چیخیش 28

1سن آمّا قارداشین هارونو و اونون اوغوللاری نادابی، اَبئهونو، اِلازاری و ائتاماری ائسرایئل اؤولادلارینین آراسیندان یانینا گتئر کی، اونلار منه کاهئنلئک اتسئنلر. 2قارداشین هارونا عئزّت و گؤزللئک اوچون موقدّس پالتارلار حاضیرلا. 3سن ده منئم حئکمت روحو ائله دولدوردوغوم بوتون مهارتلی اوستالارا تاپشیر کی، هارونون تقدئس اولونماسی اوچون اونا پالتارلار حاضیرلاسینلار و او منه کاهئنلئک اتسئن. 4اونلارین حاضیرلایاجاغی پالتارلار بونلاردیر: دؤشلوک، اِفود#28‏:4 کاهئن خَلَتی.، اوست جوبّه، ناخیشلی خئرقه، عمّامه و قورشاق. بو موقدّس پالتارلاری قارداشین هارونا و اونون اوغوللارینا حاضیرلاسینلار کی، منه کاهئنلئک اتسئنلر. 5قوی پالتارلاری حاضیرلایانلار قیزیل، لاجورد، ارغوانی و قیرمیزی پارچا و نازئک کتان گؤتورسونلر.

اِفود

6اِفودو قیزیلدان، لاجورد، ارغوانی و قیرمیزی پارچا و نفئس توخونموش نازئک کتاندان ناخیشلا دوزَلتسئنلر. 7ائکی چئیئنلئک اولسون کی، هر ائکی اوجونو بئربئرئنه باغلاییب بَرکئدئر. 8اِفودو باغلایانین اوستوندن گلن ناخیشلی کَمَر، اونونلا بئر حئصّه‌دن، او دا قیزیلدان، لاجورد، ارغوانی و قیرمیزی پارچا و نفئس توخونموش نازئک کتاندان اولسون. 9ائکی عدد دامارلی عقئق داشی گؤتور و اوستونده ائسرایئلئن اوغوللارینین آدلارینی حکّ ات. 10اونلارین دوغولما سیراسینا موطابئق بئر داشین اوستونده آلتی آد، او بئرئسئنئن اوستونده قالان آلتی آدی، 11حکّاکین ائشی اولان مؤهور اویماسی کئمی ائکی داش اوستونده ائسرایئلئن اوغوللارینین آدلارینی حَکّ ات. حؤرمه قیزیل ساغاناقلارا سالیب، 12بو ائکی داشی اِفودون چئیئنلئکلرئنه تاخ. بونلار ائسرایئلئن اوغوللارینین خاطئره داشلاری‌دیر؛ هارون اونلارین آدلارینی ربّئن قاباغیندا ائکی چئینئنده خاطئره کئمی گزدئره‌جک. 13حؤرمه قیزیلدان ساغاناقلار دوزَلت، 14خالئص قیزیلدان ائکی ائپه بَنزه‌ر بورما زنجئر دوزَلت؛ بورما زنجئرلری ساغاناقلارا تاخ.

دؤشلوک

15قضاوت دؤشلویونو اِفود کئمی ناخیشلی قیزیلدان، لاجورد، ارغوانی و قیرمیزی پارچا و نفئس توخونموش نازئک کتاندان دوزَلت. 16دؤشلوک ائکی قات و موربّع شَکلئنده، اوزونلوغو بئر قاریش، اِنی ده بئر قاریش اولسون. 17اوستونده‌کی بئر چَرچئوه‌یه دؤرد سیرا داش تاخ. بئرئنجی سیرا یاقوت، توپاز، زومرود 18ائکئنجی سیرا فئروزه، لاجورد داشی و آغ عقئق 19اوچونجو سیرا سئرکون، عقئق و آمِتئست، 20دؤردونجو سیرا زبرجد، دامارلی عقئق و یَشَم داشی اولسون. بو داشلار حؤرمه قیزیل ساغاناقلارا تاخیلسین. 21داشلار ائسرایئلئن اوغوللارینین آدلارینا موطابئق اون ائکی و اون ائکی قبئله اوچون هر داش بئر آدین اویما مؤهورو اولسون. 22دؤشلوکده خالئص قیزیلدان ائپه بَنزه‌ر بورما زنجئرلر قاییر. 23دؤشلوکده ائکی قیزیل حالقا دوزَلت و اونلاری دؤشلویون ائکی اوجونا تاخ. 24ائکی قیزیل ائپی دؤشلویون اوجلارینداکی ائکی حالقایا تاخ. 25ائپلرئن او بئری اوجلارینی ائکی حؤرمه ساغاناغا تاخیب، اِفودون چئیئنلئکلرئنئن قاباق طرفئنه باغلا. 26گئنه ده ائکی قیزیل حالقا دوزَلت و اونلاری دؤشلویون ائکی اوجونا، اِفودلا یاناشی ائچ قاتینا تاخ. 27داها ائکی قیزیل حالقا دوزَلت و اونلاری اِفودون نفئس توخونموش چئیئنلئکلرئنئن قاباق طرفئنه، آشاغییا، اِفودون کَمَری ائله بئرلَشمه اوستونه بَرکئت. 28اونلار دؤشلوک حالقالاری ائله اِفودون نفئس توخونموش حالقالارینا لاجورد قایتانلا باغلانیب، اِفودون کَمَرئنئن اوستونه برکئدئلسئن کی، دؤشلوک اِفوددان ساللانماسین.

29هارون موقدّس یره داخئل اولدوغو زامان، ربّئن قاباغیندا همئشه‌لئک خاطئره اولاراق، ائسرایئلئن اوغوللارینین آدلارینی قضاوت دؤشلویونده، اوره‌یئنئن اوستونده داشییاجاق. 30اورئم و تومّئمی#28‏:30 باش کاهئنئن اِفودونداکی دؤشلویونده اولان ائکی قاپ. بونلار پوشک آتماق و تارینین ائسته‌دئیئنی بئلمک اوچون ائستئفاده اولونوردو. ده قضاوت دؤشلویونه قوی کی، ربّئن حوضورونا داخئل اولدوغو زامان، اونلار دا اوره‌یئنئن اوستونده اولسون. بله‌جه هارون ائسرایئل اؤولادلارینین حؤکمونو ربّئن حوضوروندا همئشه‌لئک اوره‌یئنئن اوستونده داشییاجاق.

کاهئنلرئن او بئری پالتارلاری

31اِفودون جوبّه‌سئنی تامامن لاجورد پارچادان تئک. 32اورتاسیندا باش کچئرتمک اوچون یر اولسون. اونون قیراغیندا جیریلماماق اوچون بئر یاخا توخونسون. 33جوبّه‌نئن اَته‌یئنئن اطرافینا لاجورد، ارغوانی و قیرمیزی پارچادان نارلار و و آرالارینا قیزیلدان زینقیروولار دوز: 34جوبّه‌نئن اَته‌یی بویونجا اطرافیندا قیزیل زینقیروو و نار نؤوبتله دوزولسون. 35قوی جوبّه هارون خئدمت اتدئیی زامان اَینئنده اولسون. وردئیی سَس ده اونون موقدّس یره، ربّئن حوضورونا گئرئب-چیخدیغی زامان اشئدئلسئن کی، او اؤلمه‌سئن.

36خالئص قیزیلدان بئر لؤوحه‌جئک دوزَلت و اونون اوستونده مؤهور اویماسی اولاراق «ربّه موقدّسدئر» یازیسینی حکّ ات. 37اونو لاجورد قایتانلا عمّامه‌نئن اوستونه، قاباق طرفئنه تئک. 38بله‌جه لؤوحه‌جئک هارونون آلنینین اوستونده اولسون. هارون او تقصئری داشییاجاق کی، ائسرایئل اؤولادلاری، تقدئس اتدئکلری بوتون موقدّس هدئیّه‌لرده، مومکوندور ائشله‌تسئنلر. او همئشه هارونون آلنیندا اولاجاق کی، ربّئن حوضوروندا مقبول اولسونلار.

39خئرقه‌نی نازئک کتاندان، ناخیشلی حؤر، عمّامه‌نی ده نازئک کتاندان توخو. قورشاغی ناخیشلی دوزَلت.

40هارونون اوغوللارینا خئرقه‌لر، قورشاقلار و عئزّت و گؤزللئک اوچون پاپاقلار دوزَلت. 41بونلاری قارداشین هارونلا اوغوللارینا گیئندئرئب اونلاری مسح ات، وظئفه‌یه قوی و منه کاهئنلئک اتمک اوچون تقدئس ات.

42بِلدن بودا قدر لوت بدنلرئنی اؤرتَن کتان آلت پالتارلاری تئک. 43هارونلا اوغوللاری حوضور چادیرینا داخئل اولاندا، یا دا موقدّس یرده خئدمت اتمک اوچون قوربانگاها یاخینلاشاندا بونلاری گئیه‌جکلر کی، خاطایا باتیب اؤلمه‌سئنلر. بو، هارونلا اؤولادلارینا ابدی قایدا اولسون.

Currently Selected:

چیخیش 28: موقدس کتاب

Highlight

Copy