Mariko 15

Jesũ gũtwarwo kwĩ Pilato

(Mat 27.1-2,11-14; Luk 23.1-5; Joh 18.28-38)

1Na rĩĩrĩ, rũũciinĩ tene athĩnjĩri Ngai arĩa anene magĩcemania hamwe na athuuri, arutani a Watho, na kĩama gĩothe, makĩrĩĩkanĩra ũrĩa megwĩka. Makĩoha Jesũ, makĩmuumagaria makĩmũneana kwĩ Pilato. 2Naake Pilato akĩmũũria atĩrĩ, “Wee nĩ we mũthamaki wa Ayahudi?”

Naake Jesũ akĩmũcookeria atĩrĩ, “Nĩ we woiga ũguo.”

3Nao athĩnjĩri Ngai arĩa anene magĩthitanga Jesũ na maũndũ maingĩ. 4Naake Pilato agĩcooka akĩmũũria rĩngĩ atĩrĩ, “Kaĩ ũtarĩ na ũndũ ũngĩcookia igũrũ rĩa maũndũ macio moothe maragũthitanga namo?”

5No Jesũ akĩaga kwaria rĩngĩ, naake Pilato akĩgega.

Jesũ gũtuĩrwo kũũragwo

(Mat 27.15-26; Luk 23.13-25; Joh 18.39–19.16)

6Na rĩĩrĩ, o Thigũkũ ya Bathaka yakinya, Pilato nĩohoragĩra andũ mũohwo ũmwe o ũrĩa mangĩetirie. 7Thĩinĩ wa itoi iria ciarĩ njeera, iria cioraganĩĩte hĩndĩ kwarĩ na ngũĩ, nĩkwarĩ gĩtoi gĩetagwo Baraba. 8Nao andũ makĩũngana makĩũria Pilato eeke o ũrĩa aamenyereete gwĩka. 9Naake akĩmooria atĩrĩ, “Nĩmũkwenda ndĩmuohorere mũthamaki wa Ayahudi?” 10Nĩ ũndũ nĩamenyaga atĩ athĩnjĩri Ngai arĩa anene maamũneanĩĩte kũrĩ we nĩ ũndũ wa ũiru.

11Na rĩĩrĩ, athĩnjĩri Ngai arĩa anene makĩringĩrĩria andũ meere Pilato amoohorere Baraba. 12Naake Pilato agĩcooka akĩmooria atĩrĩ, “Mũgũkĩenda njĩke atĩa na ũyũ mwĩtaga mũthamaki wa Ayahudi?”

13Nao makĩanĩrĩra magĩcookia atĩrĩ, “Mwambe!”

14Naake Pilato akĩmooria atĩrĩ, “Nĩkĩ? Nĩ ũũru ũrĩkũ eekĩĩte?”

Nao magĩkĩrĩrĩria kwanĩrĩra makiugaga atĩrĩ, “Mwambe!”

15Na tondũ Pilato nĩendaga gũkenia andũ agĩkĩmoohorera Baraba. Agĩcooka akĩhũũrithia Jesũ na kĩboko, akĩmũneana akaambwo.

Thigari gũthirĩkia Jesũ

(Mat 27.27-31; Joh 19.2-3)

16Nacio thigari igĩtwara Jesũ nyũmbainĩ ya mĩcemanio kũu thĩinĩ kwa barũũthi, na igĩĩta iria ingĩ cia mbũtũ yacio. 17Igĩcooka ikĩmũhumba nguo ya rangi wa babũ, na igĩthondeka thũmbĩ ya mĩigua ikĩmwĩkĩra mũtwe. 18Igĩkĩambĩrĩria kũmũnyũrũria ikiugaga atĩrĩ, “Ũrĩ mwega mũthamaki wa Ayahudi!” 19Igakĩmũgũtha mũtwe na karũthanju o na ikamũtuĩra mata, igacooka ikeegũithia thĩ mbere yake ta ikũmũhooya. 20Ciarĩĩkia kũmũnyũrũria ikĩmũruta nguo ĩyo ya rangi wa babũ, ikĩmwĩkĩra nguo ciake. Ikĩmuumagaria ikamwambe.

Jesũ Kwambwo

(Mat 27.32-44; Luk 23.26-43; Joh 19.17-27)

21 # Aro 16.13 Nacio irĩ njĩra igĩcemania na mũndũ wetagwo Simoni wa kuuma Kurene, ithe wa Alekisanda na Rufasi, akiuma mĩgũndainĩ. Ikĩmwatha akuue mũtharaba wa Jesũ. 22Igĩgĩtwara Jesũ, ikĩmũkinyia handũ heetagwo Gologotha, na ũguo nĩ ta kuuga, “Handũ ha ihĩndĩ rĩa mũtwe.” 23Na irĩ hau ikĩgeria kũmũhe ndibei yatukanĩĩtio na manemane, no akĩrega kũmĩnyua. 24#Thab 22.18 Igĩkĩmwamba, igĩcooka igĩcuukĩra nguo ciake mĩtĩ, igĩcigayana. 25Hĩndĩ ĩyo ciamwambire kwarĩ thaa ithatũ cia rũũciinĩ. 26Naho igũrũ wake hakĩandĩkwo ũndũ ũrĩa aathitangĩirwo atĩrĩ, “Ũyũ nĩ we Mũthamaki wa Ayahudi.” 27Igĩcooka ikĩamba atuunyani eerĩ o hau ciambire Jesũ, ũmwe mwena wake wa ũrĩo na ũrĩa ũngĩ mwena wa ũmotho. [ 28#Isa 53.12 Namo maandĩko marĩa moigaga atĩ, “Nĩatuĩrĩirwo ciira hamwe na aici,” magĩkĩhingio.]

29 # Thab 22.7; Thab 109.25; Mar 14.58; Joh 2.19 Nao andũ arĩa maahĩtũkagĩra hau moona Jesũ makĩmũnyũrũria makĩinagia mĩtwe makiugaga atĩrĩ, “Wee ũngĩratharirie Hekaarũ na ũcooke ũmĩake na mĩthenya ĩtatũ-rĩ, 30kĩĩhonokie uume mũtĩ igũrũ!”

31O nao athĩnjĩri Ngai arĩa anene na arutani a Watho makĩmũnyũrũria makiugaga atĩrĩ, “Nĩarahonokagia arĩa angĩ, no ndangĩhota kwĩhonokia we mwene! 32Kristũ, mũthamaki wa Isiraeli, ta kiume mũtharabainĩ nĩ geetha tuone twĩtĩkie!”

O nao acio maambanĩirio naake makĩmũnyũrũria.

Jesũ gũkua

(Mat 27.45-56; Luk 23.44-49; Joh 19.28-30)

33Na rĩĩrĩ, thaa thita cia mũthenya ciakinya, bũrũri wothe ũkĩgĩa nduma kinya thaa kenda. 34#Thab 22.1 Nacio thaa kenda ciakinya Jesũ akĩgũũthũka na mũgambo mũnene akiuga atĩrĩ, “Eloi, Eloi, lema sabakithani?” Na ũguo nĩ ta kuuga atĩrĩ, “Ngai wakwa, Ngai wakwa ũndiganĩirie nĩkĩ?”

35Nao andũ amwe arĩa marũũgamĩĩte hau makiuga atĩrĩ, “Taiguai, agĩĩta Elija!” 36#Thab 69.21 Naake ũmwe wao agĩteng'era agĩtobokia thibonji ndibeiinĩ ngagatu, akĩmĩtheecerera kamũrangiinĩ akĩmũkundithia, akiuga atĩrĩ, “Tarekeei tuone kana Elija nĩegũũka kũmũcuurũria!”

37Naake Jesũ akĩanĩrĩra na mũgambo mũnene, agĩcooka akĩhũũmũka na hinya mũno, agĩtuĩkana.

38 # Tha 26.31-33 Hĩndĩ ĩyo gĩtambaya kĩa Hekaarũ gĩgĩatũkana maita meerĩ, kuuma igũrũ kinya thĩ. 39Naake Mũroma mũnene wa thigari igana ũrĩa warũũgamĩĩte hau oona ũrĩa atuĩkana#15.39 Atuĩkana: Maandĩko mamwe moigaga; aanĩrĩra na atuĩkana. akiuga atĩrĩ, “Ti itherũ ũyũ oima Mũrũ wa Ngai!”

40 # Luk 8.2-3 Naho hau nĩhaarĩ atumia meeroragĩra marĩ o haraaya, amwe aao maarĩ Mariamu Mũmagidali, Mariamu nyina wa Jose na Jakubu ũrĩa warĩ mũnyiinyi, na Salome. 41Atumia acio maakoragwo na Jesũ Galili na nĩmaamũtungatagĩra. Ningĩ nĩhaarĩ na atumia angĩ aingĩ arĩa mookĩĩte naake Jerusalemu.

Jesũ Gũthikwo

(Mat 27.57-61; Luk 23.50-56; Joh 19.38-42)

42Na tondũ warĩ mũthenya wa Jumaa#15.42 Jumaa: Nĩ mũthenya wa kwĩhaarĩria nĩ ũndũ wa Thabatũ., gwakinya hwaĩinĩ, 43Josefu ũrĩa womĩĩte Arimathea agĩthiĩ kwa Pilato akĩmũũria amwĩtĩkĩrie akuue mwĩrĩ wa Jesũ. Josefu aarĩ mũndũ watĩĩtwo nĩ andũ oothe a kĩama, na aatũire eetereire gũũka kwa Ũthamaki wa Ngai. 44No Pilato akĩgĩa na nganja kana Jesũ nĩarĩĩkĩĩtie gũkua. Agĩgĩtũmanĩra Mũroma mũnene wa thigari igana akĩmũũria kana Jesũ nĩaniinĩĩte ihinda iraaya kuuma akua. 45Rĩrĩa eerirwo atĩ nĩakuĩte, agĩĩtĩkĩria Josefu akuue mwĩrĩ. 46Naake agĩthiĩ akĩgũra cuka wa gataani, agĩcuurũria mwĩrĩ, akĩwoha, akĩũiga thĩinĩ wa mbĩĩrĩra yenjeetwo thĩinĩ wa ihiga. Agĩcooka akĩgaragaria ihiga akĩhinga mbĩĩrĩra ĩyo. 47Naake Mariamu Mũmagidali, na Mariamu nyina wa Josefu makĩona harĩa mwĩrĩ waigirwo.

Currently Selected:

Mariko 15: GKN

Highlight

Copy