Ppën 1
1
Pntaali pi Yakob
1Babuk Iŧrayel i bajaaŋ badu Yakob, banyaaŋ na a du uŧaak wi Ejiptu, andoluŋ na babukul biki biki : 2Ruben, Ŧimeoŋ, Lewi, Yuda, 3Iŧakaar, Ŧabulon, Benyamin, 4Dan, Neftali, Gad na Aŧer. 5Biinţ bampënnuŋ ţi Yakob bawo bañaaŋ iñeen paaj na aloŋ. Wal mënţ Yoŧef ul, ado bi woha wo du Ejiptu.
6Kë Yoŧef aşë bi keţ, ul na babuk aşin bŧi na kawuuŋ ki baka bŧi. 7Kabuk kajoobëţ na bañaaŋ biki Iŧrayel kë baŧum maakan. Baŧuma ŧum pya abot awo na mnhina, adoo niink uŧaak bŧi.
Ujun mnhaj mi biki Iŧrayel
8Naşih aloŋ nahalu anwooŋ aambaaŋ kaŧiinkaara uko wi Yoŧef apaya pşih ţi Ejiptu. 9Aji na bañaaŋ biki uŧaakul : « Naten hënkuŋ, biki Iŧrayel baŧumi abot ahina apel nja. 10Najoh ŋşal bnuura ŋdo umeli, ŋneenan pntaali pi baka pdëm kapel hënk ; ţiki baloŋ babile, ajotna nja ugut baya naakiir na baka kagut na nja kahilna kapën ţi uŧaak. »
11Kë bajej bañaaŋ baloŋ aţu baka kë bakten ulemp wi biki Iŧrayel bahilna baţu baka ŋlemp ŋtam. Kë hënk di di baţuuŋ baka pniw ubeeka wi Pitom na wi Ramŧeŧ kë ŋawo inkuŧi yi Farawuna naşih i Ejiptu. 12Jibi bakhajanuŋ baka, babaa ŧuma ŧum pya, aniink uŧaak bŧi, kë badoo kak aţi baka abot aşoor baka. 13Wal mënţ banaţa phajan biki Iŧrayel na kmëni. 14Bahajan baka na pnag kafuuş, na pdo induba, na ŋlemp ŋi uţeeh, na ŋlemp ŋŧum ŋloŋ kak. Baţu baka pdo ŋlemp ŋantamnuŋ na kmëni.
15Naşih i Ejiptu aţiini na bi Şifra na Puwa banjaaŋ babuk bukan baaţ bahebërë aji : 16« Woli nabuk bukan baaţ biki bahebërë natenan bduun bi napoţ. Woli awo ñiinţ, nafiŋana. Woli awo ñaaţ, nawuta. »
17Kë baaţ banjaaŋ babuk bukan başë wo baaññoom Naşibaţi, baando uko wi naşih i Ejiptu ajakuŋ na baka, baanfiŋ bapoţ biinţ. 18Wal mënţ kë naşih aşë du baka aji na baka : « Wel wi nadoluŋ hënk ba ? Nawut bapoţ biinţ naanfiŋ baka ? »
19Kë baŧeema aji : « Baaţ biki bahebërë baanwo ji biki Ejiptu, bawo baaţ batam, ji nabuk bukan abi ado kaban du baka, baji bado bi buk. »
20Naşibaţi awul baaţ banjaaŋ babuk bukan bnuura. Pntaali pi biki Iŧrayel kë paşë ŧuma ŧum pya, abot awo na mnhina. 21Naşibaţi awul baaţ bukuŋ bapoţ, ţiki bayuuj kë baţi'a.
22Kë Farawuna aşë ji na bañaaŋ biki uŧaak wi nul bŧi : « Bapoţ biinţ bahebërë bankbukiiŋ bŧi, nafëlan baka du bdëk ! Baaţ, nawutan baka. »
Currently Selected:
Ppën 1: knf
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
