Gen 25
25
Abraham natunatuna viya.
1Abraham wavine sago irutini da kawana vuna. Wavinena kana vava Ketura. 2Ivi tuwa da natunatuna Simram, Jokisan, Medan, Midiyan, Isibaki ma Suwaya. 3Jokisan natunatuna na Seba ma Dedan. Ma Dedan tupurereghina na Asura damsi, Letusi damsi ma Leyum damsi. 4Ma Midiyan natunatuna na Epa, Eperi, Hanoki, Abida ma Elda. Weni wawayisi peyarisi na Ketura tupurereghina.
5Ma Abraham na aviyavisina rapenai peyarina na natuna Aisiki kurina ivi damani. 6Ma karakava da ita rabobo na natunatuna tomotomowisi kakawana viya gwabisiyai na puyo irereghi kurisi. Ma ku maramatana ivonatawesi ine rabaraba da ke Aisiki gwabinai ita makai.
Abraham irabobo.
7Abraham imakai da kana madegha 175. 8Imakii bubuna da ina yawasa iguri ma imagura kirakai, vaghina ma irabobo. 9Natunatuna Aisiki da Ismayel tupuwina iviini inae ku karawaga da ku buba kamona iterei. Nani bubana na Makipela dobuna kamonai emakamakai, tuna na Mamre ririnai. Karenai tuna tanona na Hiti tomowa Eperon rapenai, tuna Soya natuna. 10Muriyai Abraham inae da Hiti damsi gwabisiyai igimari ma kawana tupuwina nani bubana kamonai iterei. Ma Abraham irabobo na bade bubana kamonai, kawana Sera yavata idogosi.
11Abraham irabobo murinai na natuna Aisiki dogo kana vava Be Layai Roi na ririnai imakamakai. Ma God, Aisiki ivi biibiini.
Ismayel natunatuna.
12Weni tuna na Abraham natuna Ismayel ina varagutugutu. Tuna na Heiga natuna ma Heiga na Sera ina bigabiga wavinena, ina dobu na Egypt.
13Ismayel natunatuna tomotomowisi kii vava na weni, i tupuwa nununai tagiruma. Natuna iyarokona na Nebayoti, tuna murinai na Keda, Adebel, Mibsam, 14Misma, Duma, Masa, 15Hadadi, Tema, Jetura, Napis ma Kedema. 16Weni damsi na Ismayel natunatuna, ti na dam ivi 12 i kaekiki mau. Ma ti na i meyagai ma i taki nununai ivivi makiiyana. 17Ma Ismayel imakai da kana madegha 137 ma irabobo. 18Ma tupurereghina peyarisi i dobu na Havila da ku Sura warerena, dobuna na Egypt ina parata ririnai ma ku maramatana. Keta sago enenae ku Asura dobuna ma nani ketana kuta viiya na i dobu kuta panani. Ma peyarisi mara nonowa ti mani i rakaraka yavata ivivi kawapata.
Jeikap ma Iso itupuwa.
19Weni tuna na Abraham natuna Aisiki ina varagutugutu. 20Aisiki kana madegha 40 ma itavine, kawana na Rebeka. Rebeka ina mamai na Betuwel ma novuna na Leiban. I dobu ghamana na Arameya ma i dobu gisina kana vava na Padan Aram.
21Ma Rebeka na gagarina. Tuna kubiine Aisiki inipowana Bada kurina da iti tuwa ma ina nipowana ivi yanei. Vaghina ma, Rebeka iropeya. 22Ma damina iviiya da iti tuwa da wawayaruwa ma pepeyisi na manawina kamonai ivivi papareyana. Ma i maduwa ivona bo, “Weni tuna na avi berana etuputupuwa kuriku?” Tuna kubiine ivi nowi Bada kurina da akova ita viiya.
23Ma Bada ivonapotei bo,
“Pepeyisi kamomuwai ina magura na ini tuwa da dam ruwa,
ma ivi ruwa na ini kawapata.
Murimurina ina dam ini rewapana kirakai
da iyarokona ina dam ina ghekuyowesi.
Ma murimurina na iyarokona ini badei.”
24Kana mara ipisi da iti tuwa ma ivi tuwa da tomotomowa ruwa. 25Natuna iyarokona na buroburona ma inikorokorona tuna kubiine ivi vavei, ‘Iso.’ 26Ma murimurina ikiikiibau na iyarokona ku kaekarena ivokikita vaghata, tuna kubiine ivi vavei, ‘Jeikap.’ Aisiki kana madegha 60 na Rebeka nani ededisi ivi tuwesi.
Iso iyaroko buderina ivi wapai.
27Vaghina ma, nani tomotomowisi imagumagureyana na Iso tuna yebagha bogana ma dipa kana wawaya. Ma Jeikap tuna kawapotapotana ma numiyai, yobe kamosiyai imakamakai. 28Aisiki ina kayowana ghamana siya tuna kubiine ina nuwaviina Iso. Ma Rebeka, tuna ina nuwaviina ghamana Jeikap.
29Mara sago Jeikap bini yebayebarisi ivivi tavi ma Iso dipiyai ikiibau. Inekiibau na vitonara ikara kirakiiyei 30tuna kubiine ivona bo, “Vitonara ikara kirakiiyeku, bini kuta vereku da ata kani.” (Iso kana vava sago na Edom, tuna vavana iyamna ‘yebayebarina.’)
31Ma Jeikap ivonapotei bo, “Kunona kuni vaghinei da iyaroko buderina kudubina kuna vereku da rapekuwai na vaghina.”
32Iso ivona bo, “Kekitiku, vitonara ekarakara kirakiiyeku da gisina kava ma ana rabobo. Aviyavisina biibiina nani buderina kamonai ana panani?”
33Jeikap ivonapotei bo, “Kunona vonakiiyapa bagibagina keterei, kuni vaghinei da am buderi ana viiya.”
Vaghina ma, Iso ivi vaghinei. Ina vonakiiyapa bagibagina iterei da aviyavisina kudubina i mamai iti damani kurina na ke tuna ina viiya ma Jeikap ini rapenei. 34Muriyai Jeikap parawa da bini iverei da ikam ma iuma ikovi ma ivomiiri da inae.
Ma vaghina, Iso ina ‘buderi’ ivi wapai ma kesago iti nuwapoyei.
Currently Selected:
Gen 25: pwgB
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
