Gen 30
30
1Ma Risera inotameyei da tuna Jeikap ke ita vivituwei na genebuna inuwakapiyei. Tuna kubiine Jeikap ivonei bo, “Aku kayowana da ati tuwa. Ke ani tuwa na ana rabobo.”
2Jeikap nuwanuwana ipughu da ivona bo, “Taku avai, taku ke kovokovoghina da God kana gawara ata viiya. Tuna iberim da ke kuta vivituwa.”
3Vaghina ma Risera ivona bo, “Aku bigabiga wavinena Biliya weni, ma tuna yavata kona kena da ini tuwa da natunatuku. Ma tuna tepanai na taku bade aku rakaraka ina rakata.”
4Tuna kubiine Risera ina bigabiga wavinena Biliya irutini Jeikap kurina da yavata ikena. 5Biliya iropeya ma ivi tuwa da natuna tomowa. 6Vaghina ma Risera ivona bo, “God ivi kamyuyuweku ma aku tou ivi yanei da natuku tomowa ivereku.” Weni berana kubiine ivi vavei ‘Dan.’
7Risera ina bigabiga wavinena ivi tuwame da natuna tomowa. 8Ma Risera ivona bo, “Avi paparana kirakai da genebuku aghekuyowei.” Tuna kubiine nani tomowa kikina ivi vavei ‘Napitali.’
9Liya damina iviiya da vituwa ivoterei na ina bigabiga wavinena Silpa irutini Jeikap kurina, iverei da kawana. 10Vaghina Silpa ivi tuwa da natuna tomowa. 11Ivi tuwa na Liya ivona bo, “Aku nuwabiibai irakata.” Tuna kubiine Silpa natuna ivi vavei ‘Gedi.’
12Liya ina bigabiga wavinena Silpa ivi tuwame da natuna tomowa. 13Vaghina ma Liya ivona bo, “Avi nuwabiibii kirakai! Karako wivine ina voneku bo, ‘Nuwabiibai wavinem.’ ” Tuna kubiine Silpa natuna ivi vavei ‘Asera.’
14Witi borina kana mara ma Ruben ikiibau ku warere da vituwa kana gegura irupanapanana na iyuna ma inae da ina maduwa Liya iverei. Risera inae da Liya ivonei bo, “Natum ina gegura ma kade ruwa kava kuta vereku bo kegha?”
15Liya ere nuwapughupughuna ivonapotei bo, “Tam namada kawaku kuyapiya ma kekayokayowei da bade natuku ina gegura kuna viiya bo?”
Ma Risera ivona bo, “Mikeda natum ina gegura kuna vereku na ani vaghinei da karako didibarai Jeikap yavata kona kena.”
16Nani ravinai Jeikap witi vaonai ivovovira na Liya iverupotei ma ivonei bo, “Tam karako yavata takena, iyamna tam namada natuku ina gegurai agimarim ikovi.” Vaghina ma, nani didibarinai inae da Liya yavata ikena.
17God, Liya ina nipowana ivi yanei na iberai da iropeya ma natuna tomowa kana vimiikovi ivi tuwei. 18Ma Liya ivona bo, “God aku miiya ivereku iyamna aku bigabiga wavinena arutini kawaku kurina da averei.” Tuna kubiine natuna ivi vavei ‘Isaka.’
19Liya iropeyame ma natuna tomowa kana vimiikovi ma sago ivi tuwei. 20Ma Liya ivona bo, “God puyo kiimatanina ivereku. Wekarakava na kawaku ina vokaraveku, natunatuna tomotomowa ivi miikovi ma sago avi tuwesi kubiine.” Ma natuna ivi vavei ‘Sebulun.’
21Ma tuna murinai na Liya ivi tuwame da natuna wavine ma ivi vavei ‘Daina.’
22Vaghina ma God, Risera inotai ma ina nipowana ivi yanei. Iberai da kovokovoghina da iti tuwa. 23Risera iropeya ma ivi tuwa da natuna tomowa ma ivona bo, “Aku vinimaya God iviitawei.” 24Ma ivi vavei ‘Josepa,’ ma ivona bo, “Ainowi Bada kurina da natuku tomowa sago ina veremeyeku.”
Jeikap ina mura irakata.
25Josepa itupuwa murinai Jeikap inae da Leiban ivonei bo, “Kade kuti vaghinei da ata nae aku ku dobu? 26Kakawaku ma natunatuku kevereku iyamna ti kubiisi na biga ghamanakina aberai tam kubiim. Ma karako kevotereku da ana nae. Kuakovi da biga irakata kirakai aberai kubiim.”
27Leiban ivona bo, “Aku sisiya kevi yanei, tam tepamuwai da Bada ivi biibiiniku da mura ghamanakina apanani. Kade gwabikuwai kuta makai mara gisina. 28Ma kevoneku am kayowana aviyavisina da ana verem.”
29Jeikap ivonapotei bo, “Kuakovi da kubiim abiga kirakai ma kuakovi da aku vikoyakoyagha kamonai na am ghamoghamo ivi koroto da irakata. 30Apisi na am mura na gisina ma wekarakava na am mura irakata kirakai ma aviyavisina peyarina aberaberai na Bada ivi biibiini. Ma wekarakava na taku ikikava? Avi maranai taku mani aku rakaraka kubiisi ana biga?”
31Leiban ivi tarakiiyanei bo, “Aviyavisina ana verem?”
Ma ivonapotei bo, “Kesago aviyavisina kuna vereku da bera sago kava kuna berai kubiiku na patana da am ghamoghamo ana koyagha bubunisi ma ana kitaruvisi. 32Karako aku kayowana da am ghamoghamo kamosiyai na sipu dumadumasi ma bade gote bodayarayaraghisi ma punepunesi ana yuna da ti na aku miiya. 33Karakava mara epipisi da kuna panani da taku bera maninina aberai. Mikeda kuna pisi da aku miiya ghamoghamosi kamosiyai kuna panani da gote ke bodayarayaraghisi ma ke punepunesi ma bade sipu ke dumadumasi na kunakovi da ti na gwabimuwai ayapi.”
34Leiban ivonapotei bo, “Vaghina, am kayowanai taberai.” 35Ma nani murinai Leiban ikiibau da gote tomotomowisi ma wivinesi bodayarayaraghisi ma punepunesi, bo kii kiruma poipoisi ma bade sipu dumadumasi na peyarisi irutinisi inae da natunatuna tomotomowisi iveresi da ita koyaghisi. 36Ma natunatuna nani ghamoghamosi irutinisi na ivomiiri da Jeikap ina makamakai gawarina ikuyowei ma ibaba da mara aroba ikovi. Ma Jeikap imakai da Leiban ina ghamoghamo makiiterena patana da ikoyakoyaghisi.
37Vaghina Jeikap inae da popla da amond da plein kiisi ragharaghasi iyuna da ikiruma, bekasi nevanevasi ipapa da kiisi ragharaghasi na kii kiruma poipoisi irumatara. 38Jeikap nani kiisi ragharaghasi iyuna da ghamoghamosi i umuma sigasi maghinosiyai itura. Nani dobunai itura iyamna ghamoghamo ipipisi uma kubiine na nani dobunai ivivi momorana. 39Nani kiisi kirukirumisi maghinosiyai ivivi momorana na ivivi tuwa da natunatusi na bodayarayaraghisi, punepunesi ma kirukirumisi.
40Jeikap ina sipu da gote gegeyisi ivinetawesi da bogiiyai iteresi. Ma iberisi da karosi ivirei Leiban ina ghamoghamo bodayarayaraghisi ma punepunesi kurisi iterei. Nakanani iberai da tuna ina ghamoghamo yavosi ivi rakati ma bogiiyai iteresi, ke Leiban ina ghamoghamo yavata iti kapusi.
41Ma meni ghamoghamosi rewapanisi ivivi momorana na Jeikap nani kiisi kirukirumisi iyuyuna da kii siga kamosiyai itutura da nani kiisi barasiyai ivivi momorana. 42Ma meni tusi mitamitasi ivivi momorana na nani kiisi ragharaghasi ke maghinosiyai ita tutura. Tuna kubiine rewapanisi natunatusi na Jeikap iyuyuna ma mitamitasi na Leiban rapenai. 43Jeikap weni nakanani iberai na ina mura irakata, ina ghamoghamo yavoyavosi ipeyari. Ma bade ina bigabiga tomotomowisi ma wivinesi ipeyari, ina kamel ma bade ina donki ipeyari.
Currently Selected:
Gen 30: pwgB
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
