Bgah 23

Ŋnuur ŋi ŋfeŧtu ţi Iŧrayel

1 Yawe Nawat Kabuka aţiini na Moyiŧ aji na a : 2Ţiiniin na babuk Iŧrayel iji na baka : « Ŋfeŧtu ŋyimanaan ŋi, ŋi ŋi nawooŋ kado kado, ŋul ŋawooŋ ŋfeŧtu ŋi naan. Woli nado ŋa, naduun bañaaŋ bŧi bayitiir badëmanaan. »

Unuur wi pnoorfën

3« Nalemp ŋnuur paaj, kë unuur uţënk paaj na uloŋ uşë wo unuur wi pnoorfën, unuur wi nayitiir nadëmanaan, naankdo nin ulemp uloŋ ţi unuur mënţ : du dko di nafëţaaŋ, unuur mënţ uwo wi pnoorfën wi nakdooŋ kadëman nji Yawe Nawat Kabuka.

4« Ŋnuur ŋi ŋawooŋ ŋnuur ŋi ŋfeŧtu ŋloŋ ŋi nakdooŋ pa nji Nawat Kabuka, ŋi nakduuruŋ kayit ţi wal wi nţuuŋ. »

Ufeŧtu wi Mbuur na wi ipoom indaţ

5« Ţi ŋnuur iñeen na ŋbaakër ŋi pli pŧeek, na utaakal, nado Ufeŧtu wi Mbuur pa Yawe Nawat Kabuka. 6Ţi ŋnuur iñeen na kañeen ŋi pli mënţ najun ufeŧtu wi ipoom indaţ pa Nawat Kabuka. Nado ŋnuur paaj na uloŋ ŋi nakdooŋ kade ipoom indaţ. 7Ţi unuur uŧeek, nayitiir kadëman Nawat Kabuka : naankdo nin ulemp uloŋ. 8Nado ŋnuur paaj na uloŋ ŋi nakdooŋ katërad bŧi Nawat Kabuka ŋnŧaam na ŋdeey. Ţi unuur uţënk paaj na uloŋ nayitiir kadëman Nawat Kabuka, naankdo nin ulemp uloŋ. »

Pţen ŋdeey ŋŧeek ŋampënnuŋ du ŋţeeh

9 Yawe Nawat Kabuka aţiini na Moyiŧ aji na a : 10Ţiiniin na babuk Iŧrayel iji na baka : « Woli naluŋ aneej du uŧaak wi nji kaţenanaŋ ado kakit da, nawo kaţij ŋdeey ŋŧeek ŋampënnuŋ ţi ŋţeehan du naţeŋan. 11Ţi unuur unţaşuŋ ţi wi pnoorfën ajej ŋa kadiiman nji Nawat Kabuka, nahilna nayeenk bnuura bi naan. 12Ţi unuur mënţ natërad Nawat Kabuka unkaneel bŧi wi uşubal unwooŋ uunţakëm nin dko dloŋ. 13Nado kak bţeŋan bi ŋdeey bagakandër na uko untëruŋ wuŋ, bawo bi ŋkil paaj ŋi pşon pi banaguŋ na ukëra. Bawo bţeŋan bi pţëkëñ pajaaŋ palilën. Nakak atul da poot pi ulitru na pŧoof. 14Ji unuur mënţ ubi uban, naankde nin uko uloŋ umpënnuŋ du kakit ki nan uwole kapoom, ŋdeey ŋi baŧoowuŋ, këme uŧëmp. Hënk di di nawooŋ kado kado te mnţo an na pntaali pankpënnuŋ ţi an du dko bŧi di nakfëţaaruŋ. »

Ufeŧtu wi inëm

15« Kajunna du unuur unţaşuŋ ţi wi pnoorfën wi naţijuŋ ŋdeey ŋi naţeŋanaanuŋ, nafën inëm paaj na kaloŋ ipëb. 16Ŋnuur iñeen kañeen mënţ ŋaya te unuur unţaşuŋ ţi wi pnoorfën wi kanëm kapaajanţën na kaloŋ, wal mënţ nakak ado Yawe Nawat Kabuka bţeŋan. 17Naţijna du itohan ipoom itëb kado Nawat Kabuka bţeŋan. Kapoom kandoli kabomanaan ŋkil ŋwajanţ ŋi pşon kabot kajuŋ na uko utajanaani pşon. Bţeŋan mënţ bapënna ţi ŋdeey ŋŧeek ŋi nakituŋ. 18Nakak aţij ŋkaneel paaj na uloŋ ŋi uşubal ŋanwooŋ ŋaanţakëm nin dko dloŋ, uwit ukaş na ŋkaneel ŋkaş ŋtëb ŋloŋ katërad bŧi Nawat Kabuka, ŋul na bţeŋan bi ŋdeey, na poot pi baheparuŋ. 19Nakak awo i kawul upi ukaş udolna bţeŋan bi ppënan ipekadu, na ŋkaneel ŋtëb ŋi uşubal ŋi bţeŋan bi bŧiinkar ţi Nawat Kabuka na bañaaŋ. 20Naţeŋan ajej ipoom yuŋ na ŋnŧaam, kaţu na ŋkaneel ŋtëb kadiiman Nawat Kabuka. Iko mënţ bŧi iwo yi naţeŋan, iwo iko inyimanuŋ. 21Ţi unuur mënţ, nayitiir kadëman Nawat Kabuka, naankdo nin ulemp uloŋ. Hënk di di nawooŋ kado kado te mnţo du dko bŧi di nafëţuŋ.

22« Woli naluŋ akit du ŋţeehan, naanwo kakit te du ibaŋ yi uţeeh. Naanwo kapërënţ ţi ŋţeehan. Nadukar ŋdeey ŋanjotuŋ ŋuŋ bajuuk na bayaanţ. Nji dwooŋ Yawe Nawat Kabuka Naşibaţi i nan. »

Ufeŧtu wi ilul

23 Yawe Nawat Kabuka akak aţiini na Moyiŧ aji na a : 24Ţiiniin na babuk Iŧrayel iji na baka : « Ţi unuur uŧeek wi pli ppaajanţën na ploŋ, nanoorfën unuur upëb, uwo unuur wi pyit kado kalul kaleşna kabot kadëman nji Nawat Kabuka. 25Naankdo nin ulemp uloŋ ţi unuur mënţ, kaşë katërad nji Nawat Kabuka ŋnŧaam na ŋdeey ŋi bţeŋan bŧi. »

Unuur wi ppënan ipekadu

26 Yawe Nawat Kabuka aţiini na Moyiŧ aji na a : 27« Ţi ŋnuur iñeen ŋi pli ppaajanţën mënţ, uwo unuur uweek wi ppënan ipekadu. Naduur kayitiir kadëman nji Nawat Kabuka, kayiman kaşë katëradaan iko yi bţeŋan bŧi. 28Naankdo nin ulemp uloŋ ţi unuur mënţ, ţiki uwo unuur wi naţeŋan akdoluŋ ţi an bţeŋan bi ppënan ipekadu, nji Nawat Kabuka nşë miiran ipekadu nahilna najinţ ţi kadun naan. 29Ñaaŋ anwooŋ aanyiman ţi unuur mënţ apën ţi pntaali pi Iŧrayel. 30Kë ñaaŋ ankdoluŋ ulemp uloŋ ţi unuur mënţ, nji Nawat Kabuka dpënana ţi pntaali pi nul. 31Naankdo nin ulemp uloŋ. Hënk di di nawooŋ kado kado te mnţo an na pntaali pankpënnuŋ ţi an du dko bŧi di nakfëţaaruŋ 32Uwo unuur wi naknoorfënuŋ, nayiman ţi unuur mënţ ; ţi utaakal wi unuur uţënk kañeen kaloŋ te utaakal unkmbiiŋ, nawo i pnoorfën. »

Ufeŧtu wi irakan

33 Yawe Nawat Kabuka akak aţiini na Moyiŧ aji na a : 34Ţiiniin na babuk Iŧrayel iji na baka : « Ţi ŋnuur iñeen na kañeen ŋi pli ppaajanţën na ploŋ mënţ, nado kanëm kado kado ufeŧtu wi irakan kadëman nji Nawat Kabuka. 35Unuur uŧeek naduur kayit kadëman Nawat Kabuka, naankdo nin ulemp uloŋ. 36Unuur undoli ţi kanëm nawo katërad bŧi Nawat Kabuka ŋnŧaam na ŋdeey. Ţi unuur uţënk bakreŋ naduur kayit kadëmanaan, katëradaan bŧi iko, naankdo nin ulemp uloŋ ţi unuur mënţ.

37« Ŋuŋ ŋawooŋ ŋnuur ŋi pdo ŋfeŧtu pa nji Nawat Kabuka, ŋi nakduuruŋ kayit kadëmanaan, katëradaan bŧi iko, kado bţeŋan bi ŋdeey pa nji, kafiŋaraan ŋnŧaam kabot katul poot, unuur undoli na udolade wi wa. 38Iţeŋan mënţ iji idolana kaţu na iko yi najaaŋ naţeŋan pa Nawat Kabuka ţi unuur wi pnoorfën, na yi nahoŋuŋ na yi naţeŋanuŋ ţeŋan hënk ţañ.

39« Ţi ŋnuur iñeen na kañeen ŋi pli ppaajanţën na ploŋ, wal wi nakkituŋ kaba ţi uŧaak, nado ufeŧtu pa nji Nawat Kabuka ŋnuur paaj na uloŋ. Nanoorfën ţi unuur uŧeek na ţi unuur uţënk bakreŋ. 40Ţi unuur uŧeek najej mbuk mnuura mi mnko, ikën, inah yi mnko manŧumuŋ itoh këme ŋţëb ŋi itant kaşë kado ufeŧtu kanoha ţi kadun ki nji Nawat Kabuka ŋnuur paaj na uloŋ. 41Nado ufeŧtu wi pa nji Nawat Kabuka uşubal undoli ŋnuur paaj na uloŋ. Hënk di di nawooŋ kado kado te mnţo du dko bŧi di nafëţuŋ. Nado ufeŧtu mënţ ţi pli ppaajanţën na ploŋ. 42Ţi kanëm mënţ, an biki Iŧrayel bŧi nawo ţi irakan, 43bankpënnuŋ ţi an bameena kë ddo bateem baka kë bafëţ ţi irakan wi nji mpënanuŋ baka du uŧaak wi Ejiptu. Nji dwooŋ Yawe Nawat Kabuka Naşibaţi i nan. »

44Hënk di Moyiŧ aţupuŋ biki Iŧrayel ŋnuur ŋi ŋfeŧtu ŋi bawooŋ kado kado pa Nawat Kabuka.

Currently Selected:

Bgah 23: knf

Highlight

Copy