падиша Давутниң атиси еди.
18Пәрәстин Давутқичә болғанларниң нәсәбнамиси: Пәрәс Хәзронниң атиси, 19Хәзрон Рамниң атиси, Рам Амминадабниң атиси, 20Амминадаб Нахшонниң атиси, Нахшон Салмонниң атиси, 21Салмон Боазниң атиси, Боаз Обeдниң атиси, 22Обeд Йишайниң атиси, Йишай Давутниң атисидур.
Currently Selected:
Рут 4: HZUTCYR
Highlight
Share
Copy
Want to have your highlights saved across all your devices? Sign up or sign in
Uyghurche Muqeddes Kitab Jemiyiti