Ppën 4

Mnhina mnweek mi Naşibaţi awuluŋ Moyiŧ

1Moyiŧ akak aŧeem Yawe Nawat Kabuka Naşibaţi aji : « Kë woli baanfiyarën awo baanŧiinkën aşë ji na nji Nawat Kabuka aampën awinana ţi kadun naan ? »

2Kë Nawat Kabuka aşë ji na a : « Wel wi imëbanuŋ hënk ? »

Kë aŧeem aji : « Pmul. »

3Kë aji na a : « Watan pa ţi mboş. »

Kë Moyiŧ awat pa, kë pmul pakak upula, kë aţii. 4Kë Nawat Kabuka akak ji na a : « Ŧoolaan kañen imëban wa ptant. » Kë aŧoolan kañen amëban wa, kë uşë kak pmul ţi kañen ki nul. 5Nawat Kabuka akak aji na a wal mënţ : « Uko wi uyuuj baka kë nji Nawat Kabuka, Naşibaţi i başin baka bajaaŋ badëman, Naşibaţi i Abraham, i Iŧaak na Yakob, dpën awinana ţi kadunu. »

6Akak aji na Moyiŧ : « Neejaan kañeen ţi kamişa, iţu ka ţi bjënŧ. »

Kë aţu ka ţi bjënŧ apënan ka, kë kamaak bdoo, akak afaaŧ feh awo ji mntow. 7Kë Nawat Kabuka aji na a : « Kaan iţu kañen ţi bjënŧ. » Kë akak aţu kak apënan ka, kë kakak jibi kawooŋ lah : 8Kë aşë ji na a : « Hënk woli baanfiyaaru awo baanŧiinku wi idoluŋ uko uñoŋarënaan uŧeek wuŋ, bafiyaar ţuŋ utëbanţën. 9Kë woli bawoha wo baanfiyaar wi idoluŋ iko iñoŋarënaan itëb yuŋ, awo baanŧiinku, kjej meel mi bdëk mi Nil, kajeeş ţi mboş, meel mënţ mankak pñaak. »

Naşibaţi adat Aaron kë awo naţënk Moyiŧ

10Moyiŧ aji na Yawe Nawat Kabuka : « Ajugun, miiraan, mëmbaaŋ kahila bţup, du kpoţ te wal wi idooŋ aţiini na nji nalemparu hënk, ţiki pndemënt padiţ na nji. »

11Kë aŧeem aji : « In awuluŋ ñaaŋ mntum ba ? In ajaaŋ ado ñaaŋ abiiş bţup këme adënëm ba ? In ajaaŋ ado ñaaŋ awin këme akuulaţ ? Mënţ nji Nawat Kabuka a i ? 12Hënkuŋ yaani, dwo mntumu kayuuju uko wi ikluŋ kaţup. »

13Kë Moyiŧ aşë ŧeema aji : « Ajugun, dkooţu kooţ, yilan aloŋ nampaţi. »

14Wal mënţ kë Nawat Kabuka aşë deebaţ aji na a : « Aaron abuk şaaş, nalewit aanwo da i ? Dme kë ul aji ţup bnuura. Awuŋ abi pyit na iwi, alilan woli awinu. 15Ţiiniin na a, iţupa uko wi akyaaŋ kaţup. Nji dwo ţi mntumu na ţi mi nul kayuujan uko wi nakyaaŋ kado. 16Ul akluŋ kaţiini na bañaaŋ pa iwi, awo mntum mi nu ibot iwo pa a ji Naşibaţi, ikdooŋ kawula uşal. 17Kë pmul pi, jejan pa, pul pi pi ikdooŋ kadolna iko iñoŋarënaan. »

Pkak pi Moyiŧ du Ejiptu

18Hënk, kë Moyiŧ aşë kak du Yetro ayootanul aji na a : « Wutaan nkak du babuk paapa banwooŋ du Ejiptu nten me bawoha bajeb. »

Kë aŧeema aji : « Yaani, bgah bnuura ! »

19 Yawe Nawat Kabuka aji wal mënţ na Moyiŧ du uŧaak wi Madiyan : « Yaani, kakan Ejiptu ţiki banklaaŋ pfiŋu bŧi bakeţi. » 20Moyiŧ ajej aharul na babukul apayan ţi ubuuru aşë ŧool akak Ejiptu, amëban pmul pi Naşibaţi ajakuluŋ ajej ţi kañen.

21Nawat Kabuka akak aji na a : « Dwulu mnhina mi pdo iko iñoŋarënaan iŧum. Woli iluŋ akak Ejiptu kdo ya bŧi ţi kadun ki Farawuna Naşih, nji kë nşë dënëţëna uhaaş apokna pwut bañaaŋ bapën ţi uŧaak baya. 22Wal mënţ iţiini na Farawuna kaji na a hënk di di Yawe Nawat Kabuka aţiiniiŋ aji “Iŧrayel awooŋ bajeen naan, 23dbi jaku iwut abuk naan aya ahilna ado kadëmanaan. Kë iwi işë pok, dfiŋ abuku bajeen.” »

Pwala kaŧëmp pi abuk Moyiŧ

24Kë hënk di Yawe Nawat Kabuka ayaaŋ ayit na Moyiŧ wi anaţuŋ pnoorfën na uŧejan, aŋal pfiŋa. 25Kë Ŧipora ajej umbañ uloŋ ujul wi babomanaanuŋ plaak afal kanŧomntën ki abukul aşë jej ka akër ţi ihoţ yi Moyiŧ#4.25 Baloŋ banuŋ kë bduun bi bi bakţiiniyaanuŋ ţi.. Wi wi aşaaŋ aji : « Iwo ayin naan i pñaak. » 26Kë Nawat Kabuka aşë pën aduk Moyiŧ alowa. (Wi Ŧipora ajakuŋ ayinul i pñaak aţiiniyaan ţiini pwala kaŧëmp ukaaŋ.)

27Kë Nawat Kabuka aşë ji na Aaron : « Yaan du pndiiş iyit na Moyiŧ. » Kë ayaa, ayit na a du pnkuŋ pi Naşibaţi aşë mooka.

28Wal mënţ Moyiŧ aţup Aaron iko bŧi yi Nawat Kabuka ajakuluŋ aţup na iko iñoŋarënaan yi ajakuluŋ ado. 29Baya bukal batëb aya yitrën bantohi biki Iŧrayel bŧi. 30Aaron akakalëş baka iko bŧi yi Nawat Kabuka aţupuŋ Moyiŧ, akuţ ado iko iñoŋarënaan ţi kadun ki bañaaŋ biki Iŧrayel. 31Bafiyaara akuţ ayikrën kë Nawat Kabuka awuli baka awin mnhaj mi baka. Baŋup wal mënţ adëmana.

Currently Selected:

Ppën 4: knf

Highlight

Copy