Josoa 2

Ny nanirahan’i Josoa ny mpisafo tany roa lahy ho any Jeriko

1Ary naniraka mangingina mpisafo tany roa lahy avy tany Sitima i Josoa, zanak’i Nona, ka niteny taminy hoe: Mandehana zahao ny tany, indrindra fa i Jeriko. Dia niainga izy roa lahy ary niditra tao an-tranon’ny vehivavy janga iray antsoina hoe Rahaba ka nandry tao. 2Ary nisy nilaza tamin’ny mpanjakan’i Jeriko hoe: Injao, misy olona avy tamin’ny Zanak’Israely tonga atỳ izao alina izao hisafo ny tany. 3Dia nandefa iraka tao amin’i Rahaba ny mpanjakan’i Jeriko hiteny hoe: Avoahy ireo lehilahy tonga ato an-tranonao ireo fa hisafo ny tany manontolo no niaviany. 4Nalain-dRavehivavy anefa izy roa lahy ka nafeniny ary hoy izy: Tonga tatỳ amiko ihany tokoa ireny lehilahy ireny nefa tsy fantatro hoe avy aiza izy. 5Rehefa maizina ny andro ary hohidina ny vavahady dia lasa nandeha izy ka tsy fantatro indray izay nalehany. Enjeho haingana izy fa ho tratranareo. 6Kanjo efa nampiakarin-dRavehivavy tany an-tampon-trano* izy ireo ka nafeniny tao amin’ny tahon-drongony izay nalahany teo an-tampon-trano. 7Ary ireo olona dia nanenjika azy tamin’ny lalana mankany Jordana hatrany amin’ny fitàna. Ary rehefa lasa nandeha izay nanenjika azy dia nohidina ny vavahady.

8Raha mbola tsy natory izy roa lahy dia niakatra nankao aminy tao an-tampon-trano Ravehivavy 9ka niteny taminy hoe: Fantatro fa efa nomen’NY TOMPO anareo ny tany, koa efa mahazo anay ny tahotra anareo sady ketraka ny mponina rehetra amin’ny tany noho ny tahotra anareo. 10Fa efa renay ny nanamainan’NY TOMPO ny Ranomasina Mena teo anoloanareo tamin’ny nivoahanareo avy tany Ejipta; renay koa izay nataonareo tamin’ny mpanjaka Amorita roa lahy izay tany andafin’i Jordana, dia i Sihona sy i Oga, izay nataonareo ho toy ny zavatra voaozona. 11Ny fandrenesanay ireo dia nahaketraka ny fonay ka very hevitra avokoa izahay noho ny aminareo; fa NY TOMPO Andriamanitrareo, Izy no Andriamanitra any amin’ny lanitra ambony sy etỳ amin’ny tany ambany. 12Koa ankehitriny, miangavy anareo aho, mba ianiano amin’NY TOMPO, fa araka ny namindrako fo taminareo no mba hamindranareo fo amin’ny ankohonan’ny raiko kosa, koa omeo famantarana azo antoka aho 13fa hovelominareo ny raiko sy ny reniko mbamin’ny anadahiko sy ny rahavaviko ary izay rehetra mety ho azy; ary hamonjy ny ainay tsy ho faty ianareo. 14Dia hoy izy roa lahy taminy: Ny ainay no ho faty hisolo anareo raha tsy hambaranareo izao raharahanay izao. Raha omen’NY TOMPO anay ny tany dia hamindra fo sy hanao izay marina aminao izahay. 15Ary nampidina azy tamin’ny tady mahazaka avy teo amin’ny varavarankely Ravehivavy; fa teo amin’ny mandan’ny tanàna ny tranony ary teo amin’ny manda no nitoerany. 16Dia hoy Ravehivavy tamin’izy roa lahy: Mandehana any an-tendrombohitra fandrao hifanena amin’ny mpanenjika ianareo ka miere any mandritra ny hateloana mandra-piveriny. Rehefa afaka izany, vao manohy ny dia amin’izay halehanareo ianareo. 17Ary hoy izy roa lahy taminy: Izao no tsy hanananay tsiny ny amin’izany fianianana nampianianinao anay izany: 18Indro, rehefa tonga eto amin’ny tany izahay dia hafehinao eo amin’ny varavarankely izay nampidinanao anay io tady kely jaky io dia hovorinao ho ao an-tranonao ny rainao sy ny reninao ary ny anadahinao mbamin’ny ankohonan’ny rainao rehetra; 19ary izay rehetra mivoaka avy eo am-baravaran’ny tranonao ho eny ivelany dia ho eo an-dohany ihany ny rany ary izahay dia tsy hanan-tsiny; fa izay rehetra mitoetra ao aminao ao an-trano kosa dia ho eo an-dohanay ny rany raha toa ka misy olona mikasi-tanana azy; 20fa raha toa ka hambarambaranao kosa izao raharahanay izao dia ho afaka amin’ny fianianana izay nampianianinao anay izahay. 21Dia hoy Ravehivavy: Eny ary fa marina izany. Dia nampandehaniny izy roa lahy ka lasa nandeha; dia nafehiny teo amin’ny varavarankely ilay tady kely jaky.

22Dia nandeha izy roa lahy ka nankany an-tendrombohitra ary nitoetra tany hateloana mandra-piverin’ny mpanenjika; nitady azy tamin’ny lalana rehetra ny mpanenjika nefa tsy nahita. 23Dia niverina izy roa lahy ka nidina avy tany an-tendrombohitra dia nita ny ony ary nankany amin’i Josoa, zanak’i Nona, ka nilaza ny zavatra rehetra izay nihatra taminy. 24Hoy izy ireo tamin’i Josoa: Efa natolotry NY TOMPO eo an-tanantsika tokoa ny tany rehetra; ary ketraka noho ny tahotra antsika ny mponina rehetra amin’ny tany.

Currently Selected:

Josoa 2: MRV

Highlight

Copy