Kañaam 39
39
Ppoţëţ pi ñaaŋ najën ţi kadun ki Naşibaţi
1Kayeeh ki pñaamarën Naşibaţi ki kapënna ţi ulibra wi najukan iyeeh. Kawo ki Yeduŧun. Kayeeh ki Dayiţ.
2Dji : « Dmëban uleef naan,
kaţi kabi kajuban na pndemënt naan ;
wal bŧi wi bañaaŋ bajooţ bakwooŋ ţi kadun naan,
dmëban mntum mi naan. »
3Dyompan mntum mi naan, dwo byompan ;
dyompan mntum, alow bnuura
kë mnhaj mi naan mandëm maakan.
4Pnjën pi naan patërën ţi bjënŧ,
uhaaş wi naan uţëla ţëla bŧi
kë ndoo ţiini aji :
5« Iwi Yawe Nawat Kabuka dolan mme unuur wi nji kakeţuŋ ;
ţupaan ŋnuur ŋanduki'aanuŋ,
mmeena jibi ubida wi naan uţamñi.
6Tenan, ido ubida wi naan kë uţamëñ ji kañen ;
ŋnuur ŋi naan ţi mboş ŋaanwo nin uko uloŋ ţi iwi.
Aa, ñaaŋ najën andoli awo wo ji uyook. »
Pnaţ ntiinku
7Aa, ñaaŋ najën aji ñaay ji ulimënţ ;
aji bubara kaŋaat, awo wo ji uyook ;
aji ţonkrën kaşë wo aanji me ñaaŋ ankmbiiŋ kayeenk.
8Iwi Ajugun, kë hënkuŋ, we wi nji nhiluŋ kahaţ ?
Iwi i i nji nhaţuŋ.
9Pënanaan buţaan bi naan bŧi !
Kwut nayila akarën !
10Dyompan mntum mi naan, mënkhaabëş mntum
ţiki iwi iklempuŋ.
11Lowanaan kakob ki nu !
Kañen ki nu kado kë njoti.
12Iji kjukan ñaaŋ wi ajubanuŋ kë ikoba.
Iji kŧok uko wi aŋalnuŋ jibi ubob ujaaŋ uŧok imişa.
Aa, ñaaŋ najën andoli awo wo ji uyook.
Pnaţ ntiinku
13Iwi Nawat Kabuka, ŧiinkan pñehan pi naan ;
watan uşal iŧiinkën wi nji kahuuranuŋ adu'u iţënkën ;
kdiikën wi nji kawooniiŋ adu'u.
Nji dwo wo nayaanţ du katohu ;
dţëp ţëp ji bateem naan bŧi.
14Lowaan këşu ţi nji nhilna mmuujan,
ji mbi ndo kaya, mënkak awo nin uko uloŋ !
Currently Selected:
Kañaam 39: knf
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
