Isaia 56
56
FIZARANA FAHATELO
Trano fivavahana ho an’ny firenena rehetra
1Izao no lazain’NY TOMPO:
Tandremo ny rariny
ary manaova ny marina,
fa efa madiva ho tonga ny famonjeko
ary efa hiseho ny fahamarinako.
2Sambatra ny zanak’olombelona izay manao izany,
ary ny zanak’olona izay mitana izany,
dia izay mitandrina ny Sabata
ka tsy manamavo azy
sady miaro ny tanany tsy hanao izay ratsy akory.
3Aoka ny hafa firenena izay efa manaiky ho an’NY TOMPO tsy hiteny hoe:
Hesorin’NY TOMPO tsy ho isan’ny olony tokoa aho;
ary aoka ny ionòka* tsy hiteny hoe:
Indro, hazo maina aho!
4Fa izao no lazain’NY TOMPO:
Ny amin’ny ionòka izay mitandrina ny Sabatako
sy mifidy izay sitrako
ary mitana ny fanekeko,
5dia hanaovako fahatsiarovana sy anarana
ao an-tranoko sy ao anatin’ny mandako izy,
izay tsara lavitra noho ny an’ny zanakalahy sy ny zanakavavy;
fa anarana mandrakizay izay tsy hesorina no homeko azy.
6Ary ny hafa firenena izay manaiky ho an’NY TOMPO
mba hanompo Azy
sy ho tia ny anaran’NY TOMPO
mba ho mpanompony,
dia izay rehetra mitandrina ny Sabata
ka tsy manamavo azy
sady mitana ny fanekeko,
7dia hoentiko ho any amin’ny tendrombohitro masina
ka hampifaliako ao amin’ny tranoko fivavahana;
ny fanatitra dorana manontolo atolony sy ny fanatiny hafa alatsa-dra
dia hankasitrahana eo ambonin’ny alitarako,
satria ny tranoko hatao hoe
Trano fivavahana ho an’ny firenena rehetra.
8Izao no lazain’NY TOMPO Andriamanitra
izay mamory ny Israely voaroaka:
Mbola hamory ny sasany ho eo aminy koa Aho,
hanampy izay efa voavory ao.
Mpitarika tsy mendrika
9E, ianareo bibidia rehetra, avia hihinana,
dia ianareo biby rehetra any an’ala!
10Jamba avokoa ny mpitiliny,
samy tsy mahalala izy rehetra,
amboa moana avokoa izy rehetra
ka tsy mahavovò;
manonofy izy,
eny, mandry ka tia torimaso.
11Lian-kanina ireny amboa ireny
ka tsy mahalala voky.
Ireny dia mpiandry
tsy mahafantatra na inona na inona.
Samy efa nivily ho amin’ny lalany avy izy rehetra,
samy mankany amin’ny tombontsoany avokoa izy rehetra.
12Avia, ianareo, hoy izy ireny, fa haka divay aho,
aoka hiboboka toaka isika!
Rahampitso dia ho tahaka ny anio ihany no hataontsika,
fa mbola be dia be ny sisa tavela ao!
Currently Selected:
Isaia 56: MRV
Highlight
Share
Copy
Want to have your highlights saved across all your devices? Sign up or sign in
© La Société Biblique Malgache 2011
