مرقوس 1
1
تعمئد ورن یحیا
(متّا 3:1-12، لوقا 3:1-18، یوحنّا 1:19-28)
1تارینین اوغلو عئسا مسئحئن خوش خبرئنئن باشلانیشی.
2اِشَعیا پیغمبرئن کئتابیندا یازیلیب:
«باخ، من سنئن قاباغیندا اؤز الچئمی گؤندَ‌رئرم کی،
سنئن یولونو حاضیرلاسین.#1:2 مَلاکی ۳:۱
3چؤلده بئرئنئن سسی نئدا ادئر:
ربّئن یولونو حاضیرلایین.
اونون یوللارینی دوز ادئن.»#1:3 اِشَعیا ۴۰:۳
4و یحیا بله‌جه ظوهور اتدی و چؤلده ائنسانلاری تعمئد ورئب، گوناهلارین باغیشلانماسی اوچون تؤوبه تعمئدئنی وعظ ادئردی. 5اورشلئملی‌لر و بوتون یهودئیه وئلایتئنده یاشایانلار، اونون یانینا گلئردئلر و گوناهلارینا اعتئراف ادئب، اوردون چاییندا اوندان تعمئد آلیردیلار. 6یحیا دَوه توکوندن پالتار گیئنئب، درئدن بلئنه قاییش باغلامیشدی و چیئرتکه و چؤل بالی ییئردی. 7او وعظ ادئب دیئردی: «مندن سونرا مندن داها قووّتلی اولان گلئر کی، من اَیئلئب اونون آیاق قابینین باغینی دا آچماغا بله لایئق دیئلم. 8من سئزی سو ائله تعمئد وردئم، آمّا او سئزی موقدّس روحلا تعمئد وره‌جک.»
عئسانین وسوسه اولونماسی
(متّا 3:13-4:22، لوقا 3:21-22، 4:1-15، 5:1-11)
9او گونلرده، عئسا جلئلئن ناصئره شهرئندن گلئب، اوردون چاییندا یحیادان تعمئد آلدی. 10و سودان چیخار-چیخماز گؤیون یاریلدیغینی و روحون گؤیرچئن شکلئنده اونون اوستونه اندئیئنی گؤردو. 11و گؤیدن بئر سس گلدی: «سن منئم سِودئیئم اوغلومسان. سندن راضی‌یام!»
12اله او آندا موقدّس روح عئسانی چؤله آپاردی، 13و او، قیرخ گون اورادا قالیب شیطان طرفئندن وسوسه اولونوردو. عئسا اورادا وحشی حیوانلارلا قالیردی و ملکلر ده اونا خئدمت ادئردئلر.
14یحیانین توتولماسیندان سونرا، عئسا جلئله گلدی و تارینین خوش خبرئنی وعظ ادئب دیئردی: 15«واخت تامام اولور. تارینین پادشاهلیغی یاخینلاشیب. تؤوبه ادئن و خوش خبره ائنانین.»
16عئسا جلئل دهنزئنئن قیراغیندان کچن واخت، شمعون و قارداشی آندریاسی گؤردو. اونلار دهنزه تور آتیردیلار، چونکی بالیق اووچوسو ائدئلر. 17و اونلارا ددی: «منئم دالیمجا گلئن. من سئزی ائنسانلار اووچوسو اده‌رم.» 18اونلار دا او آندا تورلارینی بوراخیب، اونون دالینجا گتدئلر. 19اورادان بئر آز ائره‌لی گتدئکده عئسا زِبِدِی اوغلو یعقوب و قارداشی یوحنّانی گؤردو. اونلار قاییقدا اوتورموشدولار و تورلارینی تعمئر ادئردئلر. 20عئسا اله او ساعاتدا اونلاری دعوت اتدی. اونلار دا آتالاری زِبِدِیی ائشچئلر‌له قاییقدا قویوب، اونون دالینجا گتدئلر.
دلی بئر کئشئنئن شفاسی
(متّا 8:14-17، لوقا 4:31-44)
21اونلار کفرناحوما گلدئلر. سبّت گونو یتئشنده، عئسا کنئسه‌یه گئرئب تعلئم ورمه‌یه باشلادی. 22اونون تعلئمئندن هامی حیران قالمیشدی، چونکی اونلارا دئن عالئملری کئمی یوخ، ائقتئدار صاحئبی کئمی تعلئم ورئردی.
23کنئسه‌ده ناپاک روح الئنده توتولموش بئر آدام وار ائدی. بو آدام باغیرا-باغیرا ددی: 24«ناصئره‌لی عئسا، بئزدن نه ائسته‌یئرسن؟ آیا بئزی هلاک اتمک اوچون گلئبسن؟ سنئن کئم اولدوغونو بئلئرم: سن تارینین موقدّسی‌سن!»
25لاکئن عئسا اونا آجیقلانیب ددی: «ساکئت اول و اوندان اشئیه چیخ!» 26او واخت ناپاک روح، آدامی شئدّتله اَسدئردی و اوجا سَسله چیغیریب اوندان اشئیه چیخدی.
27هامی تعجّوبدن مات قالمیشدی و بئر‌بئرلرئندن سوروشوردولار: «بو نه‌دئر؟! ائقتئدارلی تزه بئر تعلئم! ناپاک روحلارا بله امر ادئر، و اونلار اوندان ائطاعت ادئرلر.» 28و چوخ چکمه‌دی کی، عئسانین شؤهرتی جلئلئن بوتون یرلرئنده یاییلدی.
29اونلار کنئسه‌دن چیخان واخت، یعقوب و یوحنّا ائله، شمعون و آندریاسین اِوئنه گتدئلر. 30شمعونون قایناناسی قیزدیرما ائچئنده یاتاقدا ائدی. اونون حالیندان آنَن عئسانی خبردار اتدئلر. 31عئسا او آروادا یاخینلاشدی و اونون الئندن توتوب آیاغا قالدیردی. آروادین قیزدیرماسی کسئلدی و اونلارا خئدمت اتمه‌یه باشلادی.
32آخشام، گون باتان واخت، بوتون ناخوشلار و ناپاک روحلار الئنده توتولموش ائنسانلاری اونون یانینا گتئردئلر. 33شهرئن بوتون خالقی قاپی‌یا ییغیلمیشدی. 34عئسا جوربه‌جور ناخوشلوقلارا دوچار اولموش بئر چوخ ائنسانی صاغالتدی و بئر چوخ ناپاک روحلاری قوودو. او، ناپاک روحلارین دانیشماغینا ائجازه ورمئردی، چونکی اونو تانی‌ییردیلار.
35سحر، گون چیخمامیش عئسا قالخدی و اِودن چیخیب ساکئت بئر یره گتدی و اورادا دوعا ادئردی. 36شمعون و اونونلا اولانلار، اونو آختارماغا چیخدیلار و اونو تاپیب ددئلر: 37«هامی سنی آختاریر.» 38عئسا اونلارا ددی: «گلئن آیری یرلره، بو یاخین قصبه‌لره ده گدک کی، اونلاردا دا وعظ ادئم. چونکی من بونون اوچون گلمئشم.» 39و جلئلئن بوتون یرلرئنده گزئردی و اونلارین کنئسه‌لرئنده وعظ ادئب، ناپاک روحلاری قوووردو.
عئسا جوذاملی بئر آداما شفا ورئر
(متّا 8:1-4، لوقا 5:12-16)
40بئر نفر جوذاملی#1:40 اصل متنئن یونانی دئلئنده بو کلمه آنجاق جوزام یوخ، جوربه‌جور دَری ناخوشلوقلارینا شامئل اولوردو. عئسانین یانینا گلدی و اونون قاباغیندا دئز چؤکوب یالوارا-یالوارا ددی: «اگر ائسته‌یه‌سن منی بو ناخوشلوقدان تمئز اده بئلرسن.» 41عئسانین او آداما رحمی گلدی و الئنی اوزادیب، اونون اوستونه قویدو و اونا ددی: «ائسته‌یئرم، تمئز اول.» 42او آندا جوذام بو آدامی ترک اتدی و او، بو مرضدن تمئز اولدو. 43عئسا اونا جئدّی تاپشیریب، آنَن اونو مورخّص اتدی و اونا ددی: 44«باخ! هچ کئمه بئر سؤز دمه، آنجاق گت کاهئنه گؤرون و تمئزلئیئن اوچون موسانین امر اتدئکلرئنی تقدئم ات کی، اونلارا شهادت اولسون.» 45آمّا او آدام چیخیب، چوخ شیلر جار چکدی و اولوب-کچنلری هر یرده یایدی. اله کی، عئسا آرتیق هچ بئر شهره آچیقجا گئره بئلمه‌یئب، شهردن اشئکده، چؤلده قالیردی. آمّا آداملار هر طرفدن اونون یانینا گلئردئلر.
Currently Selected:
مرقوس 1: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
