Deoteronomia 24

Ny vady nisaorana

1Raha misy lehilahy maka vady ka mampakatra azy, ary tsy tiany intsony Ravehivavy noho ny nahitany fahalotoana teo aminy, dia aoka hanoratra taratasy fisaoram-bady ho an-dRavehivavy izy ka hanolotra izany eo an-tanany ary hampiala azy ao an-tranony. 2Ary rehefa miala ao an-tranony Ravehivavy dia mahazo mandeha ka manambady olon-kafa. 3Ary raha tsy tia an-dRavehivavy ilay vao manambady azy ka manoratra taratasy fisaoram-bady koa ary manolotra izany eo an-tanany ka mampiala azy ao an-tranony, na maty ilay nanambady azy taoriana, 4dia tsy mahazo manambady azy intsony ilay nanambady azy taloha izay nisaraka taminy, rehefa voaloto izy; fa fahavetavetana eo imason’NY TOMPO izany; aza mampiditra heloka amin’ny tany izay omen’NY TOMPO Andriamanitrao ho lovanao.

Ny mpivady vao

5Raha misy lehilahy vao nampaka-bady dia tsy handeha hiantafika izy, ary tsy hampanaovina fanompoana akory fa havela hitoetra ao an-tranony herintaona ka hampifaly ny vadiny izay vao nampakariny.

Ny amin’ny antoka

6Aoka tsy hisy olona haka fikosoham-bary ho antoka, na ny vatony ambony ihany aza; fa maka ny aina ho antoka izany.

Fakàna olona an-keriny

7Raha misy olona tratra mangalatra ny iray amin’ny Zanak’Israely rahalahiny ka manandevo azy na mivarotra azy dia hovonoina izany mpangalatra izany. Hofongoranao tsy ho eo aminao ny fanao ratsy.

Ny amin’ny habokana

8Mitandrema ny amin’ny habokana ka araho tsara izay rehetra hatoron’ny levita* mpisorona anareo; araka izay nandidiako azy no hotandremanareo harahina. 9Tsarovy izay nataon’NY TOMPO Andriamanitrao tamin’i Miriama teny an-dalana tamin’ny nivoahanareo avy tany Ejipta.

Ny amin’ny antoka ihany

10Raha mampisambotra zavatra ny namanao ianao dia aza miditra ao an-tranony handray ny antoka avy aminy. 11Mijanòna eo alatrano, ary ny lehilahy izay nampisamborinao no hamoaka ny antoka ho aminao eo alatrano. 12Ary raha mahantra Ralehilahy dia aza tananao miloaka alina ny antoka, 13fa tsy maintsy haverinao aminy rehefa tokony ho maty masoandro, mba hirakofany ny lambany ka hisaorany anao; dia ho fahamarinana ho anao eo anatrehan’NY TOMPO Andriamanitrao izany.

Fanajana ny mpikarama

14Aza manao fitondrana hafahafa amin’ny mpikarama mahantra sy sahirana, na rahalahinao na vahiny ao amin’ny taninao sy ao an-tanànanao. 15Fa amin’ny andro iasany ihany no hanomezanao azy ny karamany, raha mbola tsy milentika ny masoandro, fa mahantra izy ka izany no irin’ny fony; fandrao hitaraina amin’NY TOMPO noho ny nataonao izy, dia ho fahotana ho anao izany.

Ny andraikitry ny tsirairay

16Ny ray dia tsy hovonoina amin’ny ataon’ny zanany, ary ny zanaka dia tsy hovonoina amin’ny ataon’ny rainy; fa samy hovonoina amin’ny fahotany avy ihany ny olona.

Fepetra ho fanasoavana ny mahantra

17Aza manao fitsarana miangatra amin’ny vahiny sy ny kamboty; ary aza maka ny fitafian’ny mpitondratena ho antoka. 18Tsarovy fa andevo tany Ejipta ianao, ary NY TOMPO Andriamanitrao no nanavotra anao ho afaka tany; koa izany no andidiako anao hanatanteraka ireo zavatra ireo.

19Raha mijinja ny varinao any an-tsaha ianao ka misy amboara hadinonao any dia aza miverina haka azy fa aoka ho an’ny vahiny sy ny kamboty ary ny mpitondratena izany; mba hotahìn’NY TOMPO Andriamanitrao ianao amin’ny asa rehetra ataon’ny tananao. 20Raha manintsana ny hazo olivanao ianao dia aza miverina hitsimpona izay sisa; fa aoka ho an’ny vahiny sy ny kamboty ary ny mpitondratena izany. 21Raha mioty ny voalobokao ianao dia aza miverina hitsimpona izay sisa fa aoka ho an’ny vahiny sy ny kamboty ary ny mpitondratena izany. 22Tsarovy fa andevo tany amin’ny tany Ejipta ianao; koa izany no andidiako anao ireo zavatra ireo.

Currently Selected:

Deoteronomia 24: MRV

Highlight

Copy