Jakubu 5

Itonga gũkaanio

1Rĩu-rĩ, tathikĩrĩriai inyuĩ itonga ici; rĩraai na mũgirĩke nĩ ũndũ wa maũndũ mooru marĩa mekũmũkora. 2#Mat 6.19 Ũtonga wanyu nĩũbuthĩĩte na nguo cianyu nĩirĩĩtwo nĩ memenyi. 3O nayo thahabu na betha yanyu nĩrooteete. Kũroota kũu nĩ ũira atĩ nĩireganĩĩte na inyuĩ, na nĩikũmũrĩa mĩĩrĩ imũniine ta mwaki. Nĩmwĩigĩire mũthiithũ mũingĩ matukũinĩ maya ma thuutha. 4#Gũco 24.14-15 No rĩĩrĩ mũtirĩhaga andũ arĩa marutaga wĩra mĩgũndainĩ yanyu. Tathikĩrĩriai mateta maao! Mũkayo wa arĩa mamũgethagĩra irio cianyu nĩũkinyĩire Ngai, o we Mwathani Mwene Hinya Wothe. 5Mũtũũrĩre wanyu gũũkũ thĩ ũiyũrĩĩtwo nĩ mĩago na ikeno. Nĩmwĩnoreetie nĩ ũndũ wa mũthenya wa gũthĩnjwo. 6Mwanatuĩra na mũkooraga andũ matahĩtĩĩtie, o na matarĩ na ũũru na inyuĩ.

Gũkirĩrĩria na kũhooya

7Kwoguo aariũ na aarĩ a Ithe witũ, gĩkirĩrĩriei kinya rĩrĩa Mwathani witũ agooka. Taroraai ũrĩa mũrĩmi eetagĩrĩra irio cia mũgũnda wake iria cia bata ategũthethũka. Eetagĩrĩra ciurĩrwo nĩ mbura ĩrĩa nene na ĩrĩa niini. 8O na inyuĩ gĩkirĩrĩriei. Haarĩriai ngoro cianyu nĩ amu mũthenya wa Mwathani wĩ hakuhĩ gũkinya.

9Aariũ na aarĩ a Ithe witũ, tigagaai gũtetania mũndũ na ũrĩa ũngĩ nĩ geetha mũtikaanatuĩrwo nĩ Ngai. Taroraai muone mũtuanĩri e mũrangoinĩ. 10Aariũ na aarĩ a Ithe witũ, mwĩruteei na maũndũ mooru marĩa anabii meekirwo, o arĩa maaririe thĩinĩ wa rĩĩtwa rĩa Mwathani. Rekeei maũndũ macio matuĩke kĩonereria gĩa gũkirĩrĩria na gũthĩĩnĩka kwanyu. 11#Ayub 1.21-22; 2.10; Thab 103.8 Tuugaga atĩrĩ, “Gũkena nĩ andũ acio nĩ ũndũ nĩmaakirĩrĩirie.” Nĩmũiguĩte ũrĩa Ayubu aakirĩrĩirie, o na nĩmũũĩ atĩ mũthiainĩ Mwathani nĩamũheire indo nyingĩ, tondũ Mwathani nĩ mwega na mũtugi.

12 # Mat 5.34-37 No rĩĩrĩ, igũrũ rĩa maũndũ moothe aariũ na aarĩ a Ithe witũ, mũtikaanehĩte mũkĩĩranĩra ũndũ. Mũtikaanehĩte na igũrũ kana thĩ kana mwĩhĩte na kĩndũ kĩngĩ o gĩothe. Angĩkorwo mũrenda kuuga ĩĩ, ugaai “Ĩĩ”, na angĩkorwo mũrenda kuuga aaca, ugaai, “Aaca” na mũtigaatuĩrwo nĩ Ngai.

13Atĩrĩĩrĩ, nĩkũrĩ ũmwe thĩinĩ wanyu ũrathĩĩnĩka? Nĩahooe. Nĩkũrĩ mũndũ thĩinĩ wanyu wĩ na gĩkeno? Nĩainĩre Mwathani. 14#Mar 6.13 Nĩkũrĩ mũndũ thĩinĩ wanyu mũrũaru? Nĩete athuuri a kanitha mooke mamũhoere na mamũhake maguta rĩĩtwainĩ rĩa Mwathani. 15Mahooya macio mangĩhooywo na wĩtĩkio mũndũ ũcio nĩekũhona; Mwathani nĩekũmũhonia na angĩkorwo nĩareekĩĩte meehia amwohere. 16Kwoguo o mũndũ nĩoimbũragĩre mũndũ ũrĩa ũngĩ meehia maake, na o mũndũ ahooyagĩre ũrĩa ũngĩ nĩ geetha mũhonio. Mahooya ma mũndũ mũthingu nĩmakoragwo me na hinya mũnene mũno. 17#1Atha 17.1; 18.1 Elija-rĩ, aarĩ mũndũ o ta ithuĩ, na rĩrĩa aahoire Ngai na kinyi atĩ mbura ndĩkoire gũtirĩ mbura yoirire thĩ mĩaka ĩtatũ na mĩeri ĩtandatũ. 18#1Atha 18.42-45 Naake agĩcooka akĩhooya o rĩngĩ, gũkiura mbura na irio igĩkũra.

19Aariũ na aarĩ a Ithe witũ, mũndũ ũmwe wanyu angĩehera kuuma ũhoroinĩ ũrĩa wa ma-rĩ, naake mũndũ ũngĩ amũcookie, 20#Thim 10.12; 1Pet 4.8 ririkanaai atĩ mũndũ ũrĩa ũgarũraga mwĩhia kuuma njĩrainĩ ĩrĩa njũru nĩahonokagia muoyo wa mwĩhia ũcio#5.20 Nĩahonokagia muoyo wa mwĩhia ũcio: Kana; muoyo wake we mwene. kuuma gĩkuũinĩ, na agagĩtũma meehia maingĩ moohanĩrwo.

Currently Selected:

Jakubu 5: GKNDC

Highlight

Copy