Gen 24

Aisiki kawana.

1Abraham na kana madegha ine kirakai da imorapa ma mara nonowa Bada ina vibiibiina gwabinai da ina yawasa kamonai na biibiina kavakava, kesago nuwapoya ita panani. 2Mara sago ina bigabiga tomowina ikwatui ipisi kurina, tuna tomowina na Abraham ina bera peyarina ivivi gayamei. Ma ivonei bo, “Imam ku tepaku keterei kevi matakira da aku kayowana kuna berai. 3Keinan damsi kamosiyai tamakamakai. Bada God tuna kunuma ma dobu iyamoni na matanai kuna vonakiiyapa kuriku da ke weni dobunai wiwike sago kuna rutini da natuku Aisiki ini kawanei. 4Kegha, kenae da aku ku dobu, aku rakaraka kurisi da nani dobunai wiwike sago kuna rutinapiyei da natuku kawana.”

5Ma bigabiga tomowina ivi tarakiiyanei, “Ma mikeda wiwike sago ana panani ma ina bara, ke ina kayowana da weni ku dobuna ina pisi na ikikava? Vaghina bo kegha da natum Aisiki ana rutinaneyei ami ku dobu vaghata?”

6Ma Abraham ivona bo, “Kegha, kegha taweyana! Ke kuna rutinaneyei nake. 7Bada God kunumai ikwatuku da aku mamai ina rakaraka ma aku dobu vaghata akuyowesi. Ma ivonakiiyapa kuriku da weni dobuna na tupurereghiku ina veresi da ini rapenei. Ma ina aneya ina vonatawei ini nao nake ini vitem da wiwike sago kuna panani da natuku kawana. 8Ma wiwikena ina bara na am vonakiiyapa kuriku kevi bagunei ma kevovirame. Ma ke meyani natuku tomowina kuna rutinaneyei nake.” 9Vaghina ma bigabiga wawayina imana ina bada ku tepana iterei ma ivonakiiyapa da ina sisiya ina votekatekei.

10Bigabiga tomowina inae da Abraham ina kamel ivi 10 irutinapiyesi ma mura ghamana, sawara bogii ma bogiiyai ku tepasi ivi tawanepeyana. Ma ivomiiri inae ku Aram Nayaraim dobuna. Ibaba inenae da Nayo ina ku kwanatu inekiibau. 11Ma kwanatu kupunai dogo imakamakai ma baranai kamel iberisi da ikenavipika. Namada ravi ipika ma tuna maranai na wivine ikiikiibau okowa ivu kubiine.

12Vaghina ma inipowana bo, “O, Bada God, tam aku bada Abraham ina God. Ainowi da kuni viteku da aviyavisina kubiine apisi na karako ana panani. Am nuwaviina aku bada kurina kuti debei. 13Kekitiku, taku weni dogona baranai amiimiiri ma weni kwanatuna damsi natunatusi wivinesi ekiikiibau okowa inivu. 14Kevi matakira kuriku da meni wiwikena kurina ati nowi bo, ‘Kade am kibubu kuta tereoruwei da atuma.’ Ma ita vonapoteku bo, ‘Kiuma ma bade am kamel kubiisi anivu da ani umiisi.’ Nakanani ini sisiya na anakovi da tuna wiwikena kuvinei da am bigabiga Aisiki kubiine. Nakanani kuna berai na am nuwaviina aku bada kurina kuni debei.”

15Karakava da ina nipowana iti kovini na Rebeka ina kibubu katagheyanai ikavaravaghai ma meyagai ikiibutawei. Wiwikena ina mamai na Betuwel, ina kwabura na Milka, ma ina doboro na Nayo, tuna na Abraham tina kikei. 16Wavinena ivi karawata kirakai, tuna wiwike gubugubu, ke meyani tomowa damina ita viiya. Ioru ku dogo da ina kibubuwai okowa ivui ma ighae.

17Vaghina ma bigabiga tomowina yaghiyaghinai wiwikena iverupotei ma ivonei bo, “Kade am kibubuwai okowa gisi vaghina kuta vereku da atumai.”

18Ivona bo, “Vaghina, bada, kiuma.” Ma yaghiyaghinai ina kibubu itereoruwei ma ivovigewai da bigabiga tomowina iuma.

19Iuma ikovi ma wiwikena ivona bo, “Bade, am ghamoghamo kubiisi anivu da ani uma dodosi.” 20Vaghina ma yaghiyaghinai okowa kibubu kamonai ituratepoi ku siga, ma iverau ivovira ku dogo da okowa itivu meyei. Ma okowa ivui inenae da kamel iuma dodowana na ivoterei. 21Bigabiga tomowina ke sago aviyavisina ita vonei, wiwikena ivivi matatetei da akovina ita viiya da vaghina wiwikena Bada ivinei bo kegha. Ivivi nuwanotanota da dobu rabarabai ibaba ipisi na Aisiki kawana inekwa kavai bo ina panani.

22Kamel iuma ikovi na bigabiga tomowina ivororona da kamel sago tepanai giyayodi ma bade imakwasi ruwa iviiya ma wiwikena iverei, sawarisi na goldiyai iyamoni. 23Ma ivi tarakiiyanei bo, “Tam am mamai na iyai? Kade ina numiyai na gawara ruvaruvana bo kegha da gwabimiyai kata kena?”

24Ma wiwikena ivona bo, “Aku mamai na Betuwel, aku doboro na Nayo ma aku kwabura na Milka. 25Ma ghamoghamo i kenakena gawarina emakamakai, rai katawei da tepanai ina kena ma bade kii vavai nani. Ma gawara emakamakai da tam bade kuna kena.”

26Vaghina ma, bigabiga tomowina ivi tuwaporeruruwana ma Bada ivokavakavari. 27Ivona bo, “Bada God, aigheghenim, tam aku bada Abraham ina God. Kuvi patutu kirakai da am agabiibai kurina kuvi debei. Kuvi noweku da maninina ina rakaraka kurisi.”

28Ma wiwikena iverau inae ina ku numa ma aviyavisina itupuwa kurina na peyarina ivi sisiyei ina rakaraka kurisi. 29Ma nani wiwikena novuna na kana vava Leiban. Ma tuna yaghiyaghinai iverau ku dogo da bigabiga tomowina ita kitai, 30iyamna yodi ma imakwasi novuna ikotekotei ikitai ma ina sisiya ivi yanei. Inae da bigabiga tomowina ipanani, patana ina ghamoghamo yavata dogo baranai imiimiiri. 31Ma ivonei bo, “Kepisi ma tanae ku numa, damim aviiya da tam na Bada ina vibiibiina kamonai. Avi kubiine we koimiiriyana? Namada tami kubiimi gawara kavovunagha ikovi ma bade ami ghamoghamo kubiisi.”

32Vaghina ma, Leiban nani bigabiga tomowina irutini inae ina ku numa. Ma kamel i vita ivi oruni, ivi kanisi ma i kenakena gawarinai na rai vuna itawei da tepanai ita kena. Ma bade okowa ikavarapiyei da bigabiga tomowina ina wawaya yavata kaesi ita kowa. 33Vavai itura da ita kam ma bigabiga tomowina ivona bo, “Kegha, muriyai da ana kam na kunona ani akovimi da avi kubiine apisi.”

Ma Leiban ivona bo, “Vaghina, kevi sisiya.”

34Vaghina ma ivona bo, “Taku na Abraham ina bigabiga. 35Ma Bada aku bada ivi biibiini ma iberai da ina mura irakata kirakai. Ivi biibiini da sipu ma kau yavoyavosi, ina silva ma gold irakata, ina bigabiga wivinesi ma tomotomowisi ipeyari ma ina kamel da donki yavata. 36Ma aku bada Abraham kawana Sera imagura kirakai ma kegha da ivi tuwa da natuna tomowa, kana vava na Aisiki. Ma Abraham ina mura kudubina na ivi damani natuna kurina. 37Aku bada sisiya bagibagina ivereku, avonakiiyapa kurina da ke Keinan dobuna damsi kamosiyai wiwike sago ata rutini da natuna Aisiki iti kawanei. 38Ivoneku da ata pisi wike ina ku dobu, ina rakaraka kurimi da kamomiyai wiwike sago ata rutinaneyei da natuna kawana.

39Ma aku bada Abraham avi tarakiiyanei, ‘Ma mikeda wiwikena ina bara da ke ina pisi na ikikava?’

40Ma ivoneku bo, ‘Bada mara nonowa gwabikuwai na tuna ina aneya ina vonatawei ini vitem da wiwike kuna panani. Aitumaghana da kuna nae na wavine sago aku rakaraka kamosiyai kuna rutini da natuku ini kawanei. 41Ma mikeda aku rakaraka ke ini vaghinei da wiwike sago kamosiyai kuna rutini na ke kuni nuwapoyei. Nakanani ina tupuwa na am vonakiiyapa kamonai ana votawem. Kovogha ke kuna panani.’

42Nakanani aku bada ivi sisiya kuriku, vaghina ma ababa apisi da karako anekiibau ku dogo na anipowana bo, ‘O, Bada God, tam na aku bada Abraham ina God. Kevi viteku da aviyavisina kubiine apisi na karako ana panani. 43Kekitiku, taku weni dogo baranai amiimiiri ma wavine wiwikena sago ina pisi okowa itivu kubiine na ani nowi kurina bo, “Kade am kibubu kuta tereoruwei da atuma.” 44Mikeda ina vonapoteku bo, “Kiuma ma bade am kamel kubiisi anivu da ani umiisi,” na anakovi da tuna wiwikena kuvinei da aku bada natuna kawana.’

45Karakava aku nipowana nuwanuwakuwai ati kovini na Rebeka akitai, ina kibubu katagheyanai ikavaravaghai ma ioru ku dogo da itivu. Ivu ma avonei bo, ‘Kade atuma bo kegha?’

46Yaghiyaghinai ina kibubu itereoruwei ma ivona bo, ‘Kiuma ma bade am kamel ani umiisi.’ Vaghina ma auma ma bade aku kamel ivi umiisi.

47Ma avi tarakiiyanei bo, ‘Tam am mamai na iyai?’

Ma ivonapoteku bo, ‘Aku mamai na Betuwel, aku doboro na Nayo ma aku kwabura na Milka.’ Avi yanei na vaghina, giyayodi sago ma imakwasi ruwa averei. 48Vaghina ma, avi tuwaporeruruwana ma Bada God avokavakavari, avona bo, ‘Bada aigheghenim, tam aku bada Abraham ina God. Kuvi noweku da maninina Abraham tina kikei kurina da tupuna wavinena apanani da natuna kubiine.’ 49Ma vaghina, wekarakava na kade aku bada Abraham kurina ami nuwaviina koni debei bo kegha da akovina ana viiya. Koni akoviku ma muriyai da aku nota ana rereghi da aviyavisina ana berai.”

50Ma Leiban da Betuwel ivonapotei bo, “Ke ruvaruvana da ikikava kana vonem. Weni tuna na Bada ina kayowana. 51Vaghina, Rebeka na weni. Kerutini ma kona nae da am bada natuna ini kawanei. Bada ina kayowana takivini.”

52Ma Abraham ina bigabiga i sisiya ivi yanei na itawotei da maghighina ku tano itereoruwei ma Bada kurina ivi kiikiiwa. 53Ma posaru, imakwasi ma yodi, silva ma goldiyai iyamona na Rebeka ipuyoi ma bade gara yavata. Muriyai na ina maduwa ma novuna ipuyosi, nani puyosi na miiyanisi irakata kirakai.

54Vaghina ma peyarisi ikam ma iuma patapata ma bigabiga tomowina ina wawaya yavata na Rebeka ina rakaraka gwabisiyai ikena.

Mara boiboiyai ivomiiri ma ivona bo, “Kovonatawekai kana vovirame aku bada Abraham kurina.”

55Ma Rebeka ina maduwa ma novuna ivona bo, “Kegha, karakava. Wiwikena na mara ivi 10 gwabikiiyai ina makai ma nani murinai kona nae.”

56Ma ivonapotesi bo, “Ke kona vonatanikai. Bada iberai da avi kubiine ababa apisi na namada apanani ikovi. Tuna kubiine wekarakava kovonatawekai kana vovirame aku bada Abraham kurina.”

57Vaghina ma ivona bo, “Wiwikena takwatui ina pisi ma titarakiiyanei da tuna mani ina kayowana ina voneta.” 58Rebeka ikwatui ipisi ma ivonei bo, “Wekarakava weni tomowina yavata kona nae bo kegha?”

Ma ivonapotesi bo, “E, vaghina, aku kayowana da yavata kana nae.”

59Vaghina ma Rebeka ivonatawei da bigabiga tomowina ina wawaya yavata inae. Ma ina bigabiga sago yavata inae, tuna wavinena na kana koyakoyagha. 60Ivomiiri da ita nae ma Rebeka ina rakaraka ivonakiiyaragha kurina bo,

“Novukai, kevi tuwa kirakai da natunatum ina peyari.

Tupurereghim ini rewapana kirakai ma kii ghavighaviya ina ghegavovorisi da i kwanatu ini rapenei.”

61Vaghina ma Rebeka ina bigabiga wivinesi yavata ivovunagha ikovi na i ku kamel igeru ma nani bigabiga tomowina yavata ivomiiri inae.

62Tuna maranai Aisiki na namada dogo kana vava Be Layai Roi ivoterei da Negev dobunai imakamakai, tuna na Keinan ina parata kamonai. 63Mara sago ravi ipika na ikiibau ku dobu yagharina ma ivivi nuwanotanota. Ma itepa da ikitataweyana ma ikita da kamel viya ibaba ipipisi. 64Ma bade Rebeka itepa da Aisiki ikitai. Ina kamel tepanai ioru ma inae da 65Abraham ina bigabiga ivi tarakiiyanei bo, “Meni tomowina everaverupotepoteta?”

Ivona bo, “Tuna na aku bada natuna.” Vaghina ma, vokarava kubiine Rebeka gayamina kana gere iviiya da maghighina igerei.

66Ku taki inekiibau na bigabiga tomowina ivi sisiya Aisiki kurina, aviyavisina kudubina itupuwa na ivonaverei. 67Vaghina ma Aisiki da Rebeka itavine ma ivi ruwa inae Sera ina ku yobe. Muriyai da Rebeka ita nekiibau na Sera irabobo da Aisiki ina maduwa kubiine ivi nuwapoya. Ma itavine na kawana nuwanuwana ivii kirakiiyei, tuna kubiine nuwanuba ipanani.

Currently Selected:

Gen 24: pwgB

Highlight

Copy