Zakaria 11
11
Athamaki atou kũng'aũranio
1Wee Lebanoni, hingũra mĩrango yaku,
mwaki ũcine mĩtarakwa#11.1 Mĩtarakwa: Ihũthĩrĩĩtwo kũgweta athamaki arĩa marĩ hinya. yaku.
2Inyuĩ na inyuĩ mĩthithinda, rĩraai na mũgirĩke
tondũ mĩtarakwa nĩmĩteme ĩkarũndwo,
mĩtĩ ĩyo ĩrĩ riiri nĩmĩthuthange!
Inyuĩ na inyuĩ mĩgandi ya Bashani,
rĩraai na mũgirĩke,
tondũ mĩtitũ ĩrĩa mĩtumanu nĩmĩtherie!
3Taiguai aathani makĩrĩra nĩ kĩeha,
riiri wao nĩ mũthiru!
Taiguai ciana cia ngatia ikĩrarama,
mĩtitũ ĩrĩa ĩrĩ hũgũrũrũinĩ cia Jorodani,
kũrĩa arĩ kuo mĩciĩ yacio nĩmĩthũũkie!
Arĩithi eerĩ
4MWATHANI Ngai wakwa, agĩkĩnjĩĩra atĩrĩ, “Tuĩka mũrĩithi#11.4 Mũrĩithi: Haaha ahũthĩrĩĩtwo ta mũthamaki kana ta mũtongoria; ng'ondu nacio ta arũmĩrĩri kana andũ aake. wa rũũru rwa ng'ondu cia gũthĩnjwo. 5Atĩrĩĩrĩ, eene cio maciũragaga na matione wa kũmaherithia, meendagia nyama ciacio makoiga ‘MWATHANI arogoocwo, nĩtwetongera!’ Ningĩ arĩa macirĩithagia maticiiguagĩra tha.”
6(MWATHANI ekuuga atĩrĩ, “Ndigũcooka kũiguĩra tha mũndũ o na ũrĩkũ wa gũũkũ thĩ. Nĩgũtiganĩria ngũtiganĩria andũ oothe o mookoinĩ ma arĩa mamaathaga. Arĩa maathanaga nĩmekwananga thĩ, na ndikũmĩhonokia kuuma mookoinĩ maao.”)
7Arĩa meendagia na maagũraga ng'ondu, nĩmanyandĩkire na niĩ ngĩtuĩka mũrĩithi wa ng'ondu cia gũthĩnjwo. Ngĩkĩoya thanju igĩrĩ: rũmwe ngĩrwĩta “Ũtugi” na rũu rũngĩ ngĩrwĩta, “Ũrũmwe.” Na ngĩthiĩ na mbere kũbaarĩrĩra rũũru rũu. 8Na rĩĩrĩ, ngĩaga kũiguithania na arĩithi angĩ atatũ, arĩa maathũire, na niĩ ngĩmaingata oothe hamwe, mweri o ũmwe. 9Ngĩcooka ngĩĩra ng'ondu atĩrĩ, “Ndigũcooka kũmũrĩithia. Wa gũkua nĩakue, na wa kũniinwo nĩaniinwo. Arĩa megũtigara nĩmarĩane, ũmwe na ũrĩa ũngĩ.” 10Thuutha ũcio ngĩoya rũthanju rũrĩa ndeetĩĩte “Ũtugi,” ngĩruunanga nĩ geetha tharũrie kĩrĩĩkanĩro, kĩrĩa MWATHANI aarĩĩkanĩrĩĩte na ndũũrĩrĩ ciothe. 11Nĩ ũndũ ũcio, kĩrĩĩkanĩro gĩgĩgĩtharũrio mũthenya o ro ũcio. Na rĩĩrĩ, arĩa meendagia na maagũraga ng'ondu nĩkwĩrorera maĩndoreire na nĩmaamenyaga atĩ nĩ MWATHANI waragia ahũthĩrĩĩte maũndũ marĩa ndeekaga. 12#Mat 26.15 #Mat 27.9-10 Na niĩ ngĩkĩmeera atĩrĩ, “Mũngĩona arĩ wega-rĩ, no mũndĩhe mũcaara wakwa; no mũngĩona atarĩ wega, no mũikare naguo.” Magĩkĩndĩha mbeeca mĩrongo ĩtatũ cia betha irĩ mũcaara wakwa.
13Naake MWATHANI akĩnjĩĩra atĩrĩ, “Ciikanie na kũu mũthiithũinĩ wa Hekaarũ.”#11.13 Ciikanie ... wa Hekaarũ: Maandĩko mangĩ ma tene moigaga: ciige mũthiithũinĩ wa Hekaarũ. Nakĩo Kĩhibirania kiugaga: ciihe mũũmbi nyũngũ. Ũndũ ũyũ ũkuonania atĩ nĩgũcimena aacimenire nĩ kũnyiiha, kana nĩ ũndũ wa kwagĩrwo bata. Ngĩkĩoya mbeeca icio mĩrongo ĩtatũ, mũcaara ũcio mũnene meeciiririe nĩguo ũnjagĩrĩire, ngĩciikania na kũu mũthiithũinĩ wa Hekaarũ.
14Ngĩcooka ngĩunanga rũthanju rwa keerĩ rũrĩa ndeetĩĩte “Ũrũmwe.” Naguo ũrũmwe wa Juda na Isiraeli ũgĩtharũrio.
15MWATHANI akĩnjĩĩra rĩngĩ atĩrĩ, “Tuĩka mũrĩithi riita rĩngĩ, no rĩu ũgũtuĩka mũrĩithi ũtarĩ kĩene. 16Nĩnjigĩĩte mũrĩithi arĩithie ruũru rwakwa, no ndarũmbũyanagia na ng'ondu iria irakua, ndacaragia iria ciũrĩĩte, ndoohaga iria nyunĩku, o na ndarĩithagia iria irĩ na hinya. No rĩĩrĩ, nĩkũrĩa arĩaga nyama cia iria noru, na agaatũranga mahũngũ maacio.
17“Mũrĩithi ũcio wakwa ũtarĩ kĩene,
o ũcio ũtiganagĩria ng'ondu cia rũũru rwake, kaĩ arĩ thĩĩnainĩ-ĩ!
Arotinio guoko na akũũrwo riitho rĩa ũrĩo na rũhiũ rwa njora!
Guoko gwake kũronja o kuonja na riitho rĩake rĩa ũrĩo rĩrotumuumana!”
Currently Selected:
Zakaria 11: GKN
Highlight
Share
Copy
Want to have your highlights saved across all your devices? Sign up or sign in
Gikuyu Common Language Bible with DC © Bible Society of Kenya, 2014, 2018.
