1Samoela 11

Ny nandresen’i Saoly ny Amonita

1Ary niakatra i Nahasy amonita ka nitoby tandrifin’i Jabesy-Gileada; dia hoy ny mponina rehetra tao Jabesy tamin’i Nahasy: Manaova fanekena aminay, dia hanompo anao izahay. 2Fa hoy i Nahasy amonita: Izao no hanaovako fanekena aminareo: Hopotsirina ny masonareo havanana rehetra ka hataoko fandatsana ny Israely rehetra izany. 3Nefa hoy ny loholon’i Jabesy taminy: Omeo hafitoana izahay mba hanirahanay olona ho any amin’ny tanin’ny Israely rehetra, koa raha toa tsy misy olona hamonjy anay dia handeha hanatona anao izahay. 4Dia tonga tany Gibean’i Saoly ny iraka ka nanambara ny teniny teo anatrehan’ny vahoaka; dia nanandratra ny feony ny vahoaka rehetra ka nitomany.

5Ary indro, tonga avy tany an-tsaha i Saoly, sady nandroaka omby no niteny hoe: Inona izato manjo ny olona no mitomany izy? Ary nambarany azy ny tenin’ny mponina tao Jabesy. 6Dia tonga tamin’i Saoly ny Fanahin’Andriamanitra teo am-pandrenesana izany teny izany ka nirehitra mafy ny hatezerany. 7Dia naka omby roa izy ka norasainy ireo ary nampitondrainy ny iraka ho any amin’ny faritry ny tanin’ny Israely rehetra ka hoy izy: Na iza na iza no tsy mandeha hanaraka an’i Saoly sy i Samoela dia tahaka ireny no hanaovana ny ombiny. Dia nahazo ny olona ny fahatahorana NY TOMPO ka nandeha toy ny olona iray izy. 8Ary nandamina azy tany Bezeka i Saoly. Telo hetsy no isan’ny Zanak’Israely ary telo alina no isan’ny lehilahin’ny Joda. 9Hoy i Saoly tamin’ny iraka izay tonga teo: Izao no holazainareo amin’ny mponina ao Jabesy-Gileada: Rahampitso, rehefa mafampana iny ny andro dia hisy famonjena ho anareo. Dia tonga ny iraka ka nanambara izany tamin’ny mponina tao Jabesy, dia faly ireo. 10Ary hoy ny mponina tao Jabesy: Rahampitso no hivoahanay ho eny aminareo ka hataonareo aminay izay rehetra sitrakareo.

11Nony maraina dia nozarain’i Saoly ho telo toko ny olona ka tonga teo amin’ny toby izy ireo tamin’ny fotoam-piambenana maraina, ary namely ny Amonita mandra-pahafampanan’ny andro. Izay sisa kosa dia niely patrana ka tsy nisy na dia olona roa aza tafaraka.

Ny nanamafisana ny maha mpanjaka an’i Saoly

12Hoy ny vahoaka tamin’i Samoela: Iza moa no niteny hoe: I Saoly va no hanjaka aminay? Atolory anay ireny olona ireny hovonoinay ho faty. 13Nefa hoy i Saoly: Tsy hisy olona hovonoina ho faty anio; fa androany no nanaovan’NY TOMPO famonjena teo amin’ny Israely. 14Ary hoy i Samoela tamin’ny vahoaka: Andeha isika hankany Gilgala hanamafy ny fanjakana any. 15Dia lasa nankany Gilgala ny vahoaka manontolo, ary tany Gilgala no nananganany an’i Saoly ho mpanjaka teo anatrehan’NY TOMPO; tany koa no nanolorany fanati-pihavanana teo anatrehan’NY TOMPO, dia nifaly indrindra teo i Saoly mbamin’ny lehilahin’ny Israely rehetra.

Currently Selected:

1Samoela 11: MRV

Highlight

Copy