Lioka INDRAY MIJERY
INDRAY MIJERY
Mpanoratra tantara i Lioka ary efa nanao fikarohana lalina sy fanadihadiana vao nametraka an-tsoratra ny tiany horaketina momba an’i Jesosy ao amin’ny Filazantsarany. Ity no boky voalohany nosoratany ary ny Asan’ny Apostoly no faharoa. Namana mpiara-miasa tamin’i Paoly izy ary mpitsabo. Tsy Jiosy izy fa Jentilisa satria Grika, ary mahafehy tsara ny teny grika, araka izany.
Heverin’ny mpandinika fa manodidina, na taorianan’ny fotoana nigadran’i Paoly tany Roma, no nanoratan’i Lioka ny bokiny roa, izany hoe taorianan’ny taona 64.
I Teofilo no voalazan’i Lioka eo amin’ny fiandohan’ny bokiny fa andefasany ny asa soratra nataony, na ato amin’ny Filazantsara mitondra ny anarany izany na ao amin’ny Asan’ny Apostoly. «Tia an’Andriamanitra» no hevitr’io anarana Teofilo io. Tsy ho an’i Teofilo ihany anefa ny Boky fa miantefa koa amin’ny olon-kafa, indrindra ny tsy Jiosy. Izany no mahatonga an’i Lioka hanome fanazavana ny amin’ny jeografian’i Palestina sy ny fomban’ny Jiosy.
Ny votoatin’ny Boky
Maromaro ihany ireo lohahevitra izay tsy hita afa-tsy ato amin’ny Filazantsara araka an’i Lioka ka mampiavaka azy, toy ny fijereny manokana ny olona voailikilika teo amin’ny fiarahamonina tamin’izany fotoana izany: Ny vehivavy, ny Samaritana, ny mahantra.
Anisan’ny fotokevi-dehibe mivohitra ato amin’ny Filazantsara araka an’i Lioka ny amin’ny Fanahy Masina, ny vavaka, ny famelan-keloka ary ny fibebahana.
Manomboka ao Jerosalema ary mifarana ao Jerosalema ny fizotran’ny tantara.
Ny firafitry ny Boky
I Jaona Mpanao Batisa sy Jesosy: 1.5–4.13
Ny asan’i Jesosy tany Galilia: 4.14–9.50
Jesosy niakatra farany ho any Jerosalema: 9.51–19.27
Jesosy tao Jerosalema sy ny fahafatesany: 19.28–23.56
Jesosy tafatsangana tamin’ny maty: 24
Currently Selected:
Lioka INDRAY MIJERY: MRV
Highlight
Share
Copy
Want to have your highlights saved across all your devices? Sign up or sign in
© La Société Biblique Malgache 2011