Ezekiela 32

Fitomaniana noho ny nanjo an’i Farao sy i Ejipta

1Tamin’ny andro voalohany tamin’ny volana faharoa amby folo, tamin’ny taona faharoa amby folo dia tonga tamiko ny tenin’NY TOMPO hoe:

2Ry zanak’olona*, manaova hira fahalahelovana ny amin’i Farao mpanjakan’i Ejipta ka lazao aminy hoe: Nanao ny tenanao ho tahaka ny liona tanora tamin’ny firenena ianao,

kanjo tahaka ny dragona ao anatin’ny ranomasina;

nitsoriaka teny amin’ny oninao ianao

dia nanakobankobana ny rano tamin’ny tongotrao

ka nahaloto ny ony.

3Izao no lazain’NY TOMPO Andriamanitra:

Ny firenena betsaka tafatambatra

no hoentiko mamelatra ny haratoko aminao

ary hakarin’ireny amin’ny haratoko ianao.

4Hatsipiko eny an-tanety ianao

ary hariako any an-tsaha,

dia hampitangoroniko eo aminao ny voromanidina rehetra

ka homeko hivokisan’ny bibidia rehetra ny tenanao.

5Haeliko eny an-tendrombohitra ny nofonao

ary hofenoiko ny tenabenao ny lohasaha.

6Hataoko safotry ny ranao ny tany,

hatramin’ny tendrombohitra aza;

ary ho feno anao ny ony.

7Rehefa vonoiko ny fahazavanao

dia hosaronako ny lanitra;

hotafiako lamba fisaonana ny kintany;

ny masoandro dia hotakonako rahona

ary ny volana dia tsy hangarangarana.

8Eny, noho ny aminao dia hotafiako lamba fisaonana avokoa

ireny fanazavana eny amin’ny lanitra ireny

ary hosaronako haizina ny taninao,

hoy NY TOMPO Andriamanitra.

9Hataoko sosotra ny fon’ny firenena maro rehefa ampandrenesiko ny firenena maro ny naharavanao, dia ny amin’ny tany izay tsy fantatrao. 10Eny, hataoko talanjona anao ny firenena maro, ary hipararetra noho ny aminao ny mpanjakany, rehefa asidiko eo imasony ny sabatro, ary samy hangovitra lalandava noho ny ainy izy amin’ny andro haharavanao.

11Fa izao no lazain’NY TOMPO Andriamanitra: Ny sabatry ny mpanjakan’i Babilona dia ho tonga aminao.

12Ny sabatry ny mahery izay samy masiaka indrindra amin’ny firenena,

no hoentiko mandavo ny vahoakanao marobe,

dia horavany ny reharehan’i Ejipta

ka ho fongotra ny vahoakany marobe rehetra.

13Haringako koa ny biby fiompiny rehetra

eny amoron’ny ranobe,

ary tsy hanakobankobana azy intsony ny tongotry ny olona

na handoto azy ny kitron’ny biby fiompy.

14Dia hampandriako ny ranony

ka hampandehaniko toy ny diloilo ny oniny,

hoy NY TOMPO Andriamanitra,

15Rehefa ataoko lao ny tany Ejipta

ka hofoanako amin’ny tany izay rehetra nahafeno azy teo;

haringako ny monina rehetra ao aminy,

dia ho fantatra fa Izaho no TOMPO.

16Izany no hira fahalahelovana hataon’ny olona. Ny zanakavavin’ny firenena no hihira izany; eny, ho fisaonana an’i Ejipta sy ny vahoakany marobe rehetra no hihirany izany, hoy NY TOMPO Andriamanitra.

Fitomaniana ny amin’ireo firenena manodidina

17Tamin’ny andro fahadimy amby folo tamin’ny volana, tamin’ny taona faharoa amby folo dia tonga tamiko ny tenin’NY TOMPO hoe:

18Ry zanak’olona, isaony ny vahoaka maroben’i Ejipta, ary ampidino izy mbamin’ny zanakavavin’ny firenena malaza

ho any ambanin’ny tany,

miaraka amin’izay midina any an-davaka!

19Mihoatra noho ny an’iza moa ny hatsaran-tarehinao?

Midìna ka mandria miaraka amin’izay tsy voafora!

20Any amin’ny voatrabaky ny sabatra no hiampatramparany;

ny sabatra dia efa voatolotra:

Tariho i Ejipta mbamin’ny vahoakany marobe rehetra!

21Izy sy ny nanampy azy no resahin’ireo malaza amin’ny lehilahy mahery

any amin’ny fitoeran’ny maty*:

Tafidina ka miampatra ny tsy voafora,

dia ireo voatrabaky ny sabatra.

22Ao koa i Asiria mbamin’ny vahoakany marobe rehetra;

manodidina azy ny fasany;

voatrabaka izy rehetra,

samy lavon’ny sabatra.

23Natao any amin’ny lavaka farany ambany ny fasany,

ary ny vahoakany marobe dia manodidina ny fasany;

voatrabaka izy rehetra,

samy lavon’ny sabatra,

dia ireo izay nahatonga tahotra tany amin’ny tanin’ny velona.

24Ao koa i Elama mbamin’ny vahoakany marobe rehetra

manodidina ny fasany;

voatrabaka izy rehetra,

samy lavon’ny sabatra

ka tafidina tsy voafora

ho any ambanin’ny tany,

dia ireo nahatonga ny fahatahorana azy tany amin’ny tanin’ny velona,

samy mitondra henatra

miaraka amin’izay midina any an-davaka.

25Teo amin’ny voatrabaka no nanaovana fandriana ho azy

mbamin’ny vahoakany marobe rehetra;

manodidina azy ny fasany,

izy rehetra dia samy tsy voafora sady voatrabaky ny sabatra

satria niely tany amin’ny tanin’ny velona ny fahatahorana azy,

ary samy mitondra henatra miaraka amin’izay midina any an-davaka izy;

teo amin’ny voatrabaka no nametrahany azy.

26Ao koa i Meseka, i Tobala mbamin’ny vahoakany marobe rehetra;

manodidina azy ny fasany;

samy tsy voafora izy rehetra sady voatrabaky ny sabatra,

satria nahatonga ny fahatahorana azy tany amin’ny tanin’ny velona izy.

27Tsy hiara-mandry amin’ny lehilahy mahery

izay lavo isan’ny tsy voafora izy,

dia ireo tafidina any amin’ny fitoeran’ny maty

ka mitondra ny fiadiany,

sady voapetraka eo ambanin’ny lohany ny sabany,

ary ao amin’ny taolany ny helony

satria nampahatahotra ny mahery tany amin’ny tanin’ny velona izy.

28Eny, ianao dia haripaka eo amin’ny tsy voafora

ka hiara-miampatra amin’ny voatrabaky ny sabatra!

29Ao koa i Edoma mbamin’ny mpanjakany sy ny mpitarika rehetra tao aminy, izay natao ao amin’ny voatrabaky ny sabatra na dia be aza ny heriny; miara-miampatra amin’ny tsy voafora izy, sy amin’izay midina any an-davaka. 30Ao koa ireo mpanapaka ny any avaratra rehetra sy ny Sidoniana rehetra izay niara-nidina tamin’ny voatrabaka; menatra izy, na dia efa natahorana noho ny heriny aza; miampatra ny tsy voafora miaraka amin’izay voatrabaky ny sabatra ka mitondra henatra miaraka amin’izay midina any an-davaka.

31Ireny dia ho hitan’i Farao ka hionona ny amin’ny vahoakany marobe izy. Voatrabaky ny sabatra i Farao mbamin’ny miaramilany rehetra, hoy NY TOMPO Andriamanitra.

32Fa efa nahatonga ny fahatahorana Ahy any amin’ny tanin’ny velona Aho; ary i Farao dia hampandriana any amin’ny tsy voafora, miaraka amin’ireo voatrabaky ny sabatra, dia i Farao mbamin’ny vahoakany marobe rehetra, hoy NY TOMPO Andriamanitra.

Currently Selected:

Ezekiela 32: MRV

Highlight

Copy