مرقوس 2
2
بئر ائفلئجئن شفاسی
(متّا 9:1-8، لوقا 5:17-26)
1بئر نچه گون سونرا عئسا گئنه کفرناحوما گلدی و اونون اِوده اولماسینین خبری یاییلدی 2و او قدر چوخ آدام اورایا ییغیلدی کی، قاپی آغزیندا دا بله یر قالمادی و عئسا اونلارلا تارینین کلامیندان دانیشیردی. 3بو آرادا بئر عئدّه، ائفلئج آدامی دؤرد نفرئن وسئله‌سئله داشی‌ییب اونون یانینا گتئردئلر. 4آمّا آداملارین چوخلوغوندان اونا یاخینلاشا بئلمه‌دئلر. اونون اوچون ده عئسانین اولدوغو اِوئن دامینی سؤکوب یاردیلار و ائفلئج آدامی یاتاغی ائله آشاغی اِندئردئلر. 5عئسا اونلارین ائمانینی گؤرنده ائفلئجه ددی: «اوغول، گوناهلارین باغیشلاندی.»
6آمّا عالئملردن بئر نچه‌سی اورادا اوتوروب اورَکلرئنده دوشونوردولر: 7«بو آدام نه اوچون بله کوفرلر دانیشیر؟ تاریدان باشقا کئم گوناهلاری باغیشلایا بئلر؟»
8عئسا روحوندا اونلارین اؤز آرالاریندا بله دوشوندوکلرئنی آنلاییب اونلارا ددی: «نه اوچون اورَکلرئنئزدن بله فئکئرلر کچئردئرسئنئز؟ 9هانسی داها آسان‌دیر؟ ائفلئجه ”گوناهلارین باغیشلاندی“ دمک؟ یوخسا ”قالخ، دؤشه‌یئنی گؤتور گت“ دمک؟ 10آمّا بئله‌سئنئز کی، ائنسان اوغلونون یر اوزونده گوناهلاری باغیشلاماق قودرتی وار…» عئسا ائفلئجه ددی: 11«سنه دیئرم قالخ، دؤشه‌یئنی گؤتور و اِوئنه گت.»
12او آندا ائفلئج یردن قالخیب دؤشه‌یئنی گؤتوردو و هامینین گؤزو قاباغیندا چیخیب گتدی. اله کی، هامی تعجّوبدن مات قالدی و تارینی حمد ادئب دیئردئلر: «بله بئر شی اصلا گؤرمه‌مئشدئک.»
لاوئنئن چاغیریلماسی
(متّا 9:9-13، لوقا 5:27-32)
13عئسا گئنه دهنزئن قیراغینا گتدی و بوتون خالق اونون یانینا گلدی و او دا اونلارا تعلئم ورئردی. 14یولدان کچنده آلفاعوس اوغلو لاوئنی باج ییغیلان یرده اوتورموش گؤردو و اونا ددی: «منئم دالیمجا گل.» لاوی ده قالخیب اونون دالینجا گتدی.
15عئسا لاوئنئن اِوئنده سوفره باشیندا اوتورموشدو. بئر چوخ باج ییغانلار و گوناهکارلار دا او و شاگئردلری‌ائله سوفره باشیندا اوتورموشدولار. چونکی چوخ آداملار اونون دالینجا گدئردئلر. 16فرئسئلرئن عالئملری عئسانین گوناهکارلار و باج ییغانلارلا یمک یدئیئنی گؤرنده اونون شاگئردلرئنه ددئلر: «نه اوچون او، باج ییغانلار و گوناهکار آداملارلا ییئب-ائچئر؟» 17عئسا بو سؤزو اشئدن زامان اونلارا ددی: «صاغ آداملار یوخ، ناخوشلار طبئبه مؤحتاجدیرلار. من صالح آداملاری یوخ، گوناهکار آداملاری دعوت اتمه‌یه گلمئشم.»
اوروج حاقّیندا
(متّا 9:14-17، لوقا 5:33-39)
18یحیانین شاگئردلری و فرئسئلر اوروج توتموشدولار. بونلار عئسانین یانینا گلئب اونا ددئلر: «یحیانین و فرئسئلرئن شاگئردلری نه اوچون اوروج توتورلار، آمّا سنئن شاگئردلرئن اوروج توتمورلار؟»
19عئسا اونلارا ددی: «بَیئن قوناقلاری، بَی اونلارلا اولان واخت، مگر اوروج توتارلار؟ نه قدر کی، بَی اونلارلا وار، اونلار اوروج توتا بئلمزلر. 20آمّا او گونلر یتئشه‌جک کی، بَی اونلارین الئندن آلیناجاق و او زامان اونلار اوروج توتاجاقلار. 21هچ کس کؤهنه پالتارا تزه قوماشدان یاماق تئکمز. یوخسا تزه یاماق کؤهنه پالتاردان قوپار و ییرتیق داها پئس اولار. 22هچ کس ده تزه شرابی کؤهنه تولوقلارا تؤکمز. یوخسا تزه شراب کؤهنه تولوقلاری پارتلادار. هم شراب تؤکولوب گدر، هم ده تولوق تلف اولار. تزه شرابی تزه تولوقلارا تؤکرلر.»
سبّت حاقّیندا
(متّا 12:1-8، لوقا 6:1-5)
23بئر گون عئسا سبّت گونونده شاگئردلری ائله اَکئنلر آراسیندان کچئردی. کچنده شاگئردلر سونبوللری درمه‌یه باشلادیلار. 24فرئسئلر اونا ددئلر: «باخ! سبّت گونونده جائز اولمایان ائشی نه اوچون گؤرورلر؟»
25عئسا اونلارا ددی: «آیا هچ اوخوماییبسینیز کی، داوود و اونونلا آج اولانلار، آج و مؤحتاج قالاندا نه اتدئلر؟ 26نجه داوود باش کاهئن اَبیاتارین زامانیندا تارینین اِوئنه گئرئب، تارییا تقدئم اولونموش چؤره‌یی یدی و اونونلا اولانلارا دا وردی، حال بو کی، اونلاری یمک کاهئنلردن باشقا هچ کسه جائز دیئلدی؟!» 27و عئسا اونلارا ددی: «ائنسان سبّت گونو اوچون یوخ، سبّت گونو ائنسان اوچون اولوب. 28بونا گؤره ائنسان اوغلو سبّت گونونون ده صاحئبئدئر.»
Currently Selected:
مرقوس 2: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
