لوقا 10
10
عئسا یتمئش شاگئردی گؤندَ‌رئر
1بوندان سونرا رب یتمئش نفر داها تعیئن اتدی و اونلاری ائکی-ائکی، اؤزوندن قاباق، گده‌جه‌یی هر شهر و هر یره گؤندَ‌ردی. 2و اونلارا ددی: «محصول چوخ، لاکئن ائشچئلر آزدیر. اونا گؤره ده محصولون صاحئبی اولان ربّه یالوارین کی، محصولونو ییغماق اوچون ائشچئلر گؤندَ‌رسئن. 3گدئن! من سئزی قوردلار آراسینا قوزولار کئمی گؤندَ‌رئرم. 4نه کئسه گؤتورون، نه توربا، نه ده آیاق قابی. یولدا دا هچ کسله سالاملاشمایین. 5هانسی اِوه گئره‌سئنئز، اوّلجه دیئن: ”بو اِوده سالاماتلیق اولسون.“ 6اگر اورادا سالاماتلیق سِوَن بئر آدام اولسا، سالامینیز اونون اوستونده قالاجاق. اولماسا، سالامینیز اؤزونوزه قاییداجاق. 7او اِوده قالین. اونلارین نه‌یی وارسا، ییئن و ائچئن، چونکی ائشچی اؤز موزدونه لایئقدئر. اِودن اِوه کچمه‌یئن.
8بئر شهره گئردئیئنئز زامان، اگر سئزی قبول اتسه‌لر، قاباغینیزا نه قویولسا، ییئن. 9اورادا اولان ناخوشلارا شفا ورئن و اونلارا دیئن کی، ”تارینین پادشاهلیغی سئزه یاخینلاشیب.“ 10آمّا گئردئیئنئز شهرلردن هانسیندا سئزی قبول اتمسه‌لر، اونون کوچه‌لرئنه چیخیب دیئن: 11”شهرئنئزدن آیاقلاریمیزا یاپیشان توزو دا سئزئن ضئدّئنئزه چیرپیریق. لاکئن گئنه ده بئلئن کی، تارینین پادشاهلیغی سئزه یاخینلاشیب.“ 12سئزه دیئرم، قئیامت گونو سودومون حالی او شهرئن حالیندان داها آسان اولاجاق.
13وای سنه، ای خورازین! وای سنه، ای بیت صیدا! چونکی سئزده باش ورن مؤجوزه‌لر صور و صیدادا باش وِرسَیدی، اونلار چوخدان چولا بورونوب، کول ائچئنده اوتوروب، تؤوبه ادردئلر. 14آمّا قئیامت گونو صور و صیدانین حالی سئزئنکئندن داها آسان اولاجاق. 15و سن، ای گؤیه قدر قالخان کفرناحوم! اؤلولر عالمئنه قدر اِندئرئله‌جکسن.
16سئزه قولاق آسان منه قولاق آسیر و سئزی ردّ ادن منی ردّ ادئر؛ و منی ردّ ادن منی گؤندَ‌ره‌نی ردّ ادئر.»
17یتمئش شاگئرد شادلیقلا قاییتدیلار و عئسایا ددئلر: «یارب! ائبلئسلر ده سنئن آدیندا بئزدن ائطاعت ادئرلر.»
18عئسا اونلارا ددی: «شیطانی گؤردوم کی، گؤیدن ائلدیریم کئمی دوشدو. 19باخین، من سئزه ائقتئدار ورمئشم کی، ائلانلاری، عقربلری و دوشمنئن بوتون قووّتئنی آیاق آلتیندا اَزه‌سئنئز و هچ بئر شی سئزه ضرر وورمایاجاقدیر. 20بوندان سوئنمه‌یئن کی، روحلار سئزدن ائطاعت ادئرلر. بوندان سوئنئن کی، آدلارینیز گؤیده یازیلیب.»
21عئسا او آندا روحن سوئنئب ددی: «ای آتا، گؤیون و یرئن ربّی! سنه شوکور ادئرم کی، بو شیلری بئلئجئلردن و آغیلّی‌لاردان گئزلَدئب، کؤرپه‌لره آچدین! بلی، آتا! چونکی سنئن ائسته‌دئیئن بله ائدی.
22هر شی آتام طرفئندن منه ورئلئب. اوغولون کئم اولدوغونو هچ کئم بئلمز، مگر آتا. و آتانین کئم اولدوغونو هچ کئم بئلمز، مگر اوغول و او آدام کی، اوغول اونا آچماق ائسته‌یئر.»
23و شاگئردلره دؤنوب اونلارا آیریجا ددی: «خوش او گؤزلرئن حالینا کی، سئز گؤرن شیلری گؤرور. 24چونکی سئزه دیئرم؛ چوخ پیغمبرلر و پادشاهلار سئزئن گؤردویونوز شیلری گؤرمک آرزوسوندا اولدولار، لاکئن گؤرمه‌دئلر. سئزئن اشئتدئیئنئز شیلری اشئتمک آرزوسوندا اولدولار، لاکئن اشئتمه‌دئلر.»
یاخشی سامئره‌لی
25بئر شرئعت عالئمی دوردو و عئسانی ائمتاحان اتمک اوچون اونا ددی: «اوستاد! نه ادئم کی، ابدی حیاتی مئراث آلیم؟»
26عئسا اونا ددی: «شرئعتده نه یازیلیب؟ نجه اوخویورسان؟»
27شرئعت عالئمی عئسانین جاوابیندا ددی: «رب تارینی بوتون اوره‌یئندن، بوتون جانیندان، بوتون قووّتئندن و بوتون فئکرئندن سِو و قونشونو اؤزون کئمی سِو.»#10:27 چیخیش ۶:۵، لاوئلی‌لر ۱۹:۱۸
28عئسا اونا ددی: «دوغرو جاواب وردئن. بونا عمل ات، یاشایاجاقسان.»
29لاکئن او، اؤزونو حاقلی چیخارتماق ائسته‌یئب عئسایا ددی: «اوندا منئم قونشوم کئمدئر؟»
30عئسا جاواب ورئب ددی: «بئر نفر اورشلئمدن ارئحایا گدن واخت، حرامی‌لرئن اَلئنه دوشدو. حرامی‌لر اونو سویدولار و یارالاییب یاری‌جان حالدا قویوب گتدئلر. 31تصادوفَن بئر کاهئن او یوللا گدئردی. آدامی گؤرَ‌نده یولون او تاییندان کچدی. 32بئر لاوئلی ده او یره چاتیب آدامی گؤرن واخت، یولون او تاییندان کچئب گتدی. 33آمّا او یولدا سفره چیخان بئر سامئره‌لی اونون یانینا یتئشدی و اونو گؤرن واخت، اونا یازیغی گلدی. 34آداما یاخینلاشدی و اونون یارالارینا زیتون یاغی ائله شراب تؤکوب باغلادی. و اونو اؤز اششه‌یئنه مئندئرئب، بئر مهمانخانایا گتئردی و اونون قیدئنه قالدی. 35او گونون صاباحی ائکی دئنار چیخاردیب، مهمانخاناچییا وردی و ددی: ”اونا یاخشی یتئش و اگر آرتیق خرجئن چیخسا، قاییداندا سنه وره‌رم.“
36ائندی سنئن نظرئنه گؤره بو اوچ نفردن هانسی ائثبات اتدی کی، حرامی‌لرئن اَلئنه دوشَن آداما بئر قونشودور؟»
37او آدام ددی: «اونا مرحمت گؤرسه‌دن آدام.»
عئسا دا اونا ددی: «گت، سن ده بله ات.»
مارتا و مریمئن اِوئنده
38عئسا، شاگئردلری ائله بئرلئکده یولا داوام ورئب بئر کنده گئردی. بورادا مارتا آدلی بئر آرواد اونو اؤز اِوئنه دعوت اتدی. 39اونون مریم آدلی بئر باجیسی وار ائدی. مریم عئسانین آیاقلارینین یانیندا اوتوروب اونون سؤزلرئنه قولاق آسیردی. 40لاکئن مارتا ائشئن چوخلوغوندان تلاش ائچئنده ائدی. مارتا عئسانین یانینا گلئب اونا ددی: «یارب، باجیمین منی خئدمت ائچئنده تک بوراخماسی، مگر سنی ناراحات اتمئر؟ اونا ده کی، منه کؤمک اتسئن.»
41عئسا اونا جاواب ورئب ددی: «مارتا، مارتا، سن چوخ شیلر اوچون اوزولوب تلاش ادئرسن. 42آنجاق بئرجه شی وار. مریم یاخشی پایی سچئب و بو، اوندان آلینمایاجاقدیر.»
Currently Selected:
لوقا 10: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
