HANDELINGE 28

Paulus en sy reisgenote op die eiland Malta

1Nadat ons veilig aan wal gekom het, het ons uitgevind dat die eiland Malta genoem word. 2Die inboorlinge was buitengewoon vriendelik teenoor ons. Dit het begin reën en dit was koud. Hulle het toe ’n vuur aangesteek en ons almal genooi om daar te kom sit.

3Paulus het ’n klomp hout bymekaargemaak en op die vuur gegooi. Van die hitte het daar ’n slang uitgekom en hom aan sy hand gepik. 4Toe die inboorlinge die gedierte aan sy hand sien hang, sê hulle vir mekaar: “Hierdie man is beslis ’n moordenaar. Al is hy uit die see gered, het geregtigheid hom nie toegelaat om te bly lewe nie.#28:4 Of Al is hy uit die see gered, het geregtigheid hom nou ingehaal – hy sal beslis doodgaan!”

5Paulus het egter die ongedierte in die vuur afgeskud en geen nagevolge gehad nie. 6Hulle het verwag dat hy sou opswel of skielik morsdood#28:6 Grondteks as ’n lyk. neerslaan, maar nadat hulle ’n lang ruk gewag het en gesien het dat daar niks buitengewoons met hom gebeur nie, het hulle van mening verander en begin sê hy is ’n god.

7Daar was ’n plaas in daardie omgewing wat aan die hoof van die eiland, ’n man met die naam Publius, behoort het. Hy het ons ontvang en drie dae lank vriendelik as sy gaste gehuisves. 8Dit het so gekom dat Publius se pa in die bed was, siek aan maagkoors. Paulus het na hom toe gegaan, en nadat hy gebid het, het hy sy hande op hom gesit en hom gesond gemaak. 9Ná hierdie voorval het ook die ander siekes op die eiland gekom, en is hulle gesond gemaak.

10Hulle het ons met baie eerbewyse oorlaai, en toe ons wou wegvaar, het hulle vir ons alles opgelaai wat ons nodig gehad het.

Van Malta af Rome toe

11Na drie maande is ons daar weg met ’n skip wat by die eiland oorwinter het, ’n Aleksandrynse skip met die Dioskuri#28:11 Die Dioskuri is die Romeinse tweeling-gode, Kastor en Polluks. as boegbeeld. 12Ons het by Sirakuse op die eiland Sisilië vasgemeer en drie dae daar oorgebly. 13Daarvandaan het ons verder gevaar en in Regium gekom, heel in die suide van Italië. Na nog ’n dag het daar ’n suidewind begin waai, en op die tweede dag was ons in Puteoli. 14Daar het ons gelowiges#28:14, 15a Grondteks broers. teëgekom wat ons uitgenooi het om sewe dae by hulle te bly. En só het ons Rome bereik.

15Die gelowiges#28:14, 15a Grondteks broers. in Rome het van ons gehoor, en party van hulle het ons by die Appiusmark#28:15b Die Appiusmark is ongeveer 70 kilometer van Rome af. kom ontmoet en ander by die Drie Herberge#28:15c Die Drie Herberge is ongeveer 57 kilometer van Rome af.. Toe Paulus hulle sien, het hy God gedank en moed geskep.

Paulus in Rome

16Na ons aankoms in Rome is Paulus toegelaat om op sy eie te woon met ’n soldaat wat hom bewaak.

17Drie dae later het hy die Joodse leiers na hom toe uitgenooi. Toe hulle bymekaargekom het, het hy vir hulle gesê: “Geagte broers#28:17 Grondteks Manne-broers., ek het niks teen ons volk of teen die gebruike van ons voorvaders gedoen nie, en tog is ek as gevangene uit Jerusalem aan die Romeine uitgelewer. 18Die Romeine het my verhoor en wou my loslaat omdat daar in my geval geen rede vir die doodstraf was nie.

19“Maar omdat die Jode daarteen beswaar gemaak het, kon ek nie anders as om na die keiser te appelleer nie, alhoewel ek my volk nie van iets wil aankla nie.

20Dit is dan die rede waarom ek u laat roep het om u te sien en met u te praat. Ek is in hierdie boeie omdat ek glo dat die hoop van Israel, die Messias, reeds gekom het.#28:20 Grondteks Ek is in hierdie boeie ter wille van die hoop van Israel.”

21Toe sê hulle vir hom: “Ons het geen briewe oor jou van Judea af gekry nie, en nie een van ons broers#28:21 Of volksgenote. het enige nuus gebring of iets kwaads van jou gesê nie. 22Ons wil graag van jou hoor hoe jy oor die hele aangeleentheid dink, want ons verneem dat hierdie splintergroep oral omstrede is.”

23Hulle het toe ’n dag met hom vasgemaak, en op daardie dag het daar nog meer mense na sy blyplek gekom. Van vroeg die môre tot laat die aand het Paulus vir hulle die koningsheerskappy van God verduidelik en daaroor getuig. Hy het hulle uit die wet van Moses en uit die profete probeer oortuig van Jesus. 24Sy woorde het party oortuig, maar ander wou nie glo nie.

25Toe ’n ernstige meningsverskil ontstaan, het hulle begin padgee. Paulus het egter nog vir oulaas een stelling teenoor hulle gemaak: “Hoe van toepassing is dit tog wat die Heilige Gees by monde van die profeet Jesaja vir julle voorvaders gesê het, naamlik:

26‘Gaan na hierdie volk toe en sê:

Julle sal my woorde hoor

en tog nie verstaan nie.

Julle sal sien wat Ek doen,

en dit tog nie werklik

begryp nie.

27Ja, die hart van hierdie volk

het verhard,

en hulle hoor swaar met hulle ore,

en hulle het hulle oë toegemaak

sodat hulle nie dalk

met hulle oë sien

en met hulle ore hoor

en met hulle hart begryp

en tot bekering kom

en Ek hulle gesond maak nie.’#28:26-27 Jes 6:9-10.

28“Van nou af moet julle goed besef dat hierdie verlossing van God nou vir die nie-Joodse nasies beskikbaar gestel word. En húlle sal luister.”#28:28 Sommige manuskripte het ook ’n vers 29 En nadat Paulus dit gesê het, het die Jode vertrek, terwyl hulle baie onder mekaar geredeneer het.

30Paulus het ’n volle twee jaar lank in sy eie gehuurde huis gebly#28:30 Of vir sy eie verblyf gesorg., en hy het almal ontvang wat by hom aangedoen het. 31Hy het verkondig dat God as koning regeer, en die mense alles oor die Here Jesus Christus geleer. Hy het dit ongehinderd en met die grootste vrymoedigheid gedoen.

Currently Selected:

HANDELINGE 28: NLV

Highlight

Copy