مرقوس 4
4
اکئنچی مثلی
(متّا 13:1-9، لوقا 8:4-8)
1عئسا گئنه دهنزئن قیراغیندا تعلئم ورمه‌یه باشلادی. اونون یانینا او قدر آدام ییغیلدی کی، او دهنزئن قیراغیندا سو اوستونده اولان قاییغا مئنئب اوتوردو. بوتون او جاماعات دهنزئن قیراغیندا دورموشدو. 2عئسا اونلارا مثللرله چوخ شیلر تعلئم وردی و اؤیرتدئکلرئنده اونلارا بله ددی:
3«قولاق آسین. بئر اَکئنچی توخوم سپمه‌یه چیخدی. 4توخوملاری سپنده اونلاردان بعضئسی یولون قیراغینا دوشدو و قوشلار گلئب اونو یدئلر. 5بعضئسی تورپاغی چوخ اولمایان داشلیغا دوشوب تز بئتدی، چونکی تورپاغین درئنلئیی یوخ ائدی. 6گون چیخاندا گونش اونو یاندیردی و کؤکو اولمادیغی اوچون قورودو. 7توخوملاردان بعضئسی تئکانلار آراسینا دوشدو و تئکانلار بئتئب، اونو بوغدولار و ثمره ورمه‌دی. 8او بئرئلری ده برکتلی تورپاغا دوشوب بئتدئلر و بؤیویوب بعضئسی بئره اوتوز، بعضئسی بئره آلتمیش، و بعضئسی ده بئره یوز ثمره وردئلر.»
9عئسا اونلارا ددی: «اشئتمه‌یه قولاقلاری اولان اشئتسئن!»
10تک اولان زامان، اون‌ائکی شاگئرد و اونلارلا اطرافیندا اولان آداملار بو مثل حاقّیندا اوندان سوآل سوروشوردولار. 11عئسا اونلارا ددی: «تارینین پادشاهلیغینین سئرّئنی بئلمک سئزه ورئلئب. آمّا اشئکده اولانلارا هر شی مثللرله اولور کی،
12باخا-باخا گؤرمه‌سئنلر،
قولاق آسا-آسا آنلاماسینلار،
مبادا دؤنوب باغیشلانسینلار.»#4:12 اِشَعیا ۶:۹ و ۱۰
13و اونلارا ددی: «بو مثلی باشا دوشمورسونوز؟ بس اؤزگه مثللری نجه باشا دوشه‌جکسئنئز؟ 14اکئنچی کلامی سپئر. 15یول قیراغینا دوشَنلر اونلاردیرلار کی، کلامی اشئدئرلر، آمّا شیطان تزلئکله گلئب اونلارا سَپئلن کلامی گؤتوروب آپاریر. 16بله‌جه ده داشلیق یرلره دوشَنلر: کلامی اشئدئب آنَن اونو شادلیقلا قبول ادئرلر. 17آمّا اونلاردا کؤک یوخدور. بئر آز زامان قالیرلار، و سونرا بو کلامدان اؤتری سیخینتی و اذئیّت باش ورنده، آنَن ائماندان دوشورلر. 18تئکانلار آراسینا دوشَنلر اونلاردیرلار کی، کلامی اشئدئرلر، 19آمّا بو دونیانین اوموراتی، مال-دؤولتئن آلدادیجیلیغی، و آیری شیلرئن هوسلری آرایا گئرئب کلامی بوغور و او، ثمره‌سئز اولور. 20برکتلی تورپاغا دوشَنلر اونلاردیرلار کی، کلامی اشئدئب اونو قبول ادئرلر و بئره اوتوز، بئره آلتمیش، و بئره یوز ثمره ورئرلر.»
قابدا قویولان لامپا
(لوقا 8:16-18)
21عئسا اونلارا ددی: «آیا لامپانی یاندیریب دولچا آلتینا یا دا یاتاق آلتینا قویارلار؟ مگر لامپا، اونون اوچون دیئل کی، لامپا قابینا قویولسون؟ 22چونکی گئزلی بئر شی یوخدور کی، آچیغا چیخماسین و اؤرتولو بئر شی یوخدور کی، آشکارا چیخماسین. 23اشئتمه‌یه قولاقلاری اولان، اشئتسئن.»
24و اونلارا ددی: «نه اشئتدئیئنئزه دئقّت ادئن. هانسی اؤلچو ائله اؤلچرسئنئز، سئزه ده او اؤلچو ائله اؤلچوله‌جک و داها دا چوخ ورئله‌جک. 25چونکی کئمئن وارسا، اونا ورئله‌جک و کئمئن یوخوسا، اولانلاری دا آلیناجاقدیر.»
اؤز-اؤزونه بئتن توخوم
26عئسا اونلارا ددی: «تارینین پادشاهلیغی تورپاغا توخوم سَپَن بئر آداما بنزه‌ر. 27گجه-گوندوز یاتار-دورار. توخوم بئتئب بؤیویر، آمّا او، بونون نجه اولدوغونو بئلمز. 28یر اؤز-اؤزوندن ثمره ورئر: اوّل اوتو، سونرا سونبولو، داها سونرا دا سونبولده یتئشمئش دَنی. 29محصول یتئشدئیی واخت، آنَن اوراق سالینار، چونکی بئچئن واختی یتئشئب.»
خاردال توخومو
(متّا 13:31-32، 34، لوقا 13:18-19)
30و اونلارا ددی: «تارینین پادشاهلیغینی نه‌یه بنزه‌دک؟ و یا اونو نه مثل‌له سئزه آیدینلاشدیراق؟ 31تارینین پادشاهلیغی خاردال توخومو کئمی‌دئر کی، تورپاقدا اکئلدئیی واخت، یرده اولان توخوملارین هامیسیندان کئچئکدئر. 32آمّا اکئلندن سونرا بؤیویور و بوتون سبزه‌لردن داها بؤیوک اولور. اله ائری بوداقلار سالیر کی، گؤیون قوشلاری اونون کؤلگه‌سی آلتینا قونا بئلئرلر.»
33عئسا کلامی بو کئمی مثللرله اونلارا آنلادیقلاری قدر تعلئم ورئردی 34و مثلسئز هچ بئر شیی اونلارلا دانیشمیردی. لاکئن تک اولان زامان اؤز شاگئردلرئنه بو شیلرئن هامیسینی آچیقلاییردی.
35او گون، آخشام اولاندا، عئسا شاگئردلرئنه ددی: «دهنزئن او تایینا کچک.» 36اونلار دا جاماعاتی بوراخیب، عئسانین اوتوردوغو قاییقلا دهنزئن او بئری طرفئنه یولا دوشدولر. اؤزگه قاییقلار دا اونلارلا گلئردئلر. 37بؤیوک بئر طوفان اولدو و شپه‌لر قاییغین ائچئنه اِنئردئلر. اله کی، قاییق سو ائله دولوردو. 38عئسا قاییغین دال طرفئنده یاستیغین اوستونده یاتمیشدی. اونلار اونو اویادیب ددئلر: «اوستاد، مگر بئزئم هلاک اولماغیمیز سنی ناراحات اتمئر؟» 39عئسا اویانیب یله آجیقلاندی و دهنزه ددی: «ساکئت اول، آرام اول!» یل دایاندی و بؤیوک بئر آراملیق اولدو. 40عئسا اونلارا ددی: «نه اوچون بو قدر قورخاقسینیز؟ نه اوچون ائمانینیز یوخدور؟» 41اونلار چوخ قورخموشدولار و بئربئرلرئنه دیئردئلر: «بو کئمدئر کی، هم یل، هم ده دهنز اوندان ائطاعت ادئر؟»
Currently Selected:
مرقوس 4: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
