Mariko 16

Jesũ kũriũka

(Mat 28.1-8; Luk 24.1-12; Joh 20.1-10)

1Nayo Thabatũ yathira, Mariamu Mũmagidali, Mariamu nyina wa Jakubu, na Salome makĩgũra indo nungi wega nĩ geetha makahake mwĩrĩ wa Jesũ. 2Mũthenya wa kiumia rũũciinĩ tene, riũa rĩaratha, magĩthiĩ mbĩĩrĩrainĩ. 3Nao marĩ njĩrainĩ makooranagia atĩrĩ, “Nũũ ũgũthiĩ gũtũgaragarĩria ihiga arĩthengie mbĩĩrĩrainĩ?” 4No rĩĩrĩ, maacũũthĩrĩria makĩona ihiga rĩrĩ igaragarie rĩgathengio. (Rĩarĩ ihiga inene mũno). 5Nao magĩthiĩ makĩingĩra mbĩĩrĩra, makĩona mwanake wekĩrĩĩte nguo njerũ aikarĩĩte thĩ mwena wa ũrĩo, nao magĩĩtigĩra mũno.

6Naake akĩmeera atĩrĩ, “Tigaai gwĩtigĩra, nĩnjũũĩ mũracaria Jesũ wa Nazarethi, ũrĩa ũrambirwo mũtĩ igũrũ. Ĩndĩ ndarĩ haaha nĩariũkĩĩte! Oneei harĩa maramũigĩĩte. 7#Mat 26.32; Mar 14.28 Rĩu gĩthiĩi mũkeere arutwo aake, o hamwe na Petero atĩ, ‘Nĩegũthiĩ Galili mbere yanyu; kũu nĩkuo mũrĩmuona o ta ũrĩa aamwĩrire.’ ”

8Nao makiuma mbĩĩrĩrainĩ mateng'ereete nĩ ũndũ wa gwĩtigĩra na kũnyiitwo nĩ kĩeha. Matirĩ ũndũ meerire mũndũ nĩ ũndũ wa kũmaka.

MŨRĨKĨRIE WA TENE WA IBUKU RĨA MARIKO

Jesũ kuumĩrĩra Mariamu Mũmagidali

(Mat 28.9-10; Joh 20.11-18)

[ 9Na rĩĩrĩ, rũũciinĩ tene, mũthenya wa Kiumia Jesũ aariũka, aambire kuumĩrĩra Mariamu Mũmagidali, ũrĩa aarutĩĩte ngoma mũgwanja. 10Naake Mariamu ũcio agĩthiĩ kũrĩ arutwo a Jesũ agĩkora makĩrĩra me na kĩeha. 11Akĩmeera atĩ Jesũ nĩariũkĩĩte, na atĩ we nĩamuoneete, no o makĩrega kũmwĩtĩkia.

Jesũ kuumĩrĩra arutwo aake eerĩ

(Luk 24.13-35)

12Thuutha ũcio Jesũ akiumĩrĩra arutwo aake eerĩ hĩndĩ ĩrĩa maathiaga mĩgũndainĩ, no ndahaanaga ũrĩa aahaanaga rĩa mbere. 13Nao makĩhũndũka makĩĩra arĩa angĩ atĩ nĩmoona Jesũ, no o makĩrega kũmeetĩkia.

Jesũ kuumĩrĩra arĩa ikũmi na ũmwe

(Mat 28.16-20; Luk 24.36-49; Joh 20.19-23; Atũ 1.6-8)

14Thuuthainĩ Jesũ akiumĩrĩra arutwo arĩa ikũmi na ũmwe, maikarĩĩte meethainĩ makĩrĩa. Naake akĩmakũũma nĩ ũndũ wa kũũmia ngoro na kwaga gwĩtĩkia arĩa maamuoneete ariũkĩĩte. 15#Atũ 1.8 Naake akĩmeera atĩrĩ, “Thiĩi thĩ yothe mũkahunjĩrie andũ Ũhoro Ũrĩa Mwega. 16Na mũndũ o wothe ũgeetĩkia na abatithio nĩakaahonokio, no ũrĩa ũtageetĩkia nĩagaatuĩrwo. 17Nao arĩa mageetĩkia nĩmakaaheeo hinya wa kũringa ciama: nĩmakaingata ngoma kuuma kũrĩ andũ thĩinĩ wa rĩĩtwa rĩakwa; nĩmakaaria na thiomi ng'eni; 18mangĩkaanyiita nyamũ cia thĩ kana manyue thumu matirĩ ũũru makoona, ningĩ nĩmakaigagĩrĩra arũaru mooko nao makahona.”

Jesũ kwambatio igũrũ

(Luk 24.50-53; Atũ 1.9-11)

19 # Atũ 1.9-11 Na rĩĩrĩ, Mwathani Jesũ arĩĩkia kũmahe ũhoro, agĩtwarwo igũrũ, agĩikara guokoinĩ kwa ũrĩo kwa Ngai. 20Nao arutwo magĩthiĩ makĩhunjia Ũhoro kũndũ guothe, naake Mwathani nĩakoragwo hamwe nao, ageekagĩra ũhoro wao hinya na ciama iria maaringaga. Ameni.]

MŨRĨKĨRIE ŨNGĨ WA TENE WA IBUKU RĨA MARIKO

[ 9Nao atumia acio magĩthiĩ kwĩ Petero na araata aake, makĩmahe ũhoro ũrĩa meerĩĩtwo na njĩra nguhĩ. 10Thuutha ũcio Jesũ we mwene agĩtũma arutwo mwena wa irathĩro o na wa ithũĩro makaheane Ũhoro ũrĩa Mũtheru wa ũhonokio wa tene na tene.]

Currently Selected:

Mariko 16: GKNDC

Highlight

Copy