Bgah 1

Ptërad Nawat Kabuka ŋnŧaam ŋi bţeŋan kaba

1 Yawe Nawat Kabuka aduuna Moyiŧ du kaloona ki bayiti aji na a 2aţiini na babuk Iŧrayel aji na baka : « Woli aloŋ ţi an aŋal pdo Nawat Kabuka bţeŋan, ahinan kadat ţi batani bi ŋnŧaam ŋweek këme ŋmpoţi. 3Woli unŧaam uweek wi wi aktëraduluŋ bŧi, añooţ uwit ukaş unwooŋ uunţakëm nin dko dloŋ, unwooŋ uunwo na ujad uloŋ du uneeji wi kaloona ki bayiti pa pyeenk bnuura bi Nawat Kabuka. 4Apaf kañen ţi bkow bi unŧaam unwooŋ wi bţeŋan, uşë uyeenkara uwo bţeŋan pa ppënan ipekadu yi nul. 5Afaal unŧaam ţi kadun ki Nawat Kabuka. Baţeŋan, babuk Aaron baţen Nawat Kabuka pñaak puŋ kaşë kalëŧ pa kafooyan bliit bi mngur banwooŋ du uneeji wi kaloona. 6Akum unŧaam wuŋ katibëş tibëş wa. 7Baţeŋan babuk Aaron baŧehan wal mënţ bdoo ţi bliit bi mngur kaţu da imul, 8kaşë kapaf uyemaţ na bkow na kdaaş kanniiruŋ ţi imul duuţ. 9Anaj iko imeeţ na ikuţaţ, aloŋ ţi baţeŋan aşë tër bŧi iko yuŋ bŧi ţi bliit bi mngur uwo bţeŋan bi pţëkëñ pajaaŋ palil Nawat Kabuka.

10« Woli ñaaŋ aŋal ptërad Nawat Kabuka unŧaam umpoţi bŧi awo kajej unkaneel ukaş këme upi ukaş ŋanwooŋ ŋaanţakëm nin dko dloŋ, abot awo ŋaanwo na ujad. 11Afaal wa ţi kadun ki Nawat Kabuka ţi btammaŋu bi bliit bi mngur, baţeŋan babuk Aaron balëŧ pñaak kafooyan bliit bi mngur. 12Atibëş tibëş wa, kapënan bkow na idaaş inniiruŋ. Aloŋ ţi baţeŋan apaf uyemaţ wuŋ ţi imul inkyikuŋ ţi bliit bi mngur. 13Ankdoluŋ bţeŋan anaj iko imeeţ na ikuţaţ, naţeŋan adiiman ya Nawat Kabuka kaşë katër ya bŧi ţi bliit bi mngur. Uko untëruŋ wuŋ uwo bţeŋan bi pţëkëñ pajaaŋ palil Nawat Kabuka.

14« Woli ŋkaŧ ŋi ŋi aktëraduŋ Nawat Kabuka, aţen ubalab këme urikaţe. 15Naţeŋan añooţ wa du bliit bi mngur, katiik wa kalëb bkow katër ba bŧi ţi bliit kaşë kajej pñaak katul ţi imbaŋ yi bliit. 16Apënan kak pkaţiyaar na iko inwooŋ ţi pa kafël du umayar unuur wi bliit bi mngur di bajaaŋ baţu ufob. 17Amëban wa ţi ibaaklu kajeepëş kawo aankmaran wa bŧi ; kaşë katër wa bŧi ţi imul inkyikuŋ ţi bliit bi mngur, uwo bţeŋan bi pţëkëñ pajaaŋ palil Yawe Nawat Kabuka. »

Currently Selected:

Bgah 1: knf

Highlight

Copy