Gũcookerithia Maathani 27
27
Mawatho ma Ngai kwandĩkwo mahigainĩ
1Naake Musa, hamwe na atongoria a Isiraeli, makĩĩra andũ atĩrĩ, “Menyagĩrĩraai mataaro moothe marĩa ngũmũhe ũũmũũthĩ. 2#Jos 8.30-32 Na rĩĩrĩ, mũthenya ũrĩa mũkaaringa rũũĩ rwa Jorodani mũkinye bũrũri ũrĩa MWATHANI Ngai wanyu akaamũhe, hĩndĩ ĩyo mũkaahanda mahiga manene, mũcooke mamahũũre burathita. 3Ningĩ mũcooke mwandĩke mahigainĩ macio mawatho o na moorutani maya moothe. Mwarĩĩkia gũtoonya bũrũri ũcio mwega na mũnoru ũrĩa MWATHANI Ngai wa maithe maanyu amwĩrĩire, 4na mũkorwo mũringĩĩte mũrĩmo ũũrĩa ũngĩ wa Jorodani-rĩ, mũkaahanda mahiga macio kĩrĩmainĩ kĩa Ebali o ta ũrĩa ndamwatha ũũmũũthĩ, mũcooke mamahũũre burathita. 5#Tha 20.25 Mũcooke mwakĩre MWATHANI kĩgongoona hau na mahiga matarĩ maicũhie, 6nĩ ũndũ kĩgongoona o gĩothe mũgaakĩra MWATHANI Ngai wanyu kĩagĩrĩirwo nĩgwakwo na mahiga matarĩ maicũhie. Hau nĩ ho mũkaarutĩra MWATHANI Ngai wanyu magongoona ma njino. 7Ningĩ hau no ho mũkaarutĩra magongoona ma thaayũ na mũmarĩĩre o ho, mũgĩkenaga mũrĩ mbere ya MWATHANI Ngai wanyu. 8Mũkaandĩka wega mahigainĩ macio mahũũre burathita ciugo ciothe cia watho wa Ngai.”
9Naake Musa hamwe na athĩnjĩri Ngai a mũhĩrĩga wa Lawi makĩarĩria andũ oothe a Isiraeli makĩmeera atĩrĩ, “Inyuĩ andũ aya a Isiraeli, takiraai ki mũthikĩrĩrie. Ũũmũũthĩ nĩmwatuĩka andũ a MWATHANI Ngai wanyu kĩũmbe. 10Tondũ ũcio tũũraai mũmwathĩkagĩra na mũmenyagĩrĩre mawatho maake moothe marĩa ndamwatha ũũmũũthĩ.”
Irumi nĩ ũndũ wa ũremi
11Ningĩ Musa akĩarĩria andũ a Isiraeli akĩmeera atĩrĩ, 12#Gũco 11.29; Jos 8.33-35 “Mwaringa Jorodani, mĩhĩrĩga ĩno nĩyo ĩkaarũũgama kĩrĩmainĩ gĩa Gerizimu rĩrĩa andũ magaakorwo makĩraathimwo: mũhĩrĩga wa Simeoni, Lawi, Juda, Isakaru, Josefu, na wa Benjamini. 13Mĩhĩrĩga ĩno nayo nĩ yo ĩkaarũũgama kĩrĩmainĩ kĩa Ebali rĩrĩa ũhoro wa irumi ũgaakorwo ũkĩheanwo: mũhĩrĩga wa Reubeni, Gadi, Asheri, Zebuluni, Dani, na wa Nafutali. 14Nao Alawii magĩcooke maanĩrĩre na mũgambo mũnene meere andũ atĩrĩ,
15 #
Tha 20.4; 34.17; Alaw 19.4; 26.1; Gũco 4.15-18; 5.8 “ ‘Kũgwatwo nĩ kĩrumi-rĩ, nĩ mũndũ ũrĩa ũgaathondeka mũhianano wa ihiga, mũtĩ, kana wa cuuma acooke aũthaathaiye na hitho; MWATHANI nĩathũire arĩa mathaathayagia mĩhianano.’
“Nao andũ oothe macookie atĩrĩ, ‘Ameni!’
16 #
Tha 20.12; Gũco 5.16 “ ‘Kũgwatwo nĩ kĩrumi nĩ mũndũ o wothe ũtatĩĩaga ithe kana nyina.’
“Nao andũ oothe macookie atĩrĩ, ‘Ameni!’
17 #
Gũco 19.14
“ ‘Kũgwatwo nĩ kĩrumi nĩ mũndũ ũrĩa ũkũũraga mũtĩ wa mũhaka wa mũndũ ũrĩa mahakaine.’
“Nao andũ oothe macookie atĩrĩ, ‘Ameni!’
18 #
Alaw 19.14
“ ‘Kũgwatwo nĩ kĩrumi nĩ mũndũ ũrĩa ũhĩtithagia mũtumuumu njĩra.’
“Nao andũ oothe macookie atĩrĩ, ‘Ameni!’
19 #
Tha 22.21; 23.9; Alaw 19.33-34; Gũco 24.17-18 “ ‘Kũgwatwo nĩ kĩrumi nĩ mũndũ ũrĩa wogomagia ciira wa mũrũũrĩrĩ, mwana wa ngoriai, kana mũtumia wa ndigwa.’
“Nao andũ oothe macookie atĩrĩ, ‘Ameni!’
20 #
Alaw 18.8; 20.11; Gũco 22.30 “ ‘Kũgwatwo nĩ kĩrumi nĩ mũndũ ũrĩa ũconorithagia ithe na ũndũ wa gũkoma na ũmwe wa atumia aake.’
“Nao andũ oothe macookie atĩrĩ, ‘Ameni!’
21 #
Tha 22.19; Alaw 18.23; 20.15 “ ‘Kũgwatwo nĩ kĩrumi nĩ mũndũ ũrĩa ũkomaga na nyamũ.’
“Nao andũ oothe macookie atĩrĩ, ‘Ameni!’
22 #
Alaw 18.9; 20.17 “ ‘Kũgwatwo nĩ kĩrumi nĩ mũndũ ũrĩa ũkomaga na mwarĩ wa nyina kana mwarĩ wa ithe.’
“Nao andũ oothe macookie atĩrĩ, ‘Ameni!’
23 #
Alaw 18.17; 20.14 “ ‘Kũgwatwo nĩ kĩrumi nĩ mũndũ ũrĩa ũkomaga na nyina wa mũtumia wake.’
“Nao andũ oothe macookie atĩrĩ, ‘Ameni!’
24“ ‘Kũgwatwo nĩ kĩrumi nĩ mũndũ ũrĩa ũũragaga ũrĩa ũngĩ na hitho.’
“Nao andũ oothe macookie atĩrĩ, ‘Ameni!’
25“ ‘Kũgwatwo nĩ kĩrumi nĩ mũndũ ũrĩa wamũkagĩra ihaki nĩguo oorage mũndũ ũtarĩ ũũru eekĩĩte.’
“Nao andũ oothe macookie atĩrĩ, ‘Ameni!’
26 #
Agal 3.10
“ ‘Kũgwatwo nĩ kĩrumi nĩ mũndũ o wothe ũtarĩathĩkagĩra mawatho na moorutani moothe ma Ngai.’
“Nao andũ oothe macookie atĩrĩ, ‘Ameni!’
Currently Selected:
Gũcookerithia Maathani 27: GKN
Highlight
Share
Copy
Want to have your highlights saved across all your devices? Sign up or sign in
Gikuyu Common Language Bible with DC © Bible Society of Kenya, 2014, 2018.
