Gũcookerithia Maathani 17
17
1“Mũtikaanarutĩre MWATHANI Ngai wanyu ng'ombe kana ng'ondu i na kaũũgũ o na karĩkũ; MWATHANI nĩathũire ũndũ ũcio.
2“Na rĩĩrĩ, mũngĩkaigua mũndũ mũrũme kana mũndũ wa nja ũhĩtĩirie MWATHANI, akaagarara kĩrĩĩkanĩro gĩake, 3#Tha 22.20 agathaathaiya na agatungatĩra ngai ingĩ, kana akahooya riũa, mweri, kana njata, na ũguo tiguo MWATHANI aathanĩĩte gwĩkagwo; 4mũngĩkaigua ribooti ya mũthemba ta ũcio, mũkaamĩtuĩria na kinyi. Ũndũ ũcio ũngĩgaakorwo nĩ wa ma atĩ wĩhia ũcio nĩwĩkĩĩtwo Isiraeli, 5mũkooya mũndũ ũcio mũmuumie nja ya itũũra, mũmũhũũre na mahiga o kinya akue. 6#Nda 35.30; Gũco 19.15; Mat 18.16; 2Akor 13.1; 1Tim 5.19; Ahib 10.28 Mũndũ ũcio no ooragwo kũngĩkorwo he na ũira ũheanĩĩtwo nĩ andũ eerĩ kana atatũ. Ndakaanooragwo angĩkorwo no mũndũ ũmwe ũheanĩĩte ũira wake. 7#1Akor 5.13 Andũ arĩa maheanĩĩte ũira wake nĩ o magaakorwo marĩ a mbere kũmũikĩria mahiga, andũ acio angĩ nao macooke marũmĩrĩre. Ũguo nĩguo mũkeeheria ũndũ ũcio mũũru gatagatĩinĩ kaanyu.
8“Maciira mamwe mahota gũkorwo marĩ na hinya gũtuithanio nĩ atuithania arĩa mũthuurĩĩte, ta ma ihooto cia andũ cia mũthemba ũmwe kana ũrĩa ũngĩ, gũtiihanio, kana maciira megiĩ kũũragana mũndũ akĩendaga kana atekwenda. Ũndũ ta ũcio ũngĩkooneka, mũgaathiĩ handũ harĩa MWATHANI Ngai wanyu athuurĩĩte ha gũthaathayagĩrio, 9mũheane ũhoro wa ciira ũcio kũrĩ athĩnjĩri Ngai a mũhĩrĩga wa Lawi na kũrĩ mũtuithania ũrĩa ũgaakorwo arĩ wĩrainĩ hĩndĩ ĩyo, mũreke matuithanie ciira ũcio. 10Nao nĩmagaatuithania ciira, na inyuĩ mũgĩcooke mwĩke o ta ũrĩa makaamũtaara. 11Ĩtĩkaanagiai na matua maao na mũrũmagĩrĩre ũrĩa wothe marĩmũtaaraga. 12Mũndũ ũrĩa ũgaakararia mũthĩnjĩri Ngai, kana mũtuithania ũrĩa ũgaakorwo arĩ wĩrainĩ, mũndũ ũcio no mũhaka akooragwo; ũguo nĩguo mũkeeheria ũũru ũcio thĩinĩ wa Isiraeli. 13Nao andũ oothe nĩmakaigua ũhoro ũcio, metigĩre, na hatigaacooka kuoneka mũndũ ũgeeka ũndũ ta ũcio rĩngĩ.
Ũtaari wĩgiĩ mũthamaki
14 #
1Sam 8.5
“Rĩu-rĩ, mwarĩĩkia kwĩgwatĩra bũrũri ũrĩa MWATHANI Ngai wanyu ekũmũhe na mũũtũũre, hĩndĩ ĩyo nĩmũkaigua atĩ nĩmũbatarĩĩtio nĩ mũthamaki ta ndũũrĩrĩ iria ingĩ. 15Menyereraai mũno atĩ mũndũ ũrĩa mũgaathuura atuĩke mũthamaki, agaakorwo no ũrĩa MWATHANI we mwene athuurĩĩte. No mũhaka agaakorwo arĩ ũmwe wa andũ aanyu, mũtikaanathuure mũrũũrĩrĩ atuĩke mũthamaki wanyu. 16#1Atha 10.28; 2Maũ 1.16; 9.28 Mũthamaki nĩemenyerere ndakaaneigĩre mbarathi nyingĩ nĩ ũndũ wa ita ciake, na ndakaanatũme andũ mathiĩ Misiri makagũre mbarathi kuo, tondũ MWATHANI nĩoigĩĩte atĩ andũ aake matikaanacooke Misiri rĩngĩ. 17#1Atha 10.14-22,27; 11.1-8; 2Maũ 1.15; 9.27 Ningĩ mũthamaki ndakaanagĩe na atumia aingĩ, tondũ ũndũ ũcio wahota gũtũma atigane na MWATHANI, na ndakaanetongie na thahabu kana betha. 18Hĩndĩ ĩrĩa agaikarĩra gĩtĩ gĩake gĩa ũthamaki, nĩakeegĩĩra na ibuku rĩa mawatho ma Ngai o na rĩa moorutani maguo, maandĩkĩĩtwo kuuma Wathoinĩ guo mwene ta ũrĩa matũire maigĩĩtwo nĩ athĩnjĩri Ngai a mũhĩrĩga wa Lawi. 19Narĩo ibuku rĩu arĩigage hakuhĩ naake na arĩthoomage matukũ moothe ma muoyo wake, nĩ geetha amenyagĩrĩre gũtĩĩa MWATHANI na gwathĩkagĩra maũndũ moothe o ta ũrĩa maandĩkĩĩtwo thĩinĩ wa ibuku rĩu. 20Ũndũ ũcio nĩũkamũteithagia ndageetĩĩe agĩciiria atĩ we nĩ mwagĩrĩru gũkĩra Aisiraeli arĩa angĩ, o na nĩ geetha ndakaanage gwathĩkĩra watho wa MWATHANI. Hĩndĩ ĩyo nĩagathamaka mĩaka mĩingĩ, o nacio njiarwa ciake nĩigaathamakĩra Isiraeli ihinda iraaya.
Currently Selected:
Gũcookerithia Maathani 17: GKN
Highlight
Share
Copy
Want to have your highlights saved across all your devices? Sign up or sign in
Gikuyu Common Language Bible with DC © Bible Society of Kenya, 2014, 2018.
