Mpitoriteny 11
11
Ny fahasahiana hanao zavatra
1Atsipazo eny ambonin’ny rano ny mofonao
fa ho hitanao ihany izy rehefa ela.
2Samy omeo anjara ny fito, eny, na ny valo aza,
fa tsy fantatrao izay fahoriana hanjo etỳ ambonin’ny tany.
3Rehefa feno ranonorana ny rahona
dia arotsany amin’ny tany izany;
ary na mianjera mianatsimo ny hazo na mianavaratra,
dia eo amin’izay ianjerany ihany no handriany.
4Izay fatra-pihevitra ny rivotra dia tsy mba hamafy
ary izay manahy ny rahona dia tsy mba hijinja.
5Toy ny tsy ahafantaranao ny lalana alehan’ny rivotra, na ny amin’ny fitombon’ny taolana ao an-kibon’izay manana anaka, dia toy izany no tsy ahafantaranao ny asan’Andriamanitra, Mpanao ny zavatra rehetra.
6Amin’ny maraina dia afafazo ny voanao
ary amin’ny hariva dia aza atsahatra ny tananao;
fa tsy fantatrao izay ho vanona, na itsỳ, na irỳ,
na angamba samy ho vanona avokoa izy roa tonta.
Mahaiza manararaotra ny fiainana amim-pahendrena
7Mamy tokoa ny mazava
ary mahafinaritra ny maso ny mijery ny masoandro;
8fa raha ela velona ny olona
dia aoka ho faly amin’ny androny rehetra
ary aoka izy hahatsiaro fa ho maro ny andro maizina.
Zava-poana avokoa izay rehetra ho avy.
9Mifalia, ry zatovo, dieny mbola tanora ianao;
ary aoka ny fonao hampifalifaly anao amin’ny andron’ny fahatanoranao,
koa mandehana any amin’izay sitraky ny fonao sy izay jeren’ny masonao;
nefa aoka ho fantatrao fa hoentin’Andriamanitra hotsaraina ianao amin’izany rehetra izany.
10Koa esory ao am-ponao ny alahelo
ary avilio tsy hikasika ny nofonao ny ratsy;
fa ny fahatanorana sy ny fahatanjahana dia samy zava-poana.
Currently Selected:
Mpitoriteny 11: MRV
Highlight
Share
Copy
Want to have your highlights saved across all your devices? Sign up or sign in
© La Société Biblique Malgache 2011
