ECCLESIASTES 3

Walay Panaon na Balang Sakey a Bengatla

1Amin a nagagawa diad tapew na dalin nagagawa ed panaon a pipilien na Dios.

2Igegetar toy panaon na kianak

tan say panaon na ipatey,

say panaon na pantanem

tan say panaon na panani,

3Say panaon na pampatey

tay say panaon na pampaabig,

say panaon na pangigeba

tan say panaon na pamaalagey.

4Igegetar toy panaon na panermen

tan say panaon na panliket,

say panaon na pandageyem

tan say panaon na pansayaw,

5say panaon na panakdul

tan say panaon na panarawian;

say panaon na pananguban

tan say panaon na ag pananguban.

6Igegetar toy panaon na pananap

tan say panaon na pangibalang,

say panaon na pantipon

tan say panaon na pambantak,

7say panaon na pampilat

tan say panaon na pandait,

say panaon na panolimek

tan say panaon na pansalita,

8Igegetar toy panaon na pangaro

tan say panaon na pambosul,

say panaon na bakal

tan say panaon na kareenan.

9Antoy nagunggona na sakey a too ed saray kimey to? 10Amtak iray ambelat a kimey ya inter na Dios ed sikatayo. 11Inggetar toy manepeg a panaon na amin a bengatla. Initdan to tayo na pilalek a mangamta na arapen, balet ag ton balut iter ed sikatayoy kapenek na ayadyarin pakatalus ed saray gagawaen to. 12Kanyan abirbir ko ya anggapo lay magmaung nin nagawaay too, no ag say panliket tan panggaway maabig legan ton mambilay. 13Amin tayo nepeg ya oninom tan mangan tan panliketan so nansagputan tayo, ta rigalo ra na Dios.

14Amtak a mansiansiad ando lan ando ya amin iray gagawaen na Dios. Anggapoy nayarin iyarum ed sikara odino ekalen ed sikara. Onyay impaakseb na Dios, pian nawalaan itayoy panangigalang ed sikato. 15Antokaman a nagagawa odino nayarin nagawa et agawa la nen saman. Say Dios olit-oliten ton gawaen so nagagawa.

Say Ag Inkatonung diad Tapew na Dalin

16Aliwan saya labat; naimanok met a diad sayan mundo naalmo so kaogsan, anta kaptekan tan katonungan komun so naalmo. 17Inkuankod siak a dili, Sintinsiaan na Dios so inkatonung tan say kaogsan, lapud amin a bengatla tan amin a kimey et nagawa onung ed nigetar a panaon da.#3:17 Say sankanayarian a tiksto onung ed nigetar a panaon da; diad tikston Hebreo onung ed nigetar a panaon dad man. 18Ninunot ko a say Dios et susuboken to ray totoo, pian nipanengneng tod sikara ya anggapoy pidomaan dad saray ayayep. 19Ta say nagawa ed saray totoo et nagawa met ed saray ayayep; ompatey iran amin. Nampara ra a pinalsa. Anggapoy panmaungan na too ed ayep lapud andi-kakanaan so bilay para ed sikaran dua. 20Mansumpal iran dua ed saksakey a pasensay dabuk. Dabuk so nanlapwan da, dabuk so pawilan da. 21Siopay makapangibaga ya onlad tagey so ispiritu na too, balet onlad dalem na dalin so ispiritu na ayep? 22Abirbir ko sirin a say sankaabigan a nagawaan tayo et say panliket ed saray nansagputan tayo. Anggapo lay arum a nagawaan tayo.#3:22 saray...nagawaan tayo; odino kimey tayo, lapud gawaen tayo met ni lamlamang. Anggapoy polaing a pakaamtaan tayo no antoy nagawad sikatayo kayari na ipatey tayo.

Currently Selected:

ECCLESIASTES 3: PnPV

Highlight

Copy