Tononkiran’i Solomona 1
1
1Ny tononkira tsara indrindra, izay an’i Solomona.
Resadresaka ifanaovan’ny mpifankatia
(Ravehivavy)
2Enga anie ka hanoroka ahy amin’ny fanorohan’ny vavany izy!
Fa tsara noho ny divay ny fitiavanao.
3Mani-pofona ny menakao tsara,
menaka manitra voaidina ny anaranao,
koa izany no itiavan’ny tovovavy anao.
4Tariho aho hanaraka anao, dia hiara-hihazakazaka isika;
noentin’ny mpanjaka ho ao an’efitranony aho.
Hifaly sy hiravoravo ao isika;
hankalazaintsika mihoatra noho ny divay ny fitiavanao;
fitiavana marina no itiavany anao.
5Mivalomainty aho, nefa tsara tarehy, ry zanakavavin’i Jerosalema,
toy ny tranolain’i Kedara, toy ny ambaindain’i Solomona.
6Aza mibanjina ahy fa mivalomainty aho
satria nodanihin’ny hainandro.
Tezitra tamiko ny zanak’Ineny;
notendreny ho mpiandry ny tanim-boalobony aho;
nefa ny tanim-boaloboko kosa, izay ahy, dia tsy mba nambenako.
7Ambarao amiko, ry ilay tian’ny foko,
aiza no iandrasanao ny ondrinao,
aiza no andriandrianao rehefa antoandro?
Fa nahoana aho no ho tahaka izay mirenireny foana
eny amin’ny andian’ondrin’ny namanao?
(Olon-kafa)
8Raha tsy fantatrao, ry tsara tarehy indrindra amin’ny vehivavy,
dia mandehana araho ny dian’ny andian’ondry aman’osy,
ary andraso eny amin’ny tranolain’ny mpiandry ondry ny zanak’osinao.
(Ralehilahy)
9Rahavako, ianao dia ampitahaiko
amin’ny soavalivaviko mitarika ny kalesy fitondran’i Farao miady.
10Mahatsara ny tarehinao ireo voahangy voatohy;
manendrika ny vozonao ireo rojo feno perla.
11Rojo volamena mitohitohy volafotsy kiboribory
no ampiambozonanay anao.
(Ravehivavy)
12Raha eo amin’ny latabany ny mpanjaka
dia mamerovero tsara ny nardako.
13Amiko, ny malalako dia miora iray fehezana madinika
mandry eo an-tratrako.
14Amiko, ny malalako dia salohim-boninkazo
any an-tanim-boalobok’i Eny-Gedỳ.
(Ralehilahy)
15Indro, tsara tarehy ianao, Rahavako;
indro, tsara tarehy ianao;
toy ny an’ny voromailala ny masonao.
(Ravehivavy)
16Indro, tsara tarehy koa ianao, ry malalako,
eny, mahafinaritra ianao;
ahi-maitso no fandrianantsika.
17Hazo sedera ny sakamandimbin’ny tranontsika,
ary hazo kipreso ny valindrihantsika.
Currently Selected:
Tononkiran’i Solomona 1: MRV
Highlight
Share
Copy
Want to have your highlights saved across all your devices? Sign up or sign in
© La Société Biblique Malgache 2011
