Tononkiran’i Solomona 6
6
(Olon-kafa)
1Nankaiza ny malalanao,
ry tsara tarehy indrindra amin’ny vehivavy?
Nivily nankaiza ny malalanao
mba hiarahanay aminao hitady azy?
(Ravehivavy)
2Lasa nidina ho any an-tsahany ny malalako,
dia any amin’ny tanim-boninkazo misy zavamanitra
mba hiandry ny ondriny miraoka ahitra eny an-tsaha sy hioty ny lisy.
3An’ny malalako aho, ary ahy ny malalako,
dia ilay miandry ny andian’ondriny eny amin’ny lisy.
Ny mombamomba ilay malalany
(Ralehilahy)
4Tsara tarehy tahaka an’i Tirza ianao, Rahavako,
eny, tsara tarehy tahaka an’i Jerosalema,
mahatahotra toy ny andia-miaramila mitondra faneva.
5Avilio tsy hijery ahy ny masonao fa mampiontanontana ny foko.
Ny volonao dia tahaka ny andian’osy
izay miriotra midina an’i Gileada.
6Ny nifinao dia tahaka ny andian’ondrivavy
izay miakatra avy eo amin’ny fampandroana azy;
samy kambana avy ireo
fa tsy misy tsy mana-namana;
7tahaka ny hasin’ampongabendanitra ny takolakao
eo amin’ny fisalobonanao.
8Misy mpanjakavavy enimpolo
sy vady tsindrano valopolo
ary zatovovavy tsy hita isa.
9Fa tokana kosa ny voromailalako,
dia ilay ahy tsy misy kilema,
vavitokan’ny reniny
sady tsongaina amin’izay naterany.
Ny tovovavy izay nahita azy dia nilaza azy ho sambatra,
eny, ny mpanjakavavy sy ny vady tsindrano ka nidera azy.
(Olon-kafa)
10Iza moa io vehivavy mitsidika toy ny maraina
izay tsara tarehy tahaka ny volana, mamiratra toy ny masoandro
nefa sady mahatahotra toy ny andia-miaramila mitondra faneva?
(Ralehilahy)
11Lasa nidina nankany an-tsaha misy ny hazo fihinam-boa aho,
hijerijery ny zava-maitso eny an-dohasaha,
hizaha raha mitsimoka ny voaloboka
na mamony ny ampongabendanitra.
(Ravehivavy)
12Tsy nampoiziko ny nipetrahako
teo amin’ny kalesin’ny fireneko be voninahitra.
Currently Selected:
Tononkiran’i Solomona 6: MRV
Highlight
Share
Copy
Want to have your highlights saved across all your devices? Sign up or sign in
© La Société Biblique Malgache 2011
