Deoteronomia 15

Fanafahan-trosa isaky ny fito taona

1Isaky ny fito taona dia manaova fanafahan-trosa ianao. 2Toy izao no fomban’ny fanafahan-trosa: Hamoy ny trosany rehetra ny tompon-trosa rehetra izay nampindram-bola tamin’ny namany; tsy hanery ny namany, izay rahalahiny handoa azy, satria antsoina hoe Fanafahan’NY TOMPO izany. 3Ny olona hafa firenena ihany no azonao enjehina; fa izay anao any amin’ny rahalahinao kosa dia hafoinao; 4kanefa tsy dia hisy mahantra eo aminao, fa hitahy anao tokoa NY TOMPO eo amin’ny tany izay omen’NY TOMPO Andriamanitrao ho lovanao, 5raha mihaino tsara ny feon’NY TOMPO Andriamanitrao ianao ka mitandrina hanaraka ireo lalàna rehetra ireo, izay andidiako anao anio. 6Fa hitahy anao NY TOMPO Andriamanitrao araka izay nolazainy taminao; hampisambotra vola ny firenena maro ianao fa ianao kosa dia tsy hisambotra; ary hifehy firenena maro ianao fa ireny kosa dia tsy mba hifehy anao.

7Raha misy mahantra ny rahalahinao ao an-tanànanao iray, amin’ny taninao izay omen’NY TOMPO Andriamanitrao anao, dia aza manamafy ny fonao, na manakombona ny tananao amin’ny rahalahinao mahantra; 8fa sokafy tsara aminy ny tananao ka ampisambory izay ilainy izy, araka izay mahory azy. 9Mitandrema anefa, fandrao hisy hevi-dratsy ao am-ponao milaza hoe: Antomotra ny taona fahafito, dia ny taom-panafahana; ary ho ratsy fijery ny rahalahinao mahantra ianao ka tsy hanome azy akory; dia hitaraina amin’NY TOMPO hiampanga anao izy ka ho fahotanao izany. 10Omeo tokoa izy, ary aoka tsy halahelo ny fonao raha manome azy, satria izany zavatra izany no hitahin’NY TOMPO Andriamanitrao anao amin’ny asanao rehetra sy amin’izay rehetra ataon’ny tananao. 11Fa ny tany dia tsy ilaozan’izay olo-mahantra, koa izany no andidiako anao hoe: Sokafy tsara amin’ny rahalahinao ny tananao, dia amin’ny malahelo sy ny mahantra eo amin’ny taninao.

Famotsorana ny andevo hebreo

12Raha namidy taminao ny namanao, na lehilahy, na vehivavy hebreo, ka efa nanompo anao enin-taona, dia hovotsoranao ho afaka izy amin’ny taona fahafito. 13Ary rehefa votsoranao ho afaka izy dia tsy havelanao handeha tanam-polo; 14fa hisy hampitondrainao azy avy amin’ny ondry aman’osinao sy avy amin’ny famoloananao ary avy amin’ny famiazanao; araka izay efa nitahin’NY TOMPO Andriamanitrao anao no hanomezanao azy. 15Tsarovy fa andevo tany amin’ny tany Ejipta ianao nefa nanavotra anao NY TOMPO Andriamanitrao, koa izany no andidiako anao izao zavatra izao anio. 16Kanefa raha hoy izy aminao: Tsy hiala aminao aho, satria tsy foiny ianao sy ny ankohonanao fa finaritra aminao izy, 17dia halainao ny fanjaibe ka hotevehinao amin’ny varavarana ny sofiny dia ho mpanomponao mandrakizay izy. Ary toy izany koa no hataonao amin’ny mpanompovavinao. 18Aza ataonao ho sarotra aminao ny hamotsotra azy ho afaka, fa indroa toraka ny karaman’ny mpikarama no azonao tamin’ny nanompoany anao enin-taona; dia hitahy anao NY TOMPO Andriamanitrao amin’izay rehetra ataonao.

Ny voalohan-teraka atokana ho an’Andriamanitra

19Ny lahy rehetra amin’ny voalohan-teraky ny ombinao sy ny ondry aman’osinao dia hohamasininao ho an’NY TOMPO Andriamanitrao; aza mampiasa ny voalohan-teraky ny ombinao, na manety ny voalohan-teraky ny ondry aman’osinao. 20Eo anatrehan’NY TOMPO Andriamanitrao no hihinananao sy ny ankohonanao azy isan-taona isan-taona eo amin’ny fitoerana izay hofidin’NY TOMPO. 21Fa raha manan-kilema izy, na mandringa, na jamba, na izay kilema ratsy hafa, dia aza vonoinao ho fanatitra ho an’NY TOMPO Andriamanitrao ireny, 22fa ao an-tanànanao ihany no hihinananao ireny; na ny olona tsy madio na ny madio dia samy mahazo mihinana azy, tahaka ny ahazoany mihinana ny gazela sy ny diera. 23Kanefa ny rany no aza hanina, fa aidino amin’ny tany toy ny rano.

Currently Selected:

Deoteronomia 15: MRV

Highlight

Copy