1 Petero 2
2
Ihiga rĩrĩ muoyo na rũũrĩrĩ rũtheru
1Kwoguo eheriai ũũru wothe, maheeni moothe, ũhinga, ũiru wothe, na ciugo cia kũrumana ciothe. 2Tuĩkaai o ta tũkenge, mũkoragwo mũnyooteire iria rĩrĩa rĩa kĩĩroho, nĩ geetha mwarĩnyua mũgakũra na mũkahonokio tondũ 3#Thab 34.8 nĩmũcamĩĩte wega wa Mwathani o ta ũrĩa maandĩko moigĩĩte.
4Ũkaai kũrĩ Mwathani, o we ihiga rĩrĩ muoyo, rĩrĩa rĩaregirwo nĩ andũ, no harĩ Ngai nĩithuure na nĩ rĩa goro. 5Inyuĩ-rĩ, tuĩkaai ta mahiga me muoyo maraakwo nĩ geetha mũtuĩke Hekaarũ ya kĩĩroho. O na mũtuĩke athĩnjĩri Ngai atheru, mũrutagĩre Ngai magongoona megwĩtĩkĩrĩka na ũndũ wa Jesũ Kristũ. 6#Isa 28.16 Nĩ ũndũ maandĩko moigĩĩte atĩrĩ:
“Nĩthuurĩĩte ihiga rĩa goro mũno,
rĩrĩa ngũiga Zayuni arĩ rĩo rĩa mũthingi;
na ũrĩa wothe ũkaamwĩtĩkia ndarĩ hingo agaaconorithio.”
7 #
Thab 118.22
Kũrĩ inyuĩ arĩa mwĩtĩkĩĩtie-rĩ, ihiga rĩu nĩ rĩa bata mũno;
no kũrĩ arĩa mateetĩkĩĩtie:
“Ihiga rĩrĩa aaki maaregire
nĩrĩo rĩatuĩkire rĩa goro mũno mũthingiinĩ.”
8 #
Isa 8.14-15
O na maandĩko nĩmoigĩĩte handũ hangĩ atĩrĩ,
“Ihiga rĩĩrĩ nĩrĩo rĩgaatũma andũ mahĩngwo,
nĩrĩo rwaro rwa ihiga rũrĩa rũkaagũithia andũ.”
Mahĩngagwo nĩ tondũ nĩmaaregire gwathĩkĩra ciugo cia Ngai,
ta ũrĩa Ngai eendaga meekage.
9 #
Tha 19.5-6; Isa 43.20-21; Gũco 4.20; 7.6; 14.2; Tit 2.14; Isa 9.2 No rĩĩrĩ, inyuĩ mũrĩ rũũrĩrĩ rũthuure, athĩnjĩri Ngai a nyũmba ya mũthamaki, rũũrĩrĩ rũrĩa rũtheru, andũ a Ngai arĩa athuure o arĩa mathuurĩĩtwo a kũheana ũhoro wa magegania ma ciĩko cia Ngai, ũrĩa wamwĩtire mũkiuma ndumainĩ, mũgĩtoonya ũtheriinĩ wake ũrĩa mwega mũno. 10#Hos 2.23 Hĩndĩ ĩmwe inyuĩ mũtiarĩ andũ a Ngai, no rĩu mũrĩ andũ aake; hĩndĩ ĩmwe mũtiakinyĩirwo nĩ tha cia Ngai, no rĩu nĩamũiguĩrĩire tha.
Ngombo cia Ngai
11Eendwa aakwa, ndamũthaitha mwĩ ta ageni na agendi gũũkũ thĩ, mwĩrigagĩrĩrie merirĩria marĩa mooru ma mwĩrĩ, amu makoragwo hingo ciothe makĩrũa na roho. 12Mĩtugo yanyu rĩrĩa mwĩ hamwe na arĩa mateetĩkĩĩtie-rĩ, yagĩrĩirwo nĩgũkoragwo ĩ mĩega ũguo atĩ, rĩrĩa matua atĩ mũrĩ eehia, magacooka kuona ciĩko cianyu njega, na kwoguo makaagooca Ngai mũthenya ũrĩa agooka.
13Heyagaai ũnene o wothe wa andũ gĩtĩĩo nĩ ũndũ wa Mwathani, o na mwathĩkagĩre mũthamaki ũrĩa arĩ we mũnene wa moonene moothe, 14o na abarũũthi arĩa mathuurĩĩtwo nĩ mũthamaki ũcio a kũherithagia andũ arĩa meekaga mahĩtia, na kũgaathagĩrĩria arĩa meekaga wega. 15Tondũ wa rĩĩrĩ, Ngai eendaga na ũndũ wa ciĩko cianyu njega andũ arĩa ahũhũũtĩki matigane na mĩario yao ya ũrimũ. 16Ikaragaai ta andũ matarĩ ũkomboinĩ, na mũtikaahũthĩre wĩyathi wanyu kũhumbĩra mahĩtia, ĩndĩ ikaragaai ta ngombo cia Ngai. 17Heyagaai andũ oothe gĩtĩĩo; endagaai andũ arĩa meetĩkĩĩtie o ta inyuĩ, tĩĩagaai Ngai na mũheage mũthamaki gĩtĩĩo.
Mĩnyamaaro ya Kristũ ta kĩonereria
18Inyuĩ ndungata cia mũciĩ-rĩ, heyagaai anene aanyu gĩtĩĩo biũ. Mũtigaathĩkagĩre o ro arĩa me tha na ahooreri, no athĩkagĩraai o na arĩa mamũhinyagĩrĩria. 19Nĩ ũndũ mũndũ atuagwo mũthingu nĩ Ngai nĩ ũndũ wa gũkirĩrĩria ruwo rĩrĩa egũthĩĩnio tũhũ, tondũ nĩoĩ ũrĩa Ngai eendaga. 20Tondũ-rĩ, nĩ uumithio ũrĩkũ ũngĩgĩa naguo ũgũkirĩrĩria ũkĩhũũrwo nĩ tondũ wa ũndũ mũũru ũrĩa wĩkĩĩte? No ũngĩĩka ũndũ mwega ũcooke ũthĩĩnio nĩ ũndũ waguo na ũkirĩrĩrie, Ngai nĩagaakũraathima nĩ ũndũ wa gũkirĩrĩria. 21Ũndũ ũcio nĩguo mwetĩirwo, nĩ tondũ Kristũ we mwene nĩathĩĩnirio nĩ ũndũ wanyu, agĩgĩtiga aamuonereria, nĩ geetha o na inyuĩ mũrũmagĩrĩre mĩthiĩre yake. 22#Isa 53.9 We ndarĩ meehia eekire, o na gũtirĩ ũndũ wa maheeni aaririe. 23#Isa 53.7 Hĩndĩ ĩrĩa aarumirwo, nderumĩire; rĩrĩa anyariiragwo, ndaamehĩtĩire, no aigire kĩĩrĩgĩrĩro gĩake harĩ Ngai ũrĩa ũtuaga ciira na kĩhooto. 24#Isa 53.5 Kristũ we mwene nĩakuuire meehia maitũ na mwĩrĩ wake mũtharabainĩ, nĩ geetha tũkoragwo tũkuĩte ũhoroinĩ wa meehia tũgatigana namo, na tũtũũrage muoyo tũrĩ athingu. Nĩ na ũndũ wa ironda ciake mwahonirio. 25#Isa 53.6 Inyuĩ mwahaanaga ta ng'ondu ciahĩtĩĩtie njĩra, no rĩu nĩmũcookereire mũrĩithi wanyu, na no we mũmenyereri wa mĩoyo yanyu.
Currently Selected:
1 Petero 2: GKNDC
Highlight
Share
Copy
Want to have your highlights saved across all your devices? Sign up or sign in
Gikuyu Common Language Bible with DC © Bible Society of Kenya, 2014, 2018.
