A Mark Sõng 13

Zerizalɛɛm wãabo la dũni sɛɛb yelle

(Mt 24,1-3; Lk 21,5-7)

1A Zezi sẽn yi wẽnd doogẽ wã la karen-biig a ye sẽn yeel-ba: «Soaala, ges-y rooga kugã la a meebã.» 2A Zezi yeel-a lame: «Fo geta wẽnd dooga meeb sẽn ya neer wʋsga laa? Ad kugr ba a ye ka na n kell a to zug ye, bãmb fãa na n viigame!» 3A Zezi sẽn ta Oliviye Tĩngla zugu, b zĩndame tɩ b neng get wẽnd doogã. Wakat kãnga a Piyɛr ne a Zak n paas a Zã ne a Andre sẽn mik tɩ ned a to ka be ne bãmba, b yeela a Zezi: 4«Bɩ y togs tõnd yell kãnga sẽn na n taas wakat ninga la bũmb ning sẽn na deng n maan dũni sɛɛb wakato.»

5A Zezi leoka b karen-biisã: «Bɩ y gũus tɩ b ra tudg yãmb ye. 6Neb wʋsg na n waa mam yʋʋr yĩnga n yetẽ: ‹Yaa maam la Krista,› la b na tudga neb wʋsgo. 7Yãmb sã n wʋm tɩ b gomd zabr yelle, bɩ y sã n wʋma zabr rãamde, bɩ y ra zoe rabeem ye. Rẽ fãa na n deng waame la nan ka dũni sɛɛb ye. 8Buud a yembr neba na n maana zabre ne bu-zẽnd dãmba, soolem a ye rãmba na n yika zabr ne soolm a to neba. Zĩis kẽere tẽnga na miimame; kom na n zĩnda wakat kãnga, bɩ y bãng tɩ rogma waasg n sɩnge.

9Gũus-y y mense. B na yõka yãmb n kẽng bʋ-kaoodba nengẽ; b na n pãba yãmb ne kaase karen-dot pʋsẽ; b na n talla yãmb n kẽng tẽnga nanams la dĩm dãmb taoore, la b na n kẽes-y la bʋʋdo, y sẽn tũud maama poorẽ. 10La yaa modgr tɩ Koe-nooga reng n moon zĩis fãa tɩ neba wʋm-a.

11 # Mt 10,17-20; Lk 12,11-12. B sã n wa yõg yãmba n kẽng bʋ-kaoodb taoore, bɩ y ra bʋ y sẽn na n leok bũmb ninga poorẽ ye. Bũmb ning sẽn na n wa yãmb yamẽ wakat kãnga, yaa bõn-kãng la y na n leoke. Pa yãmb mens n na n gom wakat kãng ye, yaa a Vʋʋsem Sõng n na n gom yãmb zĩigẽ. 12Ned na n yõka a ba-biig n kɩs tɩ b kʋ, tɩ ba na n kɩs a biiga, tɩ kamb na n kɩs b ba rãmba tɩ b kʋ. 13#Mt 10,22. Mam yĩnga, neb fãa na n kisga yãmba. La ned ning sẽn na n tall a tẽeb kẽnkẽ n ta namsga tɛka, yẽ soab na n fãaga a menga.

14 # Dn 9,27; 11,31; 12,11. Yãmb sã n yãend yel-yooga sẽn wat ne Sũ-sãang kãsenga zĩig ninga a sẽn pa tog n zĩndĩ, ned ninga sẽn karemd-a bɩ a wʋme. Neb niyns sẽn be-b Zɩɩde tẽns pʋsẽ wakat kãnga, bɩ b zoe n dʋ tãmsã. 15Sẽn zao-a gaosg zug wakat kãng bɩ a soab ra sig ye, 16#Lk 17,31. a ra kẽ a roogẽ n dɩk bũmb ye. Ned ninga sẽn be-a pʋʋgẽ wakat kãng bɩ a ra le wa yir n bao fuug ye. 17Yell na pak tʋtr-pʋs la sẽn yẽsemd-b kamb wakat kãnga. 18Bɩ y pʋʋs tɩ yell kãnga ra seg waood wẽnd ye. 19#Dn 12,1; Tv 7,14. Da kãens toolem na n yɩɩga toolem buud fãa. Al dũni sɩngre n ta marsã, b nan pa yãend a taar ye la b kõn le yãend me ye. 20Wẽnnaam sã n da pa woogẽ dasem kãens sõore, ned ba a ye kõn tõogẽ n põs ye. 21La nin-sõma yĩnga, Wẽnnaam sẽn tũus b rãmba yĩnga, b sõora woogame. Ned sã n yeel yãmb wakat kãnga: ‹Ad Krista bee ka; wa-y tɩ b bee kaalẽ,› bɩ y ra tẽ a soab goam ye. 22Zirẽ-be-neba, zirẽ-be-bãngdba na n zĩnda wʋsg wakat kãnga. B na n maana bõn-bãna la makr dãmb wʋsgo n tudg nin-sõma wã menga sã n da tõeẽ. 23Sã n ya yãmba, gũus-y y mense, tɩ m deng n wilga yãmb dẽ fãa tɩ nan ket n zãr.

Ned Biig waoongo

24 # Iz 13,10; Ez 32,7; Zl 2,10; 3,4; 4,15; Tv 6,12. Dasem kãense, sũ-beed kãsenga sã n wa looge, wĩntoog bugum na n kiime, kiuug kõn le kõ vẽenem yɛs ye. 25#Iz 34,4; Zl 2,10; Tv 6,13. Ãds na n vigsame n dʋʋge, la yĩngr pãensa fãa na menemame. 26#Dn 7,13; Tv 1,7. Wakat kãnga b na yãe Ned Biiga sẽn zom sawadgo n wat ne pãng la zɩɩr kãsenga. 27B na n yaoolame marsã n tʋm b malɛgse tɩ b saag zĩis fãa n tigim b nin-sõma sẽn be ween-vɩɩs a naasã, tẽnga la saaga sẽn singd zĩig ninga n tãag b sɛtmẽ.

Kankang yelbũndi

28Bɩ y rɩk kankang makre. Yãmb sã n mik t'a tãood wil poala la a tobd vãado, y miime tɩ tʋʋlg wẽnd kolgame. 29Woto-me yãmb sã n wa yãe mam sẽn gom bũmb niynsa fãa taasgo, bɩ y bãng tɩ wakat taame. 30Sɩd-sɩda m yeta yãmba: dũni kãnga neb kõn loog zãnga tɩ mam sẽn togsa ka taas ye. 31Yĩngr la tẽng na n loogame la mam goama kõn loog ye.

32 # Mt 24,36. Sã n yaa daara taki wã, ned ba a ye ka mi ye. Malɛk rãmb sẽn be yĩngr ka mi ye. Ned Biiga me ka mi daar kãng ye. Yaa Ba n mi bala.

33Gũus-y wakat fãa la y ra bao vʋʋsg ye tɩ yãmb ka mi wakat kãng taab daar ye. 34#Lk 12,36-38. Yaa wa ned sẽn togd sore n bas a yir gũudem ne a sõgen-kamba. A kõo bãmb tõogo tɩ b yõdg n ges bũmba fãa la b kõo ned kam fãa a tʋʋmde a sẽn na n yõdg n maan. A yeela dig noora gũuda t'a yõdg n gũ neere. 35Yãmb me, gũus-y tɩ y pa mi yir soab waoong wakat ye. A na n waa yʋn-sʋka, tõd-beoogo, no-raoog kɛlenga, bɩ yibeoogo, y ka mi ye. 36A sẽn na n wa wakat ning fãa, sõng-y t'a ra mik tɩ y gõeeme ye. 37M sẽn gomdã yaa yãmb fãa la m gomd ne: gũus-y.»

Currently Selected:

A Mark Sõng 13: SSDC98

Highlight

Copy