یارادیلیش 14
14
اَبرامین لوطو خئلاص اتمه‌سی
1بو زامان شئنعار پادشاهی اَمرافِل، اِلآسار پادشاهی اَریوک، عِیلام پادشاهی کِدورلاعومِر و گویئم پادشاهی تئدال 2سودوم پادشاهی بِرَعله، گومورا پادشاهی بئرشاعلا، اَدما پادشاهی شئنابلا، صِبوعئم پادشاهی شِمِبِرله، و بِلَع پادشاهی یعنی صوعَر پادشاهی ائله موحارئبه‌یه باشلادیلار. 3بوتون بونلار سئدّئم دره‌سئنده (یعنی دوز دهنزی) بئرلشدئلر. 4اونلار اون ائکی ائل کِدورلاعومِرئن اسارتی آلتیندا قالمیشدیلار، لاکئن اون اوچونجو ائل عوصیان اتمئشدئلر. 5اون دؤردونجو ائل کِدورلاعومِر و اونونلا بئرلئکده اولان پادشاهلار گلئب، عَشتِروت-قارنایئمده رِفالی‌لاری، حامدا زوزلولاری، شاوه-قئریاتاییمدا اِملئلری، 6چؤل قیراغینداکی اِل-پارانا قدر اوزانان سِعئر داغلاریندا خورلولاری قیردیلار. 7سونرا گری قاییدیب اِن-مئشپاتا، (یعنی قِدِشه) گتدئلر. عَمالِقلی‌لرئن بوتون تورپاغینی و خه‌سِسون-تاماردا یاشایان اِمورلولاری آلدیلار. 8سودوم پادشاهی، گومورا پادشاهی، اَدما پادشاهی، سِبویئم پادشاهی، بِلَع پادشاهی (یعنی صوعَر)، سئدّئم دره‌سئنده صف چکئب، 9عِیلام پادشاهی کِدورلاعومِر، گویئم پادشاهی تئدال، شئنعار پادشاهی اَمرافِل، اِلآسار پادشاهی اَریوکلا دؤیوشه گئردئلر: دؤرد پادشاه بش پادشاها ضئدّ ائدی. 10سئدّئم دره‌سئنده قَطرانلا دولو چوخ چوخور وار ائدی. سودوم و گومورا پادشاهلاری دؤیوشدن قاچاندا اورایا دوشدولر، لاکئن صاغ قالانلار داغلارا قاچدیلار. 11قالئبلر سودوم و گومورانین بوتون وار-یوخ و آذوقه‌سئنی گؤتوروب گتدئلر. 12اَبرامین قارداشی اوغلو لوطو و اونون وارینی دا گؤتوروب چیخدیلار، چونکی او دا سودومدا یاشاییردی.
13دؤیوشدن صاغ قورتاران بئر نفر گلئب، عئبرانی اَبراما بونو خبر وردی. او، اِمورلو مَمرِه‌نئن پالیدینین یانیندا کی، اِشکول و آنِرئن قارداشی ائدی، یاشاییردی. اونلار اَبرامین موتّفئقلری ائدئلر. 14اَبرام قوحومو لوطون اسئر آلیندیغینی اشئدنده اِوئنده دوغولموش، دؤیوش تعلئمی گؤرموش اوچ یوز اون سکّئز نؤکرئنی گؤتوروب، دوشمنلری دانا قدر تعقئب اتدی. 15اؤزو و نؤکرلری گجه واختی دسته‌لره بؤلونوب، اونلاری قیردیلار و صاغ قالانلاری دَمَشقئن شئمال طرفئنده اولان خوبایا قدر تعقئب اتدئلر. 16اَبرام غارت اولونموش بوتون شیلری، قوحومو لوطو و اونون وارینی، هم ده آروادلاری و جاماعاتی گری قایتاردی.
مِلکئصِدِقئن اَبراما برکت ورمه‌سی
17اَبرام کِدورلاعومِر و اونونلا اولان پادشاهلاری مغلوب ادئب قاییداندان سونرا، سودوم پادشاهی، شاوه دره‌سئنده (یعنی «پادشاه دره‌سی») اونون پئشوازینا چیخدی.
18او واخت سالئم پادشاهی مِلکئصِدِق، چؤرک و شراب گتئردی. او، اوجالاردا اولان تارینین کاهئنی ائدی. 19مِلکئصِدِق اَبراما برکت ورئب ددی:
«گؤی و یرئن صاحئبی اوجالاردا اولان تاری
اَبراما برکت ورسئن.
20اوجالاردا اولان تاری موبارک اولسون کی،
دوشمنلرئنی سنئن اَلئنه تسلئم اتدی.»
اَبرام بوتون قنئمتئن اوندا-بئرئنی مِلکئصِدِقه وردی.
21سودوم پادشاهی اَبراما ددی: «آداملاریمی منه ور، آمّا شیلر سنئن اولسون.» 22لاکئن اَبرام سودوم پادشاهینا ددی: «اَللرئمی گؤی و یِرئن صاحئبی اوجالاردا اولان تاری ربّه قالدیریرام کی، 23سنئن نه بئر ائپئنی، نه ده بئر چاریق باغینی گؤتوره‌جیم، مبادا دئیه‌سن کی، من اَبرامی وارلاندیردیم. 24نؤکرلرئن یدئکلرئندن آیری، هچ بئر شی گؤتورمیه‌جیم. اوسته‌لئک منئمله گدن آداملار-آنِر، اِشکول و مَمرِه اؤز پایلارینی گؤتورسونلر.»
Currently Selected:
یارادیلیش 14: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
