Kĩambĩrĩria 32

Jakubu kwĩhaarĩria gũtũngana na Esau

1Na rĩĩrĩ, Jakubu athianga na mbere na rũgendo rwake, nĩatũngirwo nĩ araika. 2Aamoona nĩoigire atĩrĩ, “Ĩno nĩ mbũtũ ya ita ya Ngai!” Kwoguo handũ hau akĩhatua Mahanaimu#32.2 Mahanaimu: Rĩĩtwa rĩĩrĩ na Kĩhibirania nĩkuuga “Mbũtũ igĩrĩ cia ita.”.

3Jakubu nĩatũmire andũ mbere mathiĩ kũrĩ mũrũ wa nyina Esau bũrũriinĩ wa Edomu 4makamwĩre atĩrĩ: “Ndungata yaku Jakubu ĩroiga atĩrĩ, ‘Ndĩratuũraga ũgeniinĩ kwa Labani. 5Ndĩ na ng'ombe, ndigiri, mbũri, ng'ondu, na ndungata. Rĩu ndĩragũtũmanĩra, wee mwathi wakwa, nĩ geetha njĩtĩkĩrĩke nĩ we.’ ”

6Rĩrĩa andũ arĩa Jakubu aatũmĩĩte maacookire nĩmaamwĩrire atĩrĩ, “Nĩtũraathiire kũrĩ mũrũ wa maitũguo Esau, na nĩarooka gũgũtũnga e na andũ magana mana (400).” 7Jakubu agĩkĩigua guoya na agĩĩtigĩra; agĩkĩgayania andũ arĩa aarĩ nao, o hamwe na ng'ondu, mbũri, ng'ombe, na ngamĩĩra ikundi igĩrĩ. 8Agĩĩka ũguo eeciiragia atĩ, Esau angĩrũa na gĩkundi kĩmwe, kĩu kĩngĩ nĩgĩkũgĩa na mweke wa gwĩthara.

9Naake Jakubu nĩahoire atĩrĩ, “Ngai wa guuka Aburahamu, na Ngai wa baaba Isaaka taathikĩrĩria! Wee, MWATHANI, nĩ we wanjĩĩrire atĩ njooke bũrũriinĩ witũ kũrĩ andũ aitũ, na nĩũkanjĩka wega. 10Niĩ ndungata yaku ndiagĩrĩirwo nĩ ũtugi wothe na maũndũ moothe ma kwĩhokeka marĩa ũnjĩkĩĩte. Ndaringire rũũĩ rwa Jorodani ndĩ o na mũthĩĩgi tu, na rĩu ndacooka na ikundi igĩrĩ. 11Ndakũhooya ũngitĩre harĩ mũrũ wa maitũ Esau, amu nĩndĩramwĩtigĩra, tondũ ahota gũũka atũtharĩkĩre, atũniine ithuothe, o hamwe na atumia na ciana. 12#Kĩa 22.17 No wee nĩwanjĩĩrire atĩ nĩũkaanjĩka wega, na atĩ nĩũkaahe njiarwa nyingĩ ta mũthanga wa iriainĩ ũrĩa ũtangĩtarĩka nĩ ũndũ wa kũingĩha.”

13Ũtukũ ũcio agĩkĩraara hau, na agĩthuura kĩheeo gĩa kũhe mũrũ wa nyina Esau kuuma harĩ mahiũ maake. 14Agĩthuura mbũri cia mĩgoma magana meerĩ na thenge mĩrongo ĩĩrĩ, ng'ondu magana meerĩ na ndũrũme mĩrongo ĩĩrĩ, 15ngamĩĩra cia gũkamwo mĩrongo ĩtatũ na tũcaũ twacio, ng'ombe mĩrongo ĩna na ndeegwa ikũmi, na ndigiri cia mĩgoma mĩrongo ĩĩrĩ na cia njamba ikũmi. 16Nĩacigayanirie ndũũru na akĩĩra ndungata ikarora rũũru rũmwe. Nĩerire ndungata atĩrĩ, “Thiĩi mbere yakwa na mũtigaakorwo mũtukanĩĩtie ndũũru, rũmwe rũkorwo rwĩ mbere ya rũrĩa rũngĩ.” 17Nĩerire ndungata ĩrĩa yarĩ na rũũru rwa mbere atĩrĩ, “Wona mwacemania na Esau mũrũ wa maitũ akũũrie atĩrĩ, ‘Mũnene wanyu nĩ ũrĩkũ? Mwathiĩ kũ? Mahiũ maya me mbere nĩ ma ũ?’ 18Mũmũcookerie atĩrĩ, ‘Nĩ ma ndungata yaku Jakubu. Amatũmĩĩte me kĩheeo kũrĩ mũnene wake Esau. Jakubu we mwene arĩ o haaha thuutha witũ.’ ” 19O na ndungata ya rũũru rwa keerĩ, o na ya rwa gatatũ, o na icio ingĩ ciothe ciarũũgamĩrĩire ndũũru agĩciĩra atĩrĩ, “Mwĩre Esau atĩrĩ mwatũngana naake, 20‘Ĩĩ, ndungata yaku ĩrĩ o haaha thuutha witũ.’ ” Jakubu eĩraga atĩrĩ, “Ngũmũhooreria na iheeo icio igũthiĩ mbere, na tuonana hiihi nĩekũnjohera.” 21Mahiũ macio ma kũheanwo agĩkiuga mathiĩ mbere, naake akĩraara hau aambĩĩte hema ũtukũ ũcio.

Jakubu kũgianĩra Penieli na mũndũ

22Ũtukũ o ro ũcio Jakubu nĩokĩrire akĩoya atumia aake eerĩ, ndungata iria igĩrĩ cia airĩĩtu, na ciana ciake ikũmi na ũmwe, makĩringa rũũĩ rwa Jaboku. 23Aamaringia nĩacookire akĩringia indo icio ingĩ ciake ciothe, 24#Hos 12.3-4 nowe agĩtigwo thuutha e wiki.

Na rĩĩrĩ, mũndũ agĩũka akĩgiana na Jakubu nginya o hakuhĩ rũũciinĩ. 25Na rĩrĩa mũndũ ũcio oonire atĩ ndehota Jakubu makĩgiana, akĩmũgũtha gĩtinainĩ gĩa kũgũrũ, nakuo kũgũrũ gũgĩthenyũka. 26Mũndũ ũcio nĩerire Jakubu atĩrĩ, “Reke thiĩ tondũ nĩkũraakĩa.”

Naake Jakubu akĩmwĩra atĩrĩ, “Ndingĩreka ũthiĩ ũtandaathimĩĩte.”

27Mũndũ ũcio nĩakĩmũũririe atĩrĩ, “Wĩtagwo atĩa?”

Naake Jakubu akĩmũcookeria atĩrĩ, “Njĩtagwo Jakubu.”

28 # Kĩa 35.10 Naake mũndũ ũcio akĩmwĩra atĩrĩ, “Ndũgũcooka gwĩtwo Jakubu, ũrĩĩtagwo Isiraeli#32.28 Isiraeli: Rĩĩtwa rĩĩrĩ na Kĩhibirania nĩkuuga “Kũgiana na Ngai.”; tondũ ũgiyanĩĩte na Ngai na ũkagiyana na andũ, na ũkahootana.”

29 # Ati 13.17-18 Jakubu nĩakĩmwĩrire atĩrĩ, “Ndagũthaitha, njĩĩra wĩtagwo atĩa.”

Naake akĩmũcookeria atĩrĩ, “Ũrenda kũmenya rĩĩtwa rĩakwa nĩkĩ?” Mũndũ ũcio nĩagĩcookire akĩraathima Jakubu.

30Jakubu nĩoigire atĩrĩ, “Nĩnyonanĩĩte ũthiũ kwa ũthiũ na Ngai, na ndĩ o muoyo.” Kwoguo agĩtua handũ hau Penieli. 31Riũa rĩarathire Jakubu akiuma Penieli, na nĩathuaga nĩ ũndũ wa harĩa aagũthĩĩtwo gĩtinainĩ gĩa kũgũrũ. 32Nginyagia ũũmũũthĩ andũ a Isiraeli matirĩaga mĩkiha ĩrĩa ĩ gĩtinainĩ gĩa kũgũrũ, amu mĩkiha ĩyo nĩ yo Jakubu aaringĩĩtwo.

Currently Selected:

Kĩambĩrĩria 32: GKN

Highlight

Copy