1Mpanjaka 18

I Elia sy i Obadia

1Nony afaka andro maro dia tonga tamin’i Elia ny tenin’NY TOMPO, tamin’ny taona fahatelo hoe: Mandehana miseho amin’i Ahaba fa handatsaka ranonorana amin’ny tany Aho. 2Dia niainga i Elia hiseho amin’i Ahaba.

Mafy ny mosary tany Samaria. 3Ary niantso an’i Obadia, izay lehiben’ny tao an-dapany, i Ahaba. Fa i Obadia dia natahotra NY TOMPO tokoa, 4fa tamin’ny nandringanan’i Jezebela ny mpaminanin’NY TOMPO dia nalain’i Obadia ny mpaminany zato ka nafeniny, dimampolo avy no nataony tao amin’ny zohy iray, ary novelominy tamin’ny mofo sy rano ireo. 5Hoy i Ahaba tamin’i Obadia: Andeha mitety ny tany, hatrany amin’ny loharano rehetra sy hatrany amin’ny lohasahan-driaka rehetra; fa angamba hahita ahitra hamelomana ny soavaly sy ny ampondra isika ka mba tsy hisy hovonointsika ny biby fiompintsika. 6Dia nizara lalana izy ka i Ahaba dia nandeha irery tamin’ny lalana iray, ary i Obadia koa nandeha irery tamin’ny lalana iray hafa.

7Rehefa tany an-dalana i Obadia dia indro, nifanena taminy i Elia. Nahafantatra azy izy ka niankohoka sady niteny hoe: Hay ianao va ity, ry Elia tompoko? 8Ary hoy izy hoe: Eny, izaho ity. Andeha, lazao amin’ny tomponao hoe: Injao, atsy i Elia! 9Hoy anefa i Obadia: Inona no heloko, no anoloranao ny mpanomponao ho eo an-tanan’i Ahaba hamonoany ahy? 10Raha velona koa NY TOMPO Andriamanitrao, dia tsy misy firenena na fanjakana izay tsy nanirahan’ny tompoko hitady anao; ary raha hoy ny olona hoe: Tsy ato izy, dia nampianianiny izany firenena sy fanjakana izany fa tsy nahita anao tokoa izy ireo. 11Koa ankehitriny, hoy ianao: Andeha, lazao amin’ny tomponao hoe: Injao, atsy i Elia! 12Nefa raha vao miala eto aminao aho dia hoentin’ny Fanahin’NY TOMPO any amin’izay tsy fantatro ianao; koa raha tonga aho ka milaza amin’i Ahaba, nefa tsy ho hitany ianao tsinona, dia hovonoiny aho. Izaho mpanomponao anefa dia matahotra NY TOMPO hatry ny fahakeliny. 13Moa tsy nolazaina taminao va, tompoko, izay nataoko tamin’ilay namonoan’i Jezebela ny mpaminanin’NY TOMPO, dia ny nanafenako ny mpaminanin’NY TOMPO zato lahy, ka dimampolo avy no nataoko tao amin’ny zohy iray, ary novelomiko tamin’ny mofo sy rano ireo? 14Nefa ankehitriny, hoy ianao: Andeha, lazao amin’ny tomponao hoe: Injao, atsy i Elia! Dia hamono ahy i Ahaba! 15Hoy anefa i Elia: Raha velona koa Andriamanitra, Tompon’izao rehetra izao, izay tompoiko, dia hiseho amin’i Ahaba tokoa aho anio.

I Elia sy i Ahaba

16Dia lasa i Obadia nitsena an’i Ahaba ka nilaza taminy. Ary nandeha hitsena an’i Elia i Ahaba. 17Nony hitan’i Ahaba i Elia dia hoy izy taminy: Hay! Tonga etỳ ianao, ry ilay mpampidi-doza amin’ny Israely! 18Hoy anefa i Elia: Tsy izaho no nampidi-doza tamin’ny Israely fa ianao sy ny mpianakavin’ny rainao ihany, tamin’ny nandaozanareo ny didin’NY TOMPO sy ny nanarahanao ireo Baala*. 19Koa ankehitriny, maniraha olona hamory ny Israely rehetra hihaona amiko any an-tendrombohitra Karmela, ary vorio any koa ny mpaminanin’ireo Baala dimampolo sy efajato sy ireo mpaminanin’ny Aseraha* efajato, izay mihinana eo amin’ny latabatr’i Jezebela.

I Elia sy ireo mpaminanin’ny Baala tao Karmela

20Dia nandefa iraka tany amin’ny Zanak’Israely rehetra i Ahaba ka namory ny mpaminany ho any amin’ny tendrombohitra Karmela. 21Ary nanatona ny vahoaka rehetra i Elia ka niteny hoe: Mandra-pahoviana no hiroa saina ianareo? Raha NY TOMPO no Andriamanitra, manaraha Azy! Fa raha ny Baala* kosa dia manaraha azy! Nefa tsy namaly azy ny olona na dia indraimbava aza. 22Dia hoy i Elia tamin’ny olona: Izaho dia izaho irery ihany no sisa amin’ny mpaminanin’NY TOMPO; fa ny mpaminanin’ny Baala kosa dia dimampolo sy efajato lahy. 23Koa aoka ireo no hanome vantotra ombilahy roa; ary aoka izy no hifidy ny iray, dia handrasa azy ka hametraka azy eo ambonin’ny kitay hazo, nefa tsy handrehetana afo; ary izaho kosa dia hanamboatra ny iray hafa ka hametraka azy eo ambonin’ny kitay hazo, nefa tsy handrehetana afo koa. 24Dia miantsoa ny anaran’ny andriamanitrareo ianareo, ary izaho kosa dia hiantso ny anaran’NY TOMPO. Izay andriamanitra mamaly amin’ny afo, Izy no Andriamanitra. Ary ny olona rehetra dia namaly hoe: Marina izany teny izany!

25Ary hoy i Elia tamin’ireo mpaminanin’ny Baala: Mifidiana vantotra ombilahy iray ho anareo ka manamboara aloha ianareo, satria ianareo no maro; ary miantsoa ny anaran’ny andriamanitrareo, nefa aza mandrehitra afo. 26Dia naka ny vantotra ombilahy izay nomena azy izy ireo ka nanamboatra azy, dia niantso ny anaran’ny Baala hatry ny maraina ka mandra-pitataovovonan’ny andro izy ireo ka niantso hoe: Ry Baala ô, henoy izahay! Kanjo tsy nisy feo na valinteny akory. Dia nihinjakinjaka teo anoloan’ny alitara izay nataony koa izy ireo. 27Nony nitataovovonana ny andro dia nanesoeso azy i Elia hoe: Miantsoa mafy ihany, fa andriamanitra izy! Angamba varian-dresaka izy, na mbola mivoaka, na mbola nisy nalehany, na angamba matory izy ka mila hofohazina! 28Dia niantso mafy indray ireo sady nitetika ny tenany tamin’ny sabatra sy ny lefona araka ny fanaony, hany ka loa-dra ny tenany. 29Ary na dia efa nihilana aza ny andro dia mbola naminany teo ihany ireo hatramin’ny fotoana fanolorana ny fanatitra, nefa tsy nisy feo na valinteny ary tsy nisy nihaino azy akory.

30Hoy amin’izay i Elia tamin’ny olona rehetra: Manatòna ahy! Dia nanatona azy ny olona rehetra. Namboatra ny alitaran’NY TOMPO izay rava aloha i Elia 31ka naka vato roa amby folo, araka ny isan’ny fokon’ny zanak’i Jakoba izay niavian’ilay tenin’NY TOMPO hoe: Israely no anaranao; 32ireo vato ireo dia nataony alitara ho an’ny anaran’NY TOMPO. Dia nanao hady kely manodidina ny alitara koa izy, izay mahalany rano indroan’ny vata famarana voa maina. 33Avy eo izy dia nandahatra ny kitay hazo sady nandrasa ny vantotra ombilahy ka nametraka azy teo ambonin’ny kitay hazo 34ary niteny hoe: Fenoy rano ny siny efatra ka aidino eo amin’ny fanatitra dorana manontolo sy eo amin’ny kitay hazo. Dia hoy koa izy: Ataovy indray mandeha koa izany. Dia nataon’izy ireo indray. Ary hoy indray izy: Mbola ataovy indray mandeha ihany koa izany. Dia nataon’izy ireo indray koa. 35Ary ny rano dia niraraka nanodidina ny alitara ka feno rano koa hatramin’ilay hady kely.

36Nony tamin’ny fotoana fanolorana ny fanatitra dia nanatona i Elia mpaminany ka niteny hoe: Ry TOMPO, Andriamanitr’i Abrahama sy Isaka ary Israely ô! Aoka ho fantatra anio fa Ianao no Andriamanitra amin’ny Israely, ary izaho no mpanomponao, ary araka ny teninao no nanaovako izao zavatra izao! 37Mihainoa ahy, mihainoa ahy, ry TOMPO ô, mba hahafantaran’ireto olona ireto fa Ianao TOMPO no Andriamanitra, ary Ianao no mampiverina ny fony indray!

38Dia nilatsaka ny afon’NY TOMPO ka nandevona ny fanatitra dorana manontolo sy ny kitay hazo mbamin’ny vato sy ny vovoka sady nandritra ny rano tao amin’ilay hady kely. 39Raha nahita izany ny olona rehetra dia niankohoka tamin’ny tany ary niteny hoe: NY TOMPO, Izy no Andriamanitra! NY TOMPO, Izy no Andriamanitra! 40Hoy i Elia tamin’izy ireo: Sambory ireo mpaminanin’ny Baala! Aza avela hisy afa-mandositra na dia iray akory aza! Dia nosamborin’ny olona izy ireo ary noentin’i Elia ho eo amin’ny ony Kisona ka novonoiny tany.

Mampandre ny hilatsahan’ny ranonorana indray i Elia

41Ary hoy i Elia tamin’i Ahaba: Miakara hihinana sy hisotro, fa ranonorambe izao misasasasa izao! 42Dia niakatra hihinana sy hisotro i Ahaba. Fa i Elia kosa dia niakatra ho eo an-tampon’i Karmela dia niankohoka tamin’ny tany, ary ny lohany nataony teo anelanelan’ny lohaliny. 43Hoy izy tamin’ny zatovony: Miakara kely ka tazano ny ranomasina! Dia niakatra izy ka nitazana ary nilaza hoe: Tsy misy na inona na inona. Impito i Elia no niteny taminy hoe: Miverena! 44Nony fanimpitony dia hoy ilay zatovo: Misy rahona kely ohatra ny felatanan’olona miakatra avy eny amin’ny ranomasina. Dia hoy i Elia: Miakara ka lazao amin’i Ahaba hoe: Amboary ny kalesinao ka midìna, fandrao voasakan’ny ranonorana ianao! 45Ary nihamaizina ny lanitra noho ny rahona sy ny rivotra ka nisy ranonorambe. Dia niakatra tamin’ny kalesy i Ahaba ka nankany Jezirela. 46Ary ny tanan’NY TOMPO dia tamin’i Elia ka nisikina izy ary nihazakazaka teo alohan’i Ahaba mandra-pahatongany tany Jezirela.

Currently Selected:

1Mpanjaka 18: MRV

Highlight

Copy