A Mark Sõng 4

A Zezi yelbũna

(Mt 13,1-9; Lk 8,4-8)

1 # Lk 5,1-3. A Zezi da leb n sɩnga neba zãmsgo mogra noore. Neb wʋsg ra tigma taab b sɛɛgẽ. La neba sẽn da ya wʋsg yĩnga, b kongame n kẽ koglg a ye pʋga, n ta ko sʋka. Nebã n pa tẽnga, mogra noore. 2A Zezi zãms-b la bũmb wʋsg ne yelbũna. B zãmsg pʋgẽ b ra yetame: 3«Kelg-y yelbũndi. Ned a ye n da yii n na n bʋd a pʋʋgo. 4A sẽn waa n bʋtẽ, bõn-buud kẽer dʋʋga sora noore la luiili wẽneg n dɩgs-b la zãnga. 5Kẽer lʋɩɩ zẽgdg zugu, la bʋgsem sẽn da ka be wʋsg yĩnga, b yika tao-tao. 6Wĩndg sẽn waa n wɩnge, bãmb wẽneg n kiime, tɩ b ra ka kɩ yẽgen wʋsg ye. 7Kẽer lʋɩɩ gõos sʋka la gõos wulumd-b lame n kʋ tɩ b pa paam n wom biis ye. 8Kẽer lʋɩɩ zĩ-sõngẽ la bãmb yikame n wom biis wʋsgo, kẽer pistã-tã, kẽer pisoobsoobe, kẽer koabg-koabga.» 9A Zezi da yetame: «Ned ninga sẽn tar-a tʋba n na kelg bɩ a yoog a tʋb n kelge.»

Bõe yĩng la a Zezi gomd ne yelbũna?

10A Zezi waa n bee kɛɛnga tɩ b sõsd-n-taasa ne Tʋʋm-tʋmdb piig la a yiibã na n sok-b b yelbũna poorẽ. 11Dẽ la b ra yet woto: «Sã n ya yãmba, yãmb paamame tɩ b wilg-y Wẽnd Rĩunga yɛla. Sã n ya ne sẽn be-b yɩngã, yaa ne yelbũn la b gomd ne bãmba, 12#Iz 6,9-10. sẽn na n yɩla tɩ b sã n get neere me bɩ b ra yãe ye; b sã n kelgd neer me bɩ b ra wʋm ye, ka rẽ, raar a ye b wat n teemame n paam sugri.»

Bʋta yelbũnd võore

13A Zezi yeela bãmba: «Yãmb sɩd ka wʋmd yelbũnd kãnga võore? La sã n ya woto, yãmb na n maana a wãn n wʋm a taaba võore? 14Bʋta sẽn bʋtã, yaa Wẽnd Gomdã. 15Sẽn be-b Gomda sẽn bʋd sor ninga noorã, la sẽn wʋm-b Gomdã tɩ Sʋtãan wẽneg n yiis-a b sũurẽ. 16Zĩ kʋɩgdgẽ dãmba yaa neb niyns sẽn wʋm-b Gomdã n deeg-a tao-tao ne sũ-noogo. 17La b meng sẽn ka kɩ yẽgna, yaa wakat yɛng bala la b ya rapa. La b sã n seg toog bɩ namsgo, Koe-nooga yĩnga, b kongda raoodo n pãs n lʋɩ. 18Gõosẽ dãmbã, yaa neb niyns sẽn wʋm Gomdã 19n yaool n bas tɩ dũni zu-loeese, arzɛgs tʋlsem, tʋls wẽns buud fãa, wulumd-ba, tɩ Gomda sẽn bʋda pa tõe n wom biis ye. 20Sẽn lʋɩb zĩ-sõngẽ, makda sẽn kelgd-b la b reegd Gomdã n paam n womd biisi, pistã-tã, pisoobsoobe, koabg-koabga.»

Fitil yelbũndi

21 # Mt 5,15; Lk 11,33. B ra leb n yet-b lame: «Fitil yõgendame n lud ne koglg bɩ n solg gãag tẽngr bɩ? Ka roagendga zuug la b ningd-a? 22#Mt 10,26; Lk 12,2. Bũmb ka be sẽn solg likẽ, tɩ b ka na n wa ne a vẽenemẽ ye. Sẽn sogl fãa tara a pukr daare. 23Sẽn tar-a tʋb fãa n na n kelge, bɩ a kelg.»

24 # Mt 7,2; Lk 6,38. A Zezi ra yet-b lame yɛsa: «Gũus-y ne y sẽn wʋmde! Yãmb sẽn na n dɩk makr ninga n mak n kõ y taaba, yãmb me rẽn na n maka boto la pʋs n na yɩɩg rẽnd me. 25#Mt 13,12; 25,29; Lk 19,26. Sẽn zoe n tar-a wã la b na n kõo n paase. Sẽn ka tar-a wã, bilfra a sẽn tarã la b na deege.»

26A Zezi ra yet-b lame yɛsa: «Wẽnd Rĩunga wẽnda bõn-buud ned sẽn bʋd a pʋʋgẽ. 27A gõeeme bɩ a neeme, yaa wĩntoog bɩ yaa yʋngo, bõn-buuda bundame n yi a toore t'a ka miẽ ye. 28Tẽnga meng n wat ne a yõodo: pipi yaa vãado, a yiib soaba yaa ka-zugu, la rẽ poore yaa biisi. 29#Zl 4,13. La kood sã n bɩ n sɛ, yaa kɛɛbo tɩ kooda bɩɩme.»

30A Zezi le yeelame: «Mam na n maka Wẽnd Rĩunga ne bõe? M na n wẽe yelbũnd bʋgo n mak-a tɩ y wʋme? 31Wẽnnaam Rĩunga wẽnda seneve tɩɩg biiga, a bʋdb wakato, a yaa bilfr wʋsgo bõn-buud a taab fãa sʋka. 32La b sã n bʋd-a t'a yi n sɛ, a lebgda tɩ kãsenga al n tão wil bɛda tɩ yĩngr luiili wat n vʋʋsd a maasmẽ.»

33Yaa ne yelbũn wʋsg woto la a Zezi ra gomd ne nebã n zãmsd-ba b sẽn tõe n wʋm bũmb ninga. 34La a Zezi ra ka gomd ne bãmb tɩ ka ne yelbũn ye la b sã n da yaool n be ne b karen-biisa bala, b ra wilgda bãmb yelbũna võore.

35Baraare, zĩig sẽn waa n sobgdẽ, a Zezi yeela b tũud-n-taasã: «Wa-y tɩ d dʋʋg mogrã.» 36B basa nebã la b talla a Zezi ne koglg ning b sẽn da be a soab pʋgẽ wã n dʋʋge. Koom kogend a taab me yãag-b lame. 37Wakat kãng la sob-kãseng yik yã al tɩ ko-wiisa da rãmbd wʋsgo n buiid koglgã t'a rat n pidi. 38A Zezi menga ra bee poorẽ n kʋgl b zug zu-kʋka n gõe; karen-biisa nek-b lame n yeel-ba: «Soaala, yãmb pa ne tõnd sẽn na n ki wã la, n maand wa y toog ka be?» 39A Zezi sẽn neke, b zaba ne sobgã la b kõo mogra noor n yetẽ: «Yɩ sɩɩ la f bas bʋrga!» Sobga yõka vugr bala tɩ mogra zãng lebg sɩɩ. 40A Zezi yaool n yeela b karen-biisã: «Yaa bõe yĩng la y zoet dabeem woto? Yaa bõe tɩ y pa tar tẽebo?» 41Dabeem kãseng yõka bãmb fãa tɩ b ra yet taaba: «Nin-kãnga yaa Ãnda tɩ sobg la mogr deegd b noore?»

Currently Selected:

A Mark Sõng 4: SSDC98

Highlight

Copy