Ppën 5
5
Bi Moyiŧ na Aaron ţi kadun ki Farawuna
1Wi iko yaŋ iţëpuŋ, Moyiŧ na Aaron baya du Farawuna, aji na a : « Yawe Nawat Kabuka Naşibaţi i Iŧrayel aţiini aji : “Wutan bañaaŋ biki naan baya du pndiiş bado bţeŋan badëmanaan.” »
2Farawuna aŧeem aji : « In awooŋ Nawat Kabuka kë ndoo wo kaŧiink pdiim pi nul kadoo kawutan bañaaŋ biki Iŧrayel baya ? Mëmme anwooŋ Nawat Kabuka, kë bañaaŋ biki Iŧrayel mënkwut baka baya. »
3Kë baji na a : « Naşibaţi i bahebërë bajaaŋ badëman adiimanun bkowul. Ţenun ŋya dko di ŋkpoşari ŋnuur ŋwajanţ, ŋya ŋdo Nawat Kabuka Naşibaţi i nun bţeŋan awutna kafiŋun na mmaak këme kado bafiŋun na kej. »
4Naşih i Ejiptu aji na baka : « Wel ukaaŋ, kë an bi Moyiŧ na Aaron naŋal ppënan bañaaŋ ţi ulemp ba ? Nakakan du ŋlemp ŋi nan. 5Hënkuŋ wi bañaaŋ baŧumuŋ ţi uŧaak kë naşë ŋal pdo baka baţañan ulemp. »
Mnhaj mnweek mi biki Iŧrayel
6Unuur mënţan wuŋ Farawuna naşih aji na biki Ejiptu banjaaŋ baten ulemp na biki Iŧrayel banjaaŋ bapiiŧ kaţup jibi ulemp ukyaari aji : 7« Nawutan kak kawul baka pbooli pi bajaaŋ banaakrën na kafuuş kadolna induba jibi najaaŋ nado te hënkuŋ. Badoon kaya pla pa bukal ţi ŋleef ŋi baka, 8pnduba ploŋ paşë pawut kaţaaŋëş ţi yi bajonuŋ kado na ŋnuur ţiki bawo banşabër. Ukaaŋ kë bakhuuran aji : “Wutun ŋya ŋdo Naşibaţi i nun bţeŋan.” 9Natamnën baka ikow ţi ulemp. Bakale uko udo baankdo kaŧiink ŋţup ŋi ŋţilan ŋuŋ. »
10Banjaaŋ baten ulemp na banjaaŋ bapiiŧ kaţup jibi ulemp ukyaari baya aji na biki Iŧrayel : « Uko wi Farawuna naşih ajakuŋ wii wi : aji aankak awulan pbooli. 11Hënkuŋ naya kado kala pa an ţi ŋleefan du dko di nahilanuŋ kakaana pa, kë ulemp wi najonuŋ kado, wul wi nakdooŋ kadola. »
12Kë bañaaŋ bawayşër aya aniink uŧaak wi Ejiptu awo ţi pla pjaagal ado pbooli. 13Baten ulemp balëbar na baka aji : « Nadoon ulemp unliŋuŋ na wi najonuŋ kado wonţi bawulan pbooli. » 14Bakob biki Iŧrayel banjaaŋ bapiiŧ, biki baţuuŋ kë bawo baweek biki ulemp. Baji na baka : « Wel ukaaŋ kë induba yi nadoluŋ takal na nţa iinliŋ na yi najonuŋ kado ba ? »
15Kë banjaaŋ bapiiŧ ţi Iŧrayel baya du Farawuna pţupa, aji na a : « Wel ukaaŋ kë ikdo balemparu uko wi ba ? 16Baankak awul un balemparu pbooli aşë ji na un ŋdo induba abot akobun, bañaaŋ biki nu bado uko unwooŋ uunwo uŧool. »
17Kë aşë ŧeem baka aji : « An nawo banşabër baweek, ukaaŋ kë nakji : “Wutun ŋya ŋdo Yawe Nawat Kabuka bţeŋan.” 18Hënkuŋ naţëpan naya ulemp. Baankwulan nin kabooli, kë induba yi nabiiŋ aji nado yi yi nakdolaŋ. »
19Biki Iŧrayel banjaaŋ bapiiŧ ulemp jibi uyaari bawin kë uko wi baka unoorani wi bajakuŋ na baka induba yi bajonuŋ kado yul yi bakdooŋ kadola. 20Wi bapënuŋ du uko Farawuna aşë yit na bi Moyiŧ na Aaron bannaţuŋ ayoonk baka, 21aşë ji na baka : « Nawat Kabuka atenan uko wi nadoluŋ abot awayëş nja. Naţu kë Farawuna na bañaaŋ biki nul kë bakak aşoorun. Naţu baka kakej ţi kañen pa bafiŋun. »
22Wal mënţ kë Moyiŧ aşë kat këş du Nawat Kabuka añehan aji na a : « Ajugun, we ukaaŋ kë ido kë bakhajan bañaaŋ biki nu ? Wel ukaaŋ kë iyilën ţi ba ? 23Wi nyahaŋ ya du Farawuna aţupa uko wi ijakuŋ, kë aşë hajan bañaaŋ biki nu, kë işë wo iindo nin uko uloŋ pa pbuuran baka. »
Currently Selected:
Ppën 5: knf
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
