Ppën 33

Ppën du pnkuŋ pi Ŧinayi

1 Yawe Nawat Kabuka aji na Moyiŧ : « Yaani, napënan ţi dko di, iwi na pntaali pi ipënanuŋ du Ejiptu ; nayaan du uŧaak wi mmehniiŋ aji dwul Abraham, Iŧaak na Yakob, uŧaak wi njakuŋ aji dwul wa bañaaŋ bankpënnuŋ ţi baka. 2Ddo uwanjuŧ ujotan kadun, kaşë kadook biki Kanaan, bahamorit, bahitit, baperiŧit, bahiwit na bayebuŧit. 3Yaan du uŧaak unŧumi mntow na mnob. Kë nji nşë wo mënkpaya na an kaţi pbi kaba na an ţi bgah ţiki nawo bañaaŋ bantami ikow. »

4Wi bañaaŋ baŧiinkuŋ ŋţup ŋtam ŋuŋ, aşë do ji bawo na puum. Nin aloŋ aanţu iko yi ajaaŋ añëgnaana ţiki 5Nawat Kabuka abi ji na Moyiŧ : « Jakan na babuk Iŧrayel bawo bañaaŋ batam ikow, woli dbi byaaş bloolan kaba na baka. Bawo i kapënan hënkuŋ iko yi bajaaŋ bañëgnaana, nşë nten uko wi nji kadoli baka. » 6Hënk di biki Iŧrayel bapënanuŋ iko iñëgnaana yi baka wi baklowuŋ pnkuŋ pi Horeb#33.6 pnkuŋ pi Horeb : Bakak aji badu pnkuŋ mënţ Ŧinayi..

Kaloona ki bayiti

7Woli bafëţ du dko dloŋ, Moyiŧ aji jej kaloona kaya tan ka kalowan dko di bafëţuŋ ; aţu ka katim aji kaloona ki bayiti. Kë bañaaŋ bŧi bankaaŋ uko wi phepar Yawe Nawat Kabuka baji baya dko di kaloona ki bayiti kanlowi dko di bafëţuŋ. 8Woli Moyiŧ aya du kaloona mënţ, bañaaŋ biki Iŧrayel bŧi baji banaţa. Andoli aji naţ ţi kadun ki kaloona ki nul kaşë kaţaş Moyiŧ na këş te wal wi aneejuŋ du kaloona ki bayiti. 9Moyiŧ aji neej nţe du kaloona, kanfëluŋ kaweek#33.9 kanfëluŋ kaweek : Natenan ţi Ppën 13.21 kaji kawala kabi wo ţi kadun ki ka, Nawat Kabuka kaşë kaţiini na a. 10Bañaaŋ bŧi baji bawin kanfëluŋ kanwooŋ ţi uneeji wi kaloona, andoluŋ aşë ŋup ţi kadun ki kaloona ki nul kadëman Nawat Kabuka. 11Ţi wal mënţ Nawat Kabuka aji ţiini nţe na Moyiŧ aji ŧaaŋ ŧaaŋ na a, jibi ñaaŋ ajaaŋ aţiini na nanohul. Babale Moyiŧ aji kak du dko di bafëţuŋ. Kë Yoŧuwe, naţaşa abuk Nun anjaaŋ aţënka aşë wo aanji pën ţi kaloona ki bayiti.

Pwinana pi Naşibaţi ţi kadun ki Moyiŧ

12Moyiŧ aji na Yawe Nawat Kabuka : « Tenan, ijakën nya na pntaali pi aşë wo iindolën kë mme ñaaŋ i ikdoluŋ agakandër na nji. Kë işë bi ji na nji ime'ën bnuura kë mbot awinana bnuura ţi këş ki nu. 13Hënkuŋ woli dwinana bnuura ţi këş ki nu, dkooţu kooţ dolaan mme uko wi iŋaluŋ pdo, wal mënţ kaşë me'u bnuura kabot kawinanaara winana bnuura ţi këş ki nu. Kţilma kë pntaali pi pawo pi nu. »

14Nawat Kabuka aŧeem aji : « Iŋal nji ţi uleef naan mpoş na iwi, mbot nţooran uhaaşu i ? »

15Kë aşë ji na a : « Woli iwi ţi uleefu iinkpoş na un, wutan kadolun ŋpën ţi dko di. 16Hum di di bañaaŋ bakmeeŋ kë nji na pntaali pi nu ŋwinana bnuura ţi këş ki nu woli iinkpoş na un ? Woli ipoş na un bañaaŋ başë me kë ŋpaţ na kntaali kandukiiŋ bŧi ţi umundu. »

17Kë aŧeema aji : « Ddo uko wi iheparuŋ, ţiki iwinana bnuura ţi këş ki naan, kë mbot ame'u bnuura. »

18Moyiŧ aji na a : « Dkooţu kooţ, dolaan nwin mndëm mi nu. »

19Kë Nawat Kabuka aŧeema aji : « Dyuuju bnuura bi naan bŧi, kabot kaţup ţi kadunu uko wi nji Yawe Nawat Kabuka nwooŋ. Dmiir ñaaŋ i nŋaluŋ pmiir, kañaga i nŋaluŋ kañaga. » 20Akak aji : « Iinkwin kaara di naan, ţiki ñaaŋ aanhil kawinën kawo najeb. 21Tenan, iwin plaak ploŋ pweek ţi kañog dko di nwooŋ, naţan ţi pa duuţ. 22Hënk, woli dţëp na mndëm mi naan kaţu'u ţi bhër bi plaak mënţ, kawunu na kañen ki naan te wal wi nji kaţëpuŋ. 23Kë wal wi nji kapënanuŋ kañen ki naan, iwin feţ bi naan, kë nin ñaaŋ aşë wo aanhil pwin kaara di naan. »

Currently Selected:

Ppën 33: knf

Highlight

Copy