2Korintiana 11

Paoly apostoly, ilay apostoly tena izy

1Enga anie ka mba handefitra amiko amin’ny hadalana kely ianareo, eny mandefera amiko ianareo! 2Fa fahasaro-piaro araka an’Andriamanitra no mahasaro-piaro ahy aminareo; fa nataoko fofombadin’ny lehilahy iray ianareo, mba hatolotro tahaka ny virijiny madio ho an’i Kristy*. 3Fa matahotra aho, fandrao ho simba hiala amin’ny fahatsoram-po sy ny fahadiovana amin’i Kristy ny sainareo, tahaka ny namitahan’ny menarana an’i Eva tamin’ny hafetseny. 4Fa raha misy olona tonga ka mitory Jesosy hafa izay tsy notorinay, na mandray fanahy hafa na Filazantsara hafa noho izay noraisinareo, dia mandefitra amin’izany ianareo.

5Fa ataoko fa tsy misy mahalatsa-danja ahy noho ireo Apostoly malaza ireo. 6Fa na dia olona tsy nampianarina handaha-teny aza aho dia tsy mba tahaka izany aho amin’ny fahalalana; fa tamin’ny zavatra rehetra dia efa nasehonay marimarina tamin’ny olona rehetra izany.

7Diso va aho raha nanetry tena mba hisandratanareo ka nitory maimaimpoana ny Filazantsaran’Andriamanitra taminareo? 8Namabo ny fiangonana#11.8 Na: eklesia. sasany aho ka nandray karama hanompoako anareo. 9Fa raha teo aminareo aho ka azon’ny tsy fahampiana dia tsy mba nahavaky tratra olona aho; fa ny rahalahy izay tonga avy tany Makedonia no nanome ahy izay nilaiko; ary tamin’ny zavatra rehetra dia nitandrina tsara izay tsy hahavaky tratra anareo aho sady mbola hitandrina izany ihany. 10Raha ato anatiko koa ny fahamarinan’i Kristy dia tsy hisy hahafoana izany reharehako izany any amin’ny tany Akaia. 11Nahoana? Satria tsy tiako va ianareo? Andriamanitra no mahalala.

12Fa izay ataoko no mbola hataoko ihany mba tsy hahafahan’ireo mitady antony hitovizany aminay. 13Fa apostoly sandoka izy ireny, mpiasa mamitaka, ka mampiova ny endriny ho tahaka ny apostolin’i Kristy. 14Ary tsy mahagaga izany, fa i Satana aza dia mampiova ny endriny ho tahaka ny anjelin’ny mazava. 15Koa tsy dia zava-dehibe ho an’ny mpanompony ny mampiova ny endriny ho tahaka ny mpanompon’ny fahamarinana. Nefa ny fiafaran’izy ireo dia ho araka ny asany ihany.

Ireo fijaliana niaretan’ny Apostoly

16Averiko indray: Aza misy milaza ahy ho adala; nefa, na dia misy milaza izany aza, raiso toy ny adala aho mba hireharehako kely koa. 17Izao lazaiko izao dia tsy lazaiko araka ny Tompo fa toa amin’ny fahadalana amin’izao fireharehana feno fahatokiana izao. 18Koa satria maro no mirehareha araka ny nofo dia mba hirehareha koa aho. 19Fa sitrakareo ny mandefitra amin’ny adala satria hendry angaha ianareo! 20Fa hay! Mandefitra ihany ianareo raha misy manandevo anareo, raha misy mandany ny fanananareo, raha misy misambotra anareo, raha misy manao fihetsika mihantsy anareo, raha misy mamely ny tavanareo. 21Manala baraka tena aho ka toa manaiky fa nalemy izahay!

Fa amin’izay mahasahy ny olona dia mba sahy koa aho; eny, miteny toy ny adala aho amin’izany. 22Hebreo va izy? Izaho koa. Israelita va izy? Izaho koa. Taranak’i Abrahama va izy? Izaho koa. 23Mpanompon’i Kristy* va izy? Miteny toy ny olona very saina aho, izaho koa dia mpanompon’i Kristy mihoatra noho izy ireo: Amin’ny fisasarana, manan-tombo; amin’ny tranomaizina, matetika kokoa; amin’ny kapoka be, efa izay tsy izy; misedra ny fahafatesana matetika. 24Indimy aho no nokapohin’ny Jiosy*, inefapolo latsaka iray avy. 25Intelo nokapohina tamin’ny hazo aho, indray maka notoraham-bato, intelo no vaky sambo, indray andro sy indray alina no nitoetra tao amin’ny lalina, 26nandeha matetika aho, saika nahita loza tamin’ny ony, saika nahita loza tamin’ny jiolahy, saika nahita loza tamin’ny tompon-tany namako, saika nahita loza tamin’ny Jentilisa*, saika nahita loza tao amin’ny tanàna, saika nahita loza tany an-tany efitra, saika nahita loza tany amin’ny ranomasina, saika nahita loza tamin’ny rahalahy sandoka, 27tamin’ny fisasarana sy ny fikelezana aina, tamin’ny tsy fahitan-tory matetika, tamin’ny hanoanana sy ny hetaheta, tamin’ny fifadian-kanina matetika, tamin’ny hatsiaka sy ny fitanjahana. 28Afa-tsy ireo zavatra ivelany dia mbola misy koa izay mahazo ahy isanandro, dia ny fiahiana ny fiangonana#11.28 Na: eklesia. rehetra. 29Iza no malemy ka tsy malemy aho? Iza no mahazo fanafintohinana ka tsy mirehitra anaty aho?

30Raha tsy maintsy mirehareha aho dia izay momba ny fahalemeko no hataoko rehareha. 31Andriamanitra, Rain’i Jesosy Tompo, izay isaorana mandrakizay, mahalala fa tsy mandainga aho. 32Tany Damaskosy ny governora notendren’i Areta mpanjaka dia nampiambina ny tanàna Damaskosy mba hisambotra ahy; 33fa avy teo amin’ny varavarankely eo amin’ny manda no nampidinana ahy tamin’ny sobika ka afa-nandositra ny tanany aho.

Currently Selected:

2Korintiana 11: MRV

Highlight

Copy