Ppën 14
14
Pdookar na biki Iŧrayel
1 Yawe Nawat Kabuka aji na Moyiŧ : 2« Jakan na babuk Iŧrayel bakak ufeţ baya banaţ du kadun ki Pi Hahiroŧ, ţi dko danwooŋ ţi pŧoof pi Migdol na bdëk, kaŧaaŋ na Baal-Ŧefon. Natanan iloona du dko mënţ, kakab bdëk. 3Farawuna aşal kaji : “Biki Iŧrayel baneem ţi uŧaak akak añaay ñaay, pndiiş pafooy baka kë baankak ame dko dya.” 4Kë nji nşë dënëţëna uhaaş, adoo anaţa pdookar na an ; ul na bangoli biki nul bado mndëm mi naan manwinana ţi uko wi nji kadoluŋ baka, bañaaŋ biki Ejiptu bame kë nji dwooŋ Nawat Kabuka. » Kë biki Iŧrayel bado uko mënţ.
5Wi baţupuŋ Naşih i Ejiptu kë biki Iŧrayel baţii, kë uhaaş wi nul na ŋi banjaaŋ baţënka pşih ŋaşë wugşa ţi uko wi biki Iŧrayel kë başë ji : « Wel wi ŋbaaŋ ado hënk ba awut biki Iŧrayel kë baya aţañan plempar nja. » 6Farawuna ado kë batana ukaaru wi nul wi ŋmpëlënŧ ŋajaaŋ ŋapul, abot ado kë bangoli biki nul bŧi bawo bnaţ. 7Ajej ŋkaaru iñeen-week paaj (600) ŋi ŋmpëlënŧ ŋakpuluŋ ţi ŋannuurnaaniiŋ ţi ŋi nul, abot ajej ŋi Ejiptu bŧi. Ado kë naweek i bangoli apaya ţi undoli. 8Nawat Kabuka adënëţën uhaaş wi Farawuna naşih i Ejiptu, kë anaţa pdookar na biki Iŧrayel, bankpënuŋ ţi Ejiptu na mntëŋ. 9Biki Ejiptu banaţa pdookar na baka aya amob baka du dko di batanuŋ iloona yi baka kakab bdëk. Baban Pi-Hahiroŧ kaŧaaŋ na Baal Ŧefron na ŋmpëlenŧ ŋi Farawuna bŧi : ŋkaaru ŋi ŋmpëlenŧ ŋakpuluŋ, bandapiiŋ dapa ŋa na bangoli biki nul bŧi.
10Wi Farawuna akñoguŋ, biki Iŧrayel bakat këş awin kë biki Ejiptu badookar na baka. Balënk maakan aşë do idiim adu Nawat Kabuka. 11Baji na Moyiŧ : « Pnguran paanwo du Ejiptu kë idoo ţijun ŋkeţ ţi pndiiş ţi ? Wel ukaaŋ kë ipënanun du Ejiptu ba ? 12Ŋëmbi ji na iwi du Ejiptu iwutun ŋdo kalempar bañaaŋ biki da i ? Ŋhokan kado kalempar baka kë di pkeţ ţi pndiiş ? »
13Moyiŧ aŧeem baka aji : « Naklënk nin uko uloŋ, namëbaan naliinŧ, nawin uko wi Nawat Kabuka akdoluŋ nţa kabuuranaanan. Bañaaŋ biki Ejiptu biki nakwinuŋ nţa hënk, naankak awin baka. 14Nawat Kabuka agutandëran, naŧiiman ţañ. »
Uko uñoŋarënaan wi bdëk
15 Yawe Nawat Kabuka aji na Moyiŧ : « Wel ukaaŋ kë ikdo pdiim adu'ën ba ? Jakan na babuk Iŧrayel banaţa pya. 16Iwi, taran kañen ki nu, idek pmul ţi bdëk, ijeep ba ido imbaŋ itëb, bañaaŋ biki Iŧrayel bamuur bdëk ihoţ ikay. 17Nji ddënëţën ŋhaaş ŋi biki Ejiptu baneej ţi ba pţaşan. Wal mënţ Farawuna, na bangoli biki nul bŧi na ŋkaaru ŋi nul ŋi ŋmpëlënŧ ŋajaaŋ ŋapul, na bandapiiŋ dapa ŋmpëlënŧ bado mndëm mi naan manwinana ţi uko wi nji kadoluŋ baka. 18Bañaaŋ biki Ejiptu bame kë nji dwooŋ Nawat Kabuka, wal wi mndëm mi naan mankwinaniiŋ wi nji kakobuŋ Farawuna, ŋkaaru ŋi ŋmpëlënŧ ŋi nul na bandapiiŋ ŋmpëlenŧ. »
19Uwanjuŧ wi Naşibaţi unjaaŋ upoş ţi kadun ki bañaaŋ biki Iŧrayel ukak ţi kafeţ ki baka ; kë kanfëluŋ kampënnuŋ baţi te mboş kapën ţi kadun ki baka akak ţi kafeţ. 20Kaya wo ţi pŧoof pi biki Ejiptu na biki Iŧrayel. Kawo bdëm ţi umbaŋ uloŋ, aşë jeehan uŧejan du umbaŋ wundu. Kë na uŧejan bŧi, knŧuk ktëb kuŋ kaaññogari.
21Moyiŧ atar kañen ţi bdëk, kë Nawat Kabuka aşë do kë uyook uweek wi pŧaal kë ukyook ţi ba uŧejan bŧi kë meel mandoo kak ufeţ, bdëk bajeepadiir ţi pŧoof kë mboş manwooŋ ţi ba uţeeh manwinanaa. 22Biki Iŧrayel baneej ţi ba ihoţ kë iwo ikay na baka, meel manwo ji uniw uweek ţi umbaŋ udeenu na ţi umay. 23Biki Ejiptu badookar na baka, kë Farawuna na ŋmpëlënŧ ŋi nul bŧi : ŋkaaru ŋi ŋmpëlënŧ ŋakpuluŋ, bandapiiŋ ŋmpëlënŧ kë baneej aya te pŧoof pi bdëk.
24Kañog nfa, kë Nawat Kabuka du kanfëluŋ na bdoo bampënnuŋ mboş te bko duuţ aşë ten biki Ejiptu ado baka kë bayewlaa. 25Ado kë ŋkël ŋi ŋkaaru kë ŋagëj ţi mboş, kë bakya btiişu. Baji : « Najoh ŋţi, Nawat Kabuka aţok na baka agut na nja. »
26Nawat Kabuka aji na Moyiŧ : « Taran kañen ţi bdëk, meel manşë mankak ţi biki Ejiptu, ţi ŋkaaru ŋi ŋmpëlënŧ ŋajaaŋ ŋapul na ţi bampayiiŋ ţi ŋmpëlënŧ. » 27Moyiŧ atar kañen ţi bdëk, wi unuur ukyaaŋ pmay, kë meel mankak jibi mambiiŋ awo. Wi biki Ejiptu bawinuŋ kë meel mankbi aşë do na pţi kabuur, kë Nawat Kabuka aşë do meel kë manyooran baka. 28Meel mankak abi awun ŋkaaru, bampayiiŋ ţi ŋmpëlënŧ, na bangoli biki Farawuna bŧi banneejuŋ ţi bdëk adookar na biki Iŧrayel. Nin aloŋ aambuur buur. 29Kë biki Iŧrayel başë poş amuur bdëk ihoţ ikay, kë meel manşë wo ji ŋniw ŋweek, uloŋ ţi kadeenu uloŋ ţi kamayu.
30Unuur mënţ wi wi Nawat Kabuka abuuranuŋ biki Iŧrayel ţi iñen yi biki Ejiptu. Biki Iŧrayel bawin muum mi biki Ejiptu du kabaŋ ki bdëk. 31Wi bawinuŋ mnhina mi Nawat Kabuka akobnuŋ biki Ejiptu, baankak añooma, bafiyaara, ul na Moyiŧ nalemparul.
Currently Selected:
Ppën 14: knf
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
