چیخیش 29
29
کاهئنلئیئن تقدئس اولونماسی
1منه کاهئنلئک اتمک اوچون اونلاری بله تقدئس ات. قوصورسوز بئر گامیش و ائکی قوچ گؤتور. 2مایاسیز چؤرکلری، یاغلا یوغرولموش مایاسیز فطئرلری، و اوستونه یاغ سورتولموش مایاسیز کولچهلری نارین بوغدا اونوندان حاضیرلا. 3اونلاری بئر سبدئن ائچئنه قوی، گامیش و ائکی قوچلا بئرلئکده تقدئم ات. 4سونرا هارونلا اوغوللارینی حوضور چادیرینین گئرئشئنه گتئرئب، اونلاری سودا قوصول ور. 5پالتارلارینی گؤتوروب هارونون اَینئنه خئرقهنی، نفئس توخونموش اِفود جوبّهسئنی، اِفودو و دؤشلویو گیئندئر و اِفودون کمرئنی بلئنه باغلا. 6اونون باشینا عمّامهنی، عمّامهیه ده موقدّس تاجی قوی. 7مسح یاغینی گؤتوروب هارونون باشینا تؤک و اونو مسح ات. 8سونرا اوغوللارینی گتئر و اونلارا خئرقهلر گیئندئر. 9هارونا و اونون اوغوللارینین بلئنه قورشاق باغلا و باشلارینا پاپاق قوی. ابدی قایدایا گؤره کاهئنلئک اونلارین اولسون. بلهجه هارونلا اوغوللارینی وظئفهیه قوی.
10سونرا حوضور چادیرینین گئرئشئنئن قاباغینا گامیشی گتئر. قوی هارونلا اوغوللاری اللرئنی گامیشین باشینا قویسونلار. 11گامیشی ربّئن قاباغیندا، حوضور چادیرینین گئرئشئنده کَس. 12گامیشین قانیندان گؤتور و بارماغینلا قوربانگاهین بوینوزلارینا چک. قانین قالان حئصّهسئنی ده قوربانگاهین آلتلیغینا تؤک. 13حیوانین ائچ آلاتینی اؤرتَن بوتون پئیی، قارا جئیهرئنئن قویروغا بَنزهر حئصّهسئنی، هر ائکی بؤیرهیئنی و اوستوندهکی پئیی قوربانگاهدا توستولهدئب یاندیر. 14گامیشین اَتئنی، دَرئسئنی و باغیرساغینی دوشَرگهنئن اِشئیئنده یاندیر. بو، گوناه قوربانیدیر.
15بئر قوچ گؤتور؛ قوی هارونلا اوغوللاری اَللرئنی قوچون باشینا قویسونلار. 16سونرا قوچو کَس، قانینی گؤتور و اونو قوربانگاهین هر طرفئنه سَپ. 17قوچو تئکه-تئکه دوغرا، ائچ آلاتینی و بودلارینی یویوب، باشینین و تئکهلرئنئن اوستونه قوی. 18بوتون قوچو قوربانگاهدا توستولهدئب یاندیر. بو، ربّئن یاندیرما قوربانی، اونا خوش اولان عطئرلی اود تقدئمدئر.
19سن او بئری قوچو گؤتور، هارونلا اوغوللاری اَللرئنی اونون باشینا قویسونلار. 20سونرا قوچو کَس؛ قانیندان بئر آز گؤتوروب هارونون صاغ قولاغینین مَرجهیئنه، اوغوللارینین صاغ قولاق مَرجکلرئنه، اونلارین صاغ اللرئنئن و صاغ آیاقلارینین باش بارماقلارینا چک. قوچون قالان قانینی قوربانگاهین هر طرفئنه سَپ. 21قوربانگاهداکی قاندان و مسح یاغیندان گؤتوروب هارونا و اونون پالتارلارینا، اوغوللارینا و اونلارین پالتارلارینا چئله. بلهجه هارون و اونون پالتارلاری، اوغوللاری و اونلارین پالتارلاری تقدئس اولونسون.
22سونرا قوچون پئیئنی؛ قویروغونو، ائچآلاتی اؤرتَن پئیی، قارا جئیهرئنئن قویروغا بَنزهر حئصّهسئنی، هر ائکی بؤیرهیئنی، اوستوندهکی پئیی و صاغ بودو گؤتور. چونکی بو وظئفهیه قویولما قوچودور. 23ربّئن قاباغیندا اولان مایاسیز چؤرکلر سبدئندن بئر چؤرک کؤکهسی، یاغلا یوغرولموش چؤرک کؤکهسی و بئر کولچه گؤتور. 24بونلاری هارون و اونون اوغوللارینین اللرئنه ور. بونلاری منئم حوضورومدا یِللَتمه تقدئمی اولاراق یِللَتسئنلر. 25سونرا بو شیلری اَللرئندن آلیب قوربانگاهدا یاندیرما قوربانی ائله توستولهدئب یاندیر. بو، ربّه خوش اولان عطئرلی اود تقدئمدئر. 26هارونون وظئفهیه قویولما قوچوندان دؤش اَتئنی گؤتوروب یِللَتمه تقدئمی اولاراق ربّئن حوضوروندا یِللَت. بو سنئن پاییندیر. 27هارونلا اوغوللارینین وظئفهیه قویولما قوچوندان یِللَدئلَن دؤش اَتئنی و قالدیریلان بودو تقدئس ات. 28بو قالدیریلان تقدئم هارونلا اؤولادلارینین ائسرایئللیلردن گلن ابدی حاقّی اولسون. ائسرایئل اؤولادلارینین باریش قوربانلاریندان دا بو، ربّه قالدیریلان تقدئم اولسون.
29هارونون موقدّس پالتارلاری اؤزوندن سونرا اوغوللارینا قالسین کی، اونلاری گئیهرَک مسح اولونوب وظئفهیه قویولسونلار. 30اونون اوغلو دا کی، اونون یرئنه کاهئندئر و موقدّس یرده خئدمت اتمک اوچون حوضور چادیرینا گئرئر، یدّی گون او پالتارلاری گیسئن.
31وظئفهیه قویولما قوچون اَتئنی گؤتور و موقدّس بئر یرده قاینات. 32هارونلا اوغوللاری او قوچون اَتئنی سبدده اولان چؤرکله حوضور چادیرینین گئرئشئنده یسئنلر. 33گوناهلاری باغیشلاتان بو تقدئملری آنجاق او آداملار یئیه بئلر کی، بو شیلرله اؤزلرئنی تقدئم و تقدئس ادئرلر؛ یاد آداملار بونلاری یئیه بئلمزلر، چونکی بو شیلر موقدّسدئرلر. 34اگر وظئفهیه قویولما قوربانینین اَتئندن و چؤرکدن سحره قدر قالسا، اوندان قالانی یاندیر؛ بو شیلر یِیئلمز، چونکی موقدّسدئرلر. 35من سنه امر اتدئیئم کئمی، او جور ده هارونلا اوغوللاری اوچون ات.
اونلارین وظئفهیه کچمه واختینی یدّی گون داوام اتدئر. 36هر گون کفّاره اوچون بئر گامیشی گوناه قوربانی اولاراق تقدئم ات. قوربانگاه اوچون کفّاره ادهرک، اونو پاک ات و تقدئس اتمک اوچون مسح ات.
37یدّی گون عرضئنده قوربانگاه اوچون کفّاره ادهرک اونو تقدئس ات. سونرا قوربانگاه لاپ موقدّس ساییلاجاق و اونا توخونان هر شی موقدّس اولاجاق.
گوندهلئک تقدئملر
38همئشهلئک هر گون قوربانگاه اوستونده بئر ائلّئک ائکی قوزو گتئر. 39قوزونون بئرئنی سحر، او بئرئنی ده آخشامچاغی تقدئم ات. 40بئرئنجی قوزو ائله بئرلئکده، دؤردده بئر هئن#29:40 تقرئبن ۹/۰ لئتر سیخما زیتون یاغی ائله یوغرولموش، اوندا بئر اِفا#29:40 تقرئبن ۳/۱ کئلو نارین اون و مایع تقدئمی اولاراق دؤردده بئر هئن شراب گتئر. 41آخشامچاغی تقدئم اتدئیئن او بئری قوزو ائله سحرکی کئمی تاخیل تقدئمی و مایع تقدئمی گتئر. بو ربّه خوش اولان عطئرلی اود تقدئمدئر. 42بو سئزئن اوچون نسئلدن-نسئله، حوضور چادیرینین گئرئشئنده ربّئن قاباغیندا همئشهلئک یاندیرما قوربانی اولاجاق. من اورادا سئزئنله گؤروشوب، سنئنله دانیشاجاغام. 43اورادا من ائسرایئل اؤولادلاری ائله گؤروشهجیم؛ حوضور چادیری منئم عئزّتئمله تقدئس اولوناجاق. 44من حوضور چادیرینی و قوربانگاهی تقدئس ادهجیم؛ هارونلا اوغوللارینی دا تقدئس ادهجیم کی، منه کاهئنلئک اتسئنلر. 45ائسرایئل اؤولادلاری آراسیندا ساکئن اولاجاغام و اونلار اوچون تاری اولاجاغام. 46اونلار دا بئلهجکلر کی، آرالاریندا ساکئن اولماق اوچون اونلاری مئصئر تورپاغیندان چیخاردان تاریلاری رب، منم. اونلارین تاریسی رب، منم.
Currently Selected:
چیخیش 29: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
