مرقوس 5
5
ناپاک روحلاری اولان بئر آدامین شفاسی
(متّا 8:28-34، لوقا 8:26-39)
1و دهنزئن او بئری تایینا، جِراسئنلی‌‌لرئن وئلایتئنه گلدئلر. 2قاییقدان چیخان واخت، ناپاک روحو اولان بئر آدام قبئرئستاندان چیخیب عئسایا راست گلدی. 3بو آدام قبئرئستاندا یاشاییردی و آرتیق هچ کئم اونو حتّا زنجئرلر‌له بله باغلایا بئلمئردی. 4گرچی چوخ دفه کونده‌لر و زنجئرلر‌له باغلانمیش ائدی، آمّا کونده‌لری سیندیریب، زنجئرلری ده قیرمیشدی و کئمسه اونو ضبط اتمه‌یه قادئر دیئلدی. 5دائم، گجه-گوندوز، داغلاردا و قبئرلر آراسیندا باغیریب، داشلارلا اؤزونو یارالاییردی.
6بو آدام عئسانی اوزاقدان گؤرنده قاچا-قاچا گلدی و اونون قاباغیندا دئز چؤکدو. 7و اوجا بئر سَسله باغیریب اونا ددی: «مندن نه ائسته‌یئرسن عئسا، اوجالاردا ساکئن اولان تارینین اوغلو؟ سنی آند ورئرم تارییا، منه عذاب ورمه‌یه‌سن.» 8چونکی عئسا اونا دمئشدی: «ای ناپاک روح، بو آدامدان اشئیه چیخ!»
9عئسا اوندان سوروشدو: «آدین نه‌دئر؟»
او آدام جاواب وردی: «منئم آدیم قوشوندور. چونکی بئز چوخوق!»
10و عئسایا چوخ یالواردی کی، اونلاری او وئلایتدن قووماسین. 11اورادا، داغین اته‌یئنده بؤیوک بئر دونگوز سوروسو اوتلاییردی. 12ناپاک روحلار عئسایا یالواریب ددئلر: «بئزی او دونگوزلارا گؤندَر، قوی اونلارین ائچئنه گئرک.»
13عئسا ائجازه وردی و ناپاک روحلار او آدامدان چیخیب، دونگوزلارا گئردئلر. دونگوزلار داغین اته‌یئندن اوچوروما طرف قاچیب، اورادان دهنزه آتیلدیلار و اورادا بوغولدولار. او سورونون ساییسی ائکی مئن اولاردی. 14سورونو اوتارانلار قاچیب، بو خبری شهرده و کندلرده یایدیلار و خالق دا اولوب-کچنلری گؤرمک اوچون اورایا گلدی.
15اونلار عئسانین یانینا گلدئلر و بئر قوشونا قدر ناپاک روحو اولان آدامی آرام اوتورموش، اَینئنه پالتار گیئنمئش، و عاغیللاشمیش گؤرنده قورخدولار. 16باش ورمئشلری گؤرنلر، ناپاک روحو اولان آدام و دونگوزلارین باشینا گلنلری خالقا نقل اتدئلر. 17اونلار دا عئسایا یالواردیلار کی، اونلارین وئلایتئندن چیخیب گتسئن. 18قاییغا مئنَن واخت، قاباقجا ناپاک روحو اولان آدام عئسایا یالواردی کی، او دا اونونلا گتسئن. 19آمّا عئسا اونا ائجازه ورمه‌یئب، ددی: «اؤز اِوئنه، اؤز قوحوملارینین یانینا گت و اونلارا ده کی، رب سنه نه قدر بؤیوک ائشلر ادئب و سنه نه قدر مرحمت گؤرسه‌دئب.»
20او آدام اونلاردان آیریلیب عئسانین اونا نه اتدئیئنی دکاپولئس#5:20 یعنی «اون شَهَر» دئیاریندا نقل اتمه‌یه باشلادی. و هامی تعجّوب ادئردی.
اؤلو بئر قیز و ناخوش بئر آرواد
(متّا 9:18-26، لوقا 8:40-56)
21عئسا قاییقلا گئنه دهنزئن او بئری تایینا کچنده، یانینا بؤیوک بئر جاماعات ییغیلدی. او اؤزو دهنزئن قیراغیندا ائدی. 22یایروس آدیندا کنئسه ریئسلرئندن بئری اونون یانینا گلدی و عئسانی گؤرن زامان قاباغیندا دئز چؤکوب، 23یالوارا-یالوارا اونا ددی: «قیزیم اؤلوم حالیندادیر. گل اَللرئنی اونون اوستونه قوی کی، صاغالیب یاشاسین.»
24عئسا اونونلا گتدی و اونلارین دالینجا چوخ آدام گِدئردی، اله کی، اونو سیخیشدیریردیلار. 25اورادا اون‌ائکی ائلدن بری قان آخینماسینا دوچار اولموش بئر آرواد وار ائدی. 26بو آرواد بئر چوخ حکئملر الئندن عذابلار چکمئش و بوتون وار-یوخونو صرف اتمئشدی، آمّا هچ فایدا گؤرمه‌مئشدی. حالی داها دا پئسلَشمئشدی. 27آرواد عئسانین حاقّینداکی سؤزلری اشئدئب، جاماعاتین آراسیندا عئسانین آرخاسیندان گلدی و اونون پالتارینا اَل سورتدو. 28چونکی دیئردی: «اگر اَلئم پالتارینا دا دَیسه بله، شفا تاپاجاغام.» 29او آندا قان آخینماسی آرواددان کسئلدی و او بلادان قورتاردیغینی بدنئنده آنلادی. 30عئسا آنَن اؤزوندن چیخان قودرتی بئلدی و جاماعاتا دؤنوب ددی: «کئم منئم پالتاریما اَل سورتدو؟»
31عئسانین شاگئردلری اونا ددئلر: «جاماعاتین سنی نجه سیخیشدیردیغینی گؤرورسن، گئنه ده، ”منه کئم اَل سورتدو؟“ سوروشورسان؟»
32عئسا بونو اِده‌نی گؤرمک اوچون اطرافا باخدی. 33آرواد، اؤزونه نه اولدوغونو بئلئب قورخا-قورخا، تئتره‌یه-تئتره‌یه گلدی و اونون آیاقلارینا دوشوب، بوتون حقئقتی عئسایا ددی.
34عئسا او آروادا ددی: «قیزیم، ائمانین سنه شفا وردی. سالامات گت و چکدئیئن عذابدان خئلاص اول.»
35عئسا حله او آروادلا دانیشیردی کی، کنئسه ریئسئنئن اِوئندن خبر گتئردئلر: «قیزین اؤلدو، آرتیق نه اوچون اوستادا زحمت ورئرسن؟»
36آمّا عئسا دیئلن سؤزه قولاق آسماییب کنئسه ریئسئنه ددی: «قورخما، آنجاق ائنان.» 37و پطروس، یعقوب و یعقوبون قارداشی یوحنّادان باشقا هچ کئمه ائجازه ورمه‌دی کی، اونلارلا گلسئن. 38اونلار کنئسه ریئسئنئن اِوئنه گلدئلر. عئسا اورادا آغلاییب اوجا سَسله فغان اِدنلری گؤردو 39و اِوه گئردئیی زامان اونلارا ددی: «نه اوچون های سالیب آغلاشیرسینیز؟ قیز اؤلمه‌یئب، آنجاق یاتیب.»
40اِوده اولانلار اونا گولدولر. آمّا عئسا اونلارین هامیسینی اشئیه چیخاردیب، اوشاغین آتا-آناسی و اؤزو ائله اولانلارلا اوشاغین یاتدیغی یره گئردی. 41و اونون اَلئندن توتوب اونا ددی: «تالئتا قوم!» ترجومه‌سی؛ «قیزیم، سنه دیئرم قالخ!»
42او آندا قیز یرئندن قالخیب یرئمه‌یه باشلادی. او قیزین اون‌ائکی یاشی وار ائدی. اونلار حیرتدن قوروموشدولار. 43عئسا اونلارا امر اتدی کی، بونلاردان هچ کئمه بئر سؤز بئلدئرمه‌سئنلر و ددی کی، قیزا یمک اوچون بئر شی ورسئنلر.
Currently Selected:
مرقوس 5: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
