زِکَرئیّا 13
13
گوناهدان تمئزلَنمه
1او گون بئر چِشمه آچیلاجاق کی، داوود نسلئنی و اورشلئمده یاشایانلاری گوناهدان و نجئسلئکدن تمئزله‌سئن. 2او گون اؤلکه‌دن بوتلرئن آدینی بئردفه‌لئک سئله‌جیم، اونلار بئر داها خاطیرلانمایاجاقلار. یالانچی پیغمبرلری ده، نجئس روحو دا اؤلکه‌دن گؤتوره‌جیم.» قوشونلار ربّی بویورور. 3«اگر کئمسه گئنه نبئلئک اتسه، اونو دونیایا گتئرمئش آتا-آناسی اونا دئیه‌جک: ”سن یاشایا بئلمزسن، چونکی ربّئن آدی ائله یالان دیئبسن.“ نبئلئک ادنده اؤز آتا-آناسی اونون بدنئنی دِشه‌جکلر. 4او گون هر پیغمبر، نبئلئک اِدَرکَن، اونا نازئل اولان رؤیادان اوتاناجاق. او داها ائنسانلاری آلداتماق اوچون توکلو پالتار گِیمیه‌جک. 5او دئیه‌جک: ”من پیغمبر دیئلم، اَکئنچئیَم. جاوانلیغیمدان بئر آدام منی اؤزونه قول اتدی.“
6او بئری اوندان سوروشاجاق: ”بس سئنَنده‌کی بو یارالار نه‌دئر؟“ او دا دئیه‌جک: ”دوستلاریمین اِوئنده آلدیغیم یارالاردیر.“
چوبانین هلاکی
7اویان، ای قیلینج،
چوبانیمین، یاخینیمین اوستونه گت.»
قوشونلار ربّی بویورور.
«چوبانی وور،
قویونلار داغیلار.
من ده اَلئمی کئچئکلرئن ضئدّئنه قالدیرارام.
8بوتون اؤلکه‌ده
خالقین اوچده ائکئسی وورولوب اؤلدوروله‌جک،
لاکئن اوچده بئری اوندا قالاجاق.»
رب بویورور.
9«قالان اوچده بئرئنی اودا سالاجاغام،
اونلاری گوموشو تمئزله‌یَن کئمی تمئزله‌یه‌جیم.
قیزیلی یوخلایان کئمی یوخلایاجاغام.
اونلار منئم آدیمی چاغیراجاقلار،
من ده اونلارا جاواب ورئب
”بونلار منئم خالقیمدیر“ دئیه‌جیم،
اونلار دا ”رب تاریمیزدیر“ دئیه‌جکلر.
Currently Selected:
زِکَرئیّا 13: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
