Gen 29
29
Jeikap inekiibau ku Padan Aram.
1Vaghina ma Jeikap ibaba inenae da maramatana wawayisi i ku dobu inekiibau. 2Ma nani dobunai ikita ku warere da dogo sago ikitai. Ma dogo baranai na sipu yavona aroba ivivi keneyana iyamna nani sipusi na nani dogonai iumuma. Ma dogona kawana kana gudu wakimina na ghamana ma vitana. 3Ma sipu yavosi kudubina ina riyesi nani ku dogona na sipu kii koyakoyagha wakimina ina tabiratawei da sipu ini umiisi. Ma ini umiisi ina kovi na dogona kawana bade ina gudui.
4Jeikap sipu kii koyakoyagha ivi tarakiiyanesi bo, “Varevaresiku, tami na meni dobuna wawayimi?”
Ma ivonapotei bo, “Tokai akii kwanatu na Haran.”
5Jeikap ivonesi bo, “Nayo tupuna Leiban koakovi bo kegha?”
Ma ivonapotei bo, “E, kakovi.”
6Ma Jeikap ivi tarakiiyanesi bo, “Tuna vaghina bo?”
Ma ivonapotei bo, “Eee, tuna vaghina, natuna Risera ina sipu yavona yavata wepina.”
7Jeikap sipu kii koyakoyagha ivonesi bo, “Kokitai, wekarakava na madegha ghamana ma karakava kii mara da koni umiisi. Ma vaghina kovi umiisi ma bade koviinisi ina vovira da i ku kamkam gawarina biibiina.”
8Ma ivonapotei bo, “Ke kovokovoghina, sipu yavosi kudubina ina riyesi ina kovi na dogo kana gudu wakimina kana tabiratawei. Ma nani murinai na sipu kani umiisi.”
9Jeikap patana da nani tomotomowisi yavata ivivi sisiya na Risera ina mamai ina sipu yavona yavata inekiibau. Tuna na sipu kii koyakoyagha. 10Ma Jeikap, Risera ikitai da ina sipu yavata ipipisi na inae da dogo kana gudu wakimina itabiratawei ma sipu ivi umiisi. 11Vaghina ma Jeikap, Risera iyoni ma ituwei. 12Ma ivonei bo, “Taku na am mamai ina rakaraka, taku Rebeka natuna.” Tuna kubiine Risera iverau inae da ina mamai ivonei.
13Leiban sisiyina ivi yanei da natuna kikei Jeikap inekiibau na yaghiyaghinai ikiibau da ita verupotei. Ma itaraghavui, iyoni ma irutinaneyei ina ku numa. Ma Jeikap aviyavisina peyarina kurina itupuwa na Leiban ivi akovi. 14Leiban ivi yanei ma ivonei bo, “Tam na viyoku ma taraku vaghata.”
Jeikap, Liya da Risera iravaghisi.
Nani murinai Jeikap yavuna Leiban yavata imakai da nawaravi sago ikovi. 15Ma Leiban ivona bo, “Tam na aku rakaraka vaghata ma ke vaghina da kubiiku kuna biga wapawapa, tam na ke sleiv. Kevoneku da ikikava ani miiyem.”
16Leiban natunatuna wivinesi na ivi ruwa, iyarokona na Liya ma murimurina na Risera. 17Liya tuna na matanenenerina ma ke iti karawata kirakai. Ma Risera tuna tupuwina ghamana ma ivi karawata kirakai. 18Jeikap, Risera nuwanuwana iviini, tuna kubiine ivona bo, “Mikeda kuni vaghinei da natum Risera ana ravaghi na taku madegha miikovi ma ruwa kubiim ana biga.”
19Leiban ivonapotei bo, “Ke aku kayowana da tomowa wapawapa ina ravaghi ma ibiibai da tam ana verem da kuna ravaghi ma yavata tamakai.” 20Tuna kubiine Jeikap madegha miikovi ma ruwa ibiga da Risera ita ravaghi. Ma kegha da Jeikap ina nuwaviina irakata kirakai da nani madeghisi ivi miikovi ma ruwa na damina na kegha.
21Vaghina ma Jeikap, Leiban ivonei bo, “Kaku ruva kutereterei na iviiya, kawaku kevereku, aku kayowana da yavata kana kena.”
22Tuna kubiine Leiban nani dobuna wawayisi kudubina ikwatusi ipisi ma kamporagha ghamana iberai. 23Ravi ipika na Leiban natuna Liya irutini Jeikap kurina ma iverei da yavata ikena. 24Ma bade Leiban ina bigabiga wavinena Silpa irutini da natuna Liya iverei da ina bigabiga wavinena.
25Mara itom ma mara boiboiyai Jeikap ipanani da wavinena ke Risera, tuna na Liya. Maninina inae Leiban kurina ma ivonei bo, “Avi kubiine weni berana kuberai kuriku? Taku Risera kubiine abigem ma avi kubiine kuvi beroberoweku?”
26Leiban ivonapotei bo, “Weni dobunai akii kiki evonavona da ke vaghina da wavine murimurina ini nao ina tavine ma iyarokona ini muri. 27Kevi vaghinei da madegha miikovimaruwa ku tepana kuna biga na weni tavinena kamporaghina ina kovi na Risera ana verem da kuna ravaghi.”
28Ma Jeikap ivi vaghinei na nani kamporaghina ivi koviya murinai na Leiban bade natuna Risera irutini ma Jeikap iverei da kawana. 29Ma Leiban ina bigabiga wavinena Biliya irutini da natuna Risera iverei da ina bigabiga wavinena. 30Jeikap bade Risera yavata ikena ma ina nuwaviina ghamana na Risera kurina, ke Liya. Ma vaghina, madegha miikovi ma ruwa ku tepana Leiban kubiine ibiga.
Jeikap natunatuna.
31 Bada ikitai da Jeikap, Liya ke iti nuwaviina kirakiiyei na iberai da tuna na kovokovoghina da iti tuwa ma Risera na kegha. 32Liya iropeya ma ivi tuwa da natuna tomowa ma ivi vavei ‘Ruben’ ma ivona bo, “Bada aku nuwapoya iakovi ma wekarakava na kawaku ini nuwaviineku.”
33Liya bade iropeyame ma ivi tuwa da natuna tomowa ma ivona bo, “Bada ivi yanei da kawaku ke iti nuwaviina kirakiiyeku, tuna kubiine natuku tomowa kana viruwa ivereku kana vava ‘Simiyon.’ ”
34Ma bade iropeyame ma ivi tuwa da natuna tomowa, ivi vavei ‘Livai’ na ivona bo, “Natunatuku tomotomowa ivi aroba avi tuwesi, tuna kubiine wekarakava na kawaku nakeda ini nuwaviina kirakiiyeku ma kuriku ini riya.”
35Ma bade iropeyame ma ivi tuwa da tomowa ma ivona bo, “Wekarakava na Bada ana vokavakavari.” Tuna kubiine ivi vavei ‘Juda,’ vaghina ma vituwa ivoterei.
Currently Selected:
Gen 29: pwgB
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
