Ujuni 30

1Wi Rakel awinuŋ kë aanhil pbukar Yakob bapoţ, aşë kak akuj ţmakul, aji na ayinul : « Woli iinwulën bapoţ, kakeţ. »

2Kë Yakob aşë deebaţ aji : « Nji dwooŋ Naşibaţi anneenaniiŋ pka bapoţ i ? »

3Kë aji : « Bila nalempar naan awi, winaran na a, abuk ţi inkant naan#30.3 Abuk ţi inkant naan : Napoţ i Bila akbukuŋ awo i Rakel. Uwo wo ji Rakel abukuluŋ., nşë woona ţi a nka bapoţ nji kak. » 4Awul ayinul Bila nalemparul kë adola ñaaţul. Awinar na a, 5kë Bila amobana kayiŋ abukar Yakob napoţ ñiinţ. 6Rakel aji : « Naşibaţi awayëşaan, aŧiinkën, awulën napoţ ñiinţ. » Ukaaŋ kë aţu'a katim ki Dan#30.6 Dan : Ţi uhebërë dawooŋ awayëşaan..

7Bila nalempar Rakel akak amobana kayiŋ abukar Yakob napoţ ñiinţ, uŋ mënţan awooŋ natëbanţën i Bila. 8Rakel aji : « Dgut na naweek naan ugut unţëpuŋ uţup kë nji dşaaŋ awat. » Aţu'a katim ki Neftali#30.8 Neftali : Ţi uhebërë dawooŋ ugut wi naan..

9Wi Leya awinuŋ kë aţañan kabuk, ajej Ŧilpa, nalemparul, awul Yakob kë ado ñaaţul. 10Ŧilpa nalempar Leya abukar Yakob napoţ ñiinţ. 11Leya aji : « Ni nji nnuurëndani ! » aţu'a katim ki Gad#30.11 Gad : Ţi uhebërë Gad daţu kanaam kaŧiinkare na dnuurandëni..

12Ŧilpa nalempar Leya, abukar Yakob napoţ ñiinţ, uŋ mënţ awooŋ natëbanţën i Ŧilpa. 13Leya aji : « Mnlilan mi naan mandëmi ! Baaţ bado kadolën annuurandënuŋ. » Kë waŋ ukaaŋ kë aţu'a katim ki Aŧeer#30.13 Aŧeer : Ţi uhebërë daţu kanaam kaŧiinkare na dlilani..

14Na pubël, Ruben aya du ŋţeeh aşë win mnko mi kabuk. Aţij ma Leya anin. Kë Rakel aşë ji na a : « Dkooţu kooţ, ţenaan ţi mnko mi abuku aţijiiŋ. »

15Kë aŧeema aji : « Uunkëşu wi iŧehuŋ ayin naan, ikak aŋal pjej mnko mi abuk naan. »

Rakel akak aji : « Keeri iwulën mnko mi abuku, ayin nja aşë fër nţa du meeţ di nu. »

16Kë wi Yakob akpënnuŋ uţeeh na utaakal, kë Leya aşë pën akita aji na a : « Meeţ di naan di di ikfëruŋ nţa, ţiki dwul wul mnko mi abuk naan ihilna ibi na nji. » Kë afër na a uŧejan mënţ.

17Naşibaţi aŧiink Leya, kë amobana kayiŋ abuk napoţ ñiinţ. Bapoţ biinţ biki abukaruŋ Yakob bawo kañeen. 18Aji : « Naşibaţi alukën, ţiki dwul ayin naan nalempar naan. » Aţu abukul katim ki Iŧaakar#30.18 Iŧaakar : Ţi uhebërë daţu kanaam kaŧiinkare na baluk bi naan..

19Leya akak amobana kayiŋ, napoţ ñiinţ i abukuŋ awooŋ napaajanţën i abukaruŋ Yakob. 20Aji : « Naşibaţi aţenën uko unuura, uyaaş wi ayin naan adëmanaan ţiki dwula bapoţ biinţ paaj. » Awula katim ki Ŧabulon#30.20 Ŧabulon : Ţi uhebërë daţu kanaam kaŧiinkare na adëman.. 21Akak abuk napoţ ñaaţ i aţuuŋ katim ki Dina.

22Naşibaţi aleş Rakel abot aŧiinka, adola kë akak abuk. 23Amobana kayiŋ abuk napoţ ñiinţ, aji : « Naşibaţi ahil apënanaan mnkow. » 24Aţu'a katim ki Yoŧef#30.24 Yoŧef Ţi uhebërë dawooŋ akaan ahoţalëş. aşë ji : « Yawe Nawat Kabuka akaan ahoţalëşën napoţ ñiinţ aloŋ kak. »

Batani bi Yakob

25Wi Rakel abukaaŋ buk Yoŧef kë Yakob aşë ji na Laban : « Wutanaan nţiiş, nya du uŧaak wi naan. 26Wulaan babuk naan na bahar naan banţuuŋ kë nlemparu, nşë nya. Ime ulemp wi ndoluŋ pa iwi bnuura. »

27Kë Laban aŧeema aji : « Woli dwinana bnuura ţi këş ki nu, kţo ţi na nji, ţiki pţoori paţupën kë iwi iţuuŋ kë Yawe Nawat Kabuka awulën bnuura. »

28Akak aji : « Ţupaan uko wi iŋaluŋ uwo baluk bi nu, dluku wa. »

29Kë aŧeem aji : « Ime ţi bkowu jibi nji nlempariiŋ na jibi batani bi nu bakakuŋ wi bawooŋ ţi iñen yi naan. 30Bka bi nu babi wo btiişu ji ndo kabi, hënkuŋ iwin jibi baŧumuŋ maakan na jibi Nawat Kabuka awuliiŋ bnuura wi mbiinuŋ ţi katohu. Hënkuŋ, kë nji lum di di nji kalemparuŋ katoh ki naan ba ? »

31Laban ahepara aji : « Kë we wi nji kawuliiŋ ? »

Kë aŧeem aji : « Iinkwulën nin uko uloŋ. Woli idinan uko wi nji kajakiiŋ, kawohara nayafan kabot kayeŋ ŋnŧaam ŋi nu. 32Dya nţa batani bi nu, katen ŋnŧaam bŧi ŋanwooŋ da, kapaţëş ŋnŧaam bŧi ŋanwooŋ na ŋndampu këme ŋpiiţ na ŋnkaneel ŋjënal bŧi, ŋul ŋakwooŋ baluk bi naan#30.32 Ŋnŧaam bŧi ŋanwooŋ na ŋndampu këme ŋpiiţ na ŋnkaneel ŋjënal bŧi : Ţi uŧaak wi baka ŋaanŧumi.. 33Hënk di ikhiluŋ pten me nwo naŧool ţi uko wi njakiiŋ : iţënkle du nji ŋnŧaam ŋanwooŋ ŋaanwo na ŋdampu këme ŋpiiţ, na ŋnkaneel ŋanwooŋ ŋaanwo ŋjënal këme kë dkiij kiij ŋa. »

34Laban aŧeema aji : « Uwo bnuura, uwoon jibi ijakuŋ. »

35Unuur mënţ kë Laban aşë ya du batani apënan ŋpi ŋdow bŧi ŋanwooŋ na ŋdampu këme ŋpiiţ, na ŋnkaneel ŋwaaţ ŋjënal na ŋanwooŋ na uko unaakiiruŋ na ufaaŧal, awul babukul. 36Kë baya na ŋa uko unlowiiruŋ ji ŋnuur ŋwajanţ ŋi poş na dko di Yakob akyafanaanuŋ ŋnŧaam ŋandukiiŋ ţi batani bi Laban.

37Yakob aji ya ţi ŋnko ŋwajanţ ŋanwooŋ ţi uŧaak mënţ katib inah, kafejal dko dloŋ ţi ya dadoo kak dfaaŧal. 38Aji jej inah infejaluŋ yuŋ kaţu ya ţi kadun ki ŋnŧaam ţi dko di ŋajaaŋ ŋadaanna ; ŋnŧaam ŋaji ŋawo ţi pay woli ŋabi udaan. 39Woli ŋawo ţi pay ŋaji ŋaten inah yi afejaluŋ, kaşë buk ŋmpoţi ŋanwooŋ na ŋdampu këme ŋpiiţ. 40Apaţëş ŋkaneel aţu ŋa kë ŋaŧaaŋ na ŋnŧaam ŋanwooŋ na ŋdampu na ŋjënal. Hënk di awooŋ ţi pka batani, aannaakrën ŋnŧaam ŋi nul na ŋi Laban. 41Akak aji yoonk woli ŋnŧaam ŋkëm ŋnuura ŋawo ţi pay aşë jej inah yi afejaluŋ kaţu ţi kadun ki ŋa. 42Uşale wo ŋbon ŋawooŋ ţi pay aanji do haŋ, hënk di di ŋnŧaam ŋbon ŋawooŋ ŋi Laban kë ŋkëm ŋnuura ŋawo ŋi Yakob.

43Hënk, kë Yakob akak ayok maakan, aka ŋnŧaam ŋŧum, aka na balemp baaţ na biinţ, na ŋnŧaam ŋi pnkunkaali na ŋbuuru.

Currently Selected:

Ujuni 30: knf

Highlight

Copy