چیخیش 32
32
قیزیل دانا
1خالق موسانین داغدان اِنمَکده گِجئکدئیئنی گؤرَنده هارونون اطرافینا ییغیلیب اونا ددی: «قالخ و بئزئم اوچون آللاهلار دوزَلت. قوی اونلار قاباغیمیزدا گتسئنلر. چونکی بئلمئرئک کی، بئزی مئصئردن چیخاردان آدامین یعنی بو موسانین باشینا نه گلئب!» 2هارون اونلارا ددی: «آروادلارینیزین، اوغوللارینیزین و قیزلارینیزین قولاقلاریندان قیزیل سیرغالاری چیخاردیب منئم یانیما گتئرئن.» 3بوتون خالق قولاقلاریندا اولان قیزیل سیرغالاری چیخاردیب هارونا گتئردی. 4هارون اللرئندن آلدیغی سیرغالاردان اویما آلَتی ائله قیزیلا صورت ورئب تؤکمه بئر دانا دوزَلتدی. خالق ددی: «ای ائسرایئل، باخ سئزی مئصئردن چیخاردان آللاهلارینیز!» 5هارون بونو گؤردوکده دانانین قاباغیندا بئر قوربانگاه دوزَلتدی و اعلان اتدی: «صاباح رب نامئنه بایرام اولاجاق.» 6صاباحیسی گون خالق سحر تزدن قالخیب یاندیرما قوربانلاری ائله باریش قوربانلاری کَسدی. خالق اوتوروب یِیئب-ائچدی، و سونرا اویناماغا قالخدی.
7رب موسایا ددی: «آشاغی دوش، چونکی مئصئر اؤلکهسئندن گتئردئیئن خالقین، اخلاقینی پوزوب. 8اونلارا امر اتدئیئم یولدان یامان تز دؤندولر. اؤزلری اوچون تؤکمه دانا دوزَلدئب اونا سجده قیلدیلار، قوربان کَسدئلر و ددئلر: ”ای ائسرایئل اؤولادلاری باخ، سئزی مئصئر اؤلکهسئندن چیخاردان آللاهلارینیز!“» 9رب موسایا سؤزونو داوام وردی: «بو خالقی گؤرورم، باخ، او دئکباش بئر خالقدیر. 10ائندی منی بوراخ کی، خالقا قضبلهنئب اونو یوخ ادئم، آمّا سندن بؤیوک مئلّت گتئرئم.»
11موسا تاریسی ربّه یالواریب ددی: «یارب، نه اوچون اؤز خالقینین ضئدّئنه قضبئن آلوولانسین؟ مگر سن اونلاری مئصئر اؤلکهسئندن بؤیوک قووّتئنله و قودرتلی اَلئنله قورتارمادین؟ 12آخی نه اوچون مئصئرلیلر دسئنلر کی، ”اونلاری پئس نئیّتله چیخارتدی کی، داغلاردا اؤلدوروب یر اوزوندن یوخ اتسئن“؟ یالواریرام، قضبئنی یاتیرت و اؤز خالقینا بلا گتئرمک نئیّتئندن دؤن. 13قوللارین ائبراهئمی، ائسحاقی، و ائسرایئلی خاطیرلا. سن اؤز آدینا اونلارا آند ائچئب ددئن: ”نسلئنئزی گؤیلردهکی اولدوزلار قدر چوخالداجاغام؛ وعده اتدئیئم بو اؤلکهنئن هامیسینی نسلئنئزه ورهجیم و اونلار ابدئلئک اورایا صاحئب اولاجاقلار.“» 14بلهجه، رب اؤز خالقینا بلا گتئرمک نئیّتئندن دؤندو.
15موسا دؤندو و اَلئنده شهادتئن ائکی لؤوحهسی اولاراق داغدان اِندی. لؤوحهلرئن ائکی طرفی یعنی هر اوزو یازیلی ائدی. 16اونلار تارینین ائشی ائدی؛ اوستوندهکی اویما یازیلار اونون یازیسی ائدی. 17یوشَع خالقین سَس-کویونو اشئدئب موسایا ددی: «دوشَرگهدن موحارئبه سَسی گلئر.» 18موسا جاواب وردی: «بو قَلَبه چالانلارین نئداسی دیئل، مغلوبئیّته دوشَنلرئن ده سَسی دیئل. من نغمه سَسی اشئدئرم.»
19موسا دوشَرگهیه یاخینلاشیب دانانی و اونون اطرافینداکی رقصلری گؤردو. او قضبلَندی و لؤوحهلری اَلئندن آتیب، داغین اَتهیئنده پارچا-پارچا سیندیردی. 20خالقین دوزَلتدئیی دانانی گؤتوروب یاندیردی، توزا دؤنَنه قدر اَزدی و سویون اوزونه سَپئب ائسرایئل اؤولادلارینا ائچتئردی.
21موسا هاروندان سوروشدو: «بو خالق سنه نه اتدی کی، اونلاری بله بؤیوک گوناها باتیردین؟» 22هارون جاواب وردی: «قوی آغام قضبلنمهسئن. سن بو خالقی تانیییرسان. اونون نئیّتی پئسدئر. 23اونلار منه ددئلر: ”بئزئم اوچون آللاهلار دوزَلت کی، قاباغیمیزدا گتسئنلر. چونکی بئزی مئصئر تورپاغیندان چیخاردان آدامین-بو موسانین باشینا نه ائش گلدئیئنی بئلمئرئک!“ 24من ده اونلارا ددئم: ”کئمده قیزیل وار، اونو چیخارتسین.“ خالق دا قیزیلی منه وردی. من اونو اودا آتدیم و بو دانا آلیندی.»
25موسا گؤردو کی، خالق نظارتدن چیخیب. هارون او قدر نظارتی ضعئفلَتمئشدی کی، دوشمنلر اونلاری لاغا قویوردولار. 26موسا دوشَرگهنئن گئرئشئنده دوروب چاغیردی: «ربّئن طرفئنده کئم وار منئم یانیما گلسئن!» بوتون لاوی اؤولادلاری اونون یانینا ییغیلدیلار. 27موسا اونلارا ددی: «ائسرایئلئن تاریسی رب بله دیئر: ”قوی هر بئرئنئز قیلینجینی بِلئنه قورشاسین. هر کس دوشَرگهده قاپی-قاپی گزهرک اؤز قارداشینی، دوستونو و قونشوسونو اؤلدورسون.“» 28لاوئلیلر ده موسانین اونلارا امر اتدئیی کئمی عمل اتدئلر. او گون اوچ مئنه یاخین آدام هلاک اولدو. 29موسا لاوئلیلره ددی: «بو گون سئزئن هر بئرئنئز اوغلونون و قارداشینین جانی باهاسینا وظئفهیه تعیئن اولونوب، اله کی، اؤزونه برکت قازانسین.»
30صاباحیسی گون موسا خالقا ددی: «سئز بؤیوک گوناها باتدینیز. آمّا من ائندی ربّئن حوضورونا قالخاجاغام کی، بلکه گوناهینیزی کفّاره اده بئلئم.» 31موسا ربّئن حوضورونا قاییدیب ددی: «آه، بو خالق بؤیوک گوناها باتیب، اؤزونه قیزیلدان آللاهلار دوزَلدئب؛ 32ائندی، یالواریرام، گوناهلارینی باغیشلا. اگر بله اتمیهسن، اوندا آدیمی یازدیغین کئتابدان سئل.» 33رب موسایا ددی: «منئم ضئدّئمه کئم گوناه ائشلهدئب، اونون آدینی کئتابیمدان سئلهجیم. 34لاکئن ائندی گت، خالقی سنه ددئیئم یره آپار. باخ، منئم مَلهیئم سنئن قاباغیندا گدهجک. آنجاق جزا گونو گلنده اونلارا گوناهلارینا گؤره جزا ورهجیم.» 35او زامان رب خالقین اوستونه بلا گؤندَردی، چونکی دانا دوزَلتدئلر، او دانا کی، هارون اونو دوزَلتدی.
Currently Selected:
چیخیش 32: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
