Kañaam 33
33
Kayeeh ki pdëman Nawat Kabuka
1An bañaaŋ baŧool, nahuuraan na mnlilan nadëman Yawe Nawat Kabuka.
An bañaaŋ banwooŋ na ŋhaaş ŋjinţ, unuura nado kadëmana.
2Nakoban bnŧuni nadëman Nawat Kabuka ;
nakoban bnŧuni bi ital iñeen nadëmana.
3Napaşan kayeeh nadëmana ;
nakoban bnuura nadëmana.
4Uţup wi Nawat Kabuka uwo uŧool ;
ñaaŋ ahil kahaţ ţi iko bŧi yi adoluŋ.
5Aŋal uko unwooŋ uŧool abot aţëp ţi bgah.
Uŋal wi nul unwooŋ uunkba uŧum ţi mboş.
6Nawat Kabuka aţëpna ţi uţup wi nul apaş baţi ;
ahaabëş mntum apaş iko bŧi inwooŋ baţi.
7Aţoonkrën meel mi idëk aneejan ţi itank,
ahank bdëk bweek ţi ŋbuli.
8Bañaaŋ banfëţuŋ ţi mboş bŧi badoon kaŧiink Nawat Kabuka !
Bañaaŋ banfëţuŋ ţi mboş bŧi balënkan ţi kadunul !
9Aji ţup, uko wi aţupuŋ upaşana ;
aji ţiini, uko wi ajakuŋ uwo.
10Nawat Kabuka aji naţan iko yi ŋŧaak ŋakdoluŋ ;
aji neenan bañaaŋ biki ŋŧaak pdo iko yi başaluŋ pdo.
11Kë iko yi Nawat Kabuka ajaaŋ aşal işë wo yi mnţo ;
iko yi aşaluŋ pdo iinkţëlşa nin.
12Pntaali pi Nawat Kabuka awooŋ Naşibaţi i pa panuurandëni ;
pntaali pi adatuŋ aji pawo pi nul panuurandëni.
13Nawat Kabuka aji ţo du baţi kaşë katen,
kawin bañaaŋ bajën bŧi.
14Du dko di afëţuŋ,
aji şalan bañaaŋ bŧi banfëţuŋ ţi mboş.
15Ul ambomanuŋ baka bŧi ŋhaaş ;
ul antenuŋ bnuura iko bŧi yi bajaaŋ bado.
16Mënţ bangoli baŧum bakaaŋ kë naşih aya buur du ugut,
mënţ mnhina mnweek mankaaŋ kë nangoli natëŋ aya buur du ugut.
17Phaţ ţi umpëlënŧ kabuurna pawo ŋţaafi ;
uforŧa wi wa bŧi uunhil kabuuran ñaaŋ.
18Kë Nawat Kabuka aşë ji ten banjaaŋ baŧiinka
aji ten banjaaŋ bahaţ ţi uŋal wi nul unwooŋ uunkba,
19kahilna kabuuran ŋhaaş ŋi baka pkeţ,
bawo bajeb wal wi pkeţ ubon pakwooŋ.
20Nja ŋhaţ ţi uko wi Nawat Kabuka ahoŋuŋ ;
ul ajaaŋ abuuran nja, ajaaŋ abeel nja.
21Ul akaaŋ kë ŋhaaş ŋi nja ŋawo ţi mnlilan
ŋţu mnhaţ mi nja ţi katimul kayimanaan.
22Iwi Yawe Nawat Kabuka ŋñehan uŋal wi nu unwooŋ uunkba uwo ţi nja,
un, ŋţu mnhaţ mi nun ţi iwi.
Currently Selected:
Kañaam 33: knf
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
