Bgah 4

Iţeŋan yi ppënan ipekadu

1 Yawe Nawat Kabuka aţiini na Moyiŧ aji : 2Ţiiniin na babuk Iŧrayel iji na baka « Woli ñaaŋ aloŋ ajuban bë aammee, ado uko wi Yawe Nawat Kabuka aneenanuŋ, hënk di awooŋ kado : 3woli naţeŋan naweek#4.3 Naţeŋan naweek baloŋ baji naţeŋan i bakëruŋ. Woli baţooran nateŋan naweek baji baţu'a ukëra. ajubanuŋ pjuban pi nul paji pakak ţi bañaaŋ bŧi, aşë wo i kafiŋar Nawat Kabuka uwit ukaş unwooŋ uunţafi akuţ awo uunţakëm ţi nin dko dloŋ, kahilna kapënan pekadu duŋ. 4Añooţ uwit ukaş wuŋ du ukëbi wi kaloona ki bayiti, ţi kadun ki Nawat Kabuka ; kaşë kapaf kañen ţi bkow bi wa, kafaal wa ţi kadun ki Nawat Kabuka. 5Naţeŋan naweek ayeenk pñaak ploŋ pi uwit wuŋ kañooţ du kaloona ki bayiti meeţ ; 6aŧoop pkoñ ţi pñaak mënţ kalëŧ pa ŋyaaş paaj na uloŋ ţi kadun ki Nawat Kabuka ţi kadun ki blaañ banwooŋ ţi kadun ki dko dyimanaan maakan. 7Ajej pñaak pntiinku kaţu ţi itiim inwooŋ ţi ibaŋ yi bliit bi bajaaŋ batërna mnkulan banwooŋ ţi kadun ki Nawat Kabuka du kaloona ki bayiti. Apën wal mënţ kajeeş pñaak pi uwit pandukiiŋ ţi uţeeh wi bliit bi mngur banwooŋ ţi ukëbi wi kaloona ki bayiti.

8« Wi abaaŋ, naţeŋan naweek awo kapënan ţi uwit unfiŋuŋ wuŋ mniir bŧi : mambooluŋ iko imeeţ, na manjabuŋ ţi ya, 9na kbuuku na mniir manfooyuŋ ka, dko dannuurnaaniiŋ ţi udeeb na kbuuku. 10Jibi bajaaŋ bapënan ma ţi bţeŋan bi bŧiinkar ţi Nawat Kabuka na bañaaŋ hënk di bakaaŋ apënan ma. Naţeŋan naweek atër iko mënţ bŧi kaba ţi bliit bi mngur. 11Kanjan ki uwit na uyemaţ bŧi, bkow, ikuţaţ, iko imeeţ na beţ, 12uko undukiiŋ ţi uwit bŧi, ado bañooţ wa balowan dko di bafëţuŋ, du dko danwooŋ djinţ ţi këş ki Naşibaţi di bajaaŋ baţu ufob. Atër wa bŧi kaba na imul. Ţi dko di bajaaŋ baţu ufob di di baktërnuŋ wa.

13« Woli bañaaŋ bŧi biki Iŧrayel bajubanuŋ ado iko yi Yawe Nawat Kabuka aneenanuŋ bë baamee, baduknaanaa. 14Unuur wi bakmehaŋ kë bajubani, bawo i kafiŋar Nawat Kabuka uwit ukaş unwooŋ uunţafi abot awo uunţakëm nin dko dloŋ pa ppënan ipekadu yi baka. Baţij wa ţi ukëbi wi kaloona ki bayiti. 15Bantohi biki Iŧrayel bapaf iñen ţi bkow bi unŧaam, aloŋ ţi baka aşë faal wa ţi kadun ki Nawat Kabuka. 16Naţeŋan naweek ajej pñaak ploŋ kañooţ du kaloona ki bayiti meeţ. 17Aŧoop pkoñ ţi pñaak mënţ kalëŧ ŋyaaş paaj na uloŋ ţi kadun ki blaañ ţi kadun ki Nawat Kabuka. 18Aţu wal mënţ pñaak pntiinku ţi itiim inwooŋ ţi ibaŋ yi bliit bi bajaaŋ batërna mnkulan banwooŋ ţi kadun ki Nawat Kabuka du kaloona ki bayiti, kaşë kapën wal mënţ kajeeş pñaak bŧi pandukiiŋ ţi uţeeh wi bliit bi mngur banwooŋ du ukëbi wi kaloona. 19Apënan wal mënţ mniir bŧi manwooŋ ţi uwit katër ma bŧi kaba du bliit bi mngur. 20Ado uwit wuŋ jibi akdoluŋ uwit wi bţeŋan bi pekadu di nul. Hënk di naţeŋan ajaaŋ ado Nawat Kabuka kaşë miir baka ipekadu. 21Ado bapënan uwit balowan dko di bafëţuŋ, utër bŧi ji uŧeek. Waŋ uwooŋ bţeŋan pa pekadu di bañaaŋ bŧi.

22« Kë woli naweek aloŋ ajubani, ado iko iloŋ yi Nawat Kabuka Naşibaţi i nul aneenanuŋ pdo bë aammee, aduknaanaa. 23Woli badiimana kë ajubani, afiŋar Nawat Kabuka upi udow unwooŋ uunţakëm nin dko dloŋ. 24Aţu kañen ţi bkow bi wa, kaşë kafaal wa du dko di bajaaŋ bafiŋaraan Nawat Kabuka ŋnŧaam. Uwo bţeŋan pa ipekadu. 25Naţeŋan aţu ţi pkoñ pñaak pntiinku pi unŧaam unfiŋuŋ wuŋ kaţu ţi itiim inwooŋ ţi ibaŋ yi bliit bi mngur. Ajeeş pñaak pandukiiŋ ţi ba uţeeh. 26Atër mniir bŧi kaba ţi bliit bi mngur jibi bajaaŋ batër mniir mi unŧaam wi bţeŋan bi bŧiinkar. Hënk di naţeŋan ajaaŋ ado Nawat Kabuka kaşë miir naweek mënţ ipekadu.

27« Kë woli ñaaŋ aloŋ i Iŧrayel ajubanuŋ, ado uko wi Yawe Nawat Kabuka aneenanuŋ bë aammee, aduknaanaa. 28Woli badiimana kë ajubani, afiŋar Nawat Kabuka upi uwaaţ unwooŋ uunţakëm nin dko dloŋ, ahilna amiira. 29Apaf kañen ţi bkow bi wa kaşë kafaal wa du dko di bajaaŋ bafiŋaraan Nawat Kabuka ŋnŧaam. 30Naţeŋan aŧoop pkoñ ţi pñaak kaţu ţi itiim inwooŋ ţi ibaŋ yi bliit bi mngur, kaşë kajeeş pñaak bŧi pandukiiŋ ţi uţeeh wi ba. 31Apënan mniir bŧi jibi bajaaŋ bapënan ma ţi unŧaam wi bţeŋan bi bŧiinkar ţi Nawat Kabuka na bañaaŋ. Wal mënţ atër ma bŧi kaba ţi bliit bi mngur pa Nawat Kabuka, pţëkëñ mënţ paji palila. Hënk di naţeŋan ajaaŋ ado Nawat Kabuka aşë miir ñaaŋ mënţ ipekadu.

32« Kë woli unkaneel wi wi aŋaluŋ kafiŋar Nawat Kabuka, awo kaţij uwaaţ unwooŋ uunţakëm nin dko dloŋ. 33Apaf kañen ţi bkow bi wa kaşë kafaal kaţeŋan pa pjuban pi nul du dko di bajaaŋ bafiŋaraan Nawat Kabuka ŋnŧaam. 34Naţeŋan aŧoop pkoñ ţi pñaak pi unŧaam mënţ kaţu ţi itiim inwooŋ ţi ibaŋ yi bliit bi mngur kaşë kajeeş pñaak bŧi pandukiiŋ ţi uţeeh wi ba. 35Apënan mniir mi unŧaam bŧi jibi bajaaŋ bapënan ma ţi bţeŋan bi bŧiinkar ţi Nawat Kabuka na bañaaŋ, naţeŋan aşë tër ma bŧi ţi bliit bi mngur ţi uko ude duuţ wi bajaaŋ batër bŧi pa Nawat Kabuka. Hënk di naţeŋan ajaaŋ ado Nawat Kabuka kaşë miirna anjubanuŋ ipekadu yi nul. »

Currently Selected:

Bgah 4: knf

Highlight

Copy